Deputetët e Partisë Demokratike kanë shkuar në zonën e Rrugës së Durrësit, për të mbështetur protestën e studentëve, gjimnazistëve dhe qytetarëve të Tiranës, të cilët janë në ditën e dytë të revoltës së tyre.
Aty janë parë Luçiano Boçi, Luan Baçi, Tomor Alizoti dhe Bardh Spahia, të cilët kanë deklaruar se mbështesin plotësisht kërkesat dhe protestën e studentëve.
Bardh Spahia, i cili është edhe mjek me profesion, i ka dhënë ndihmën e parë një personi që raportohet se është plagosur nga përplasjet me trupat e Policisë së Shtetit, dhe ka thyerje në pjesën e ballit.
Ndërkohë, një grupim i qytetarëve u ka kërkuar deputetëve të Partisë Demokratike që të largohen dhe të mos përfshihen në tubimin e tyre, nën pretendimet se ata nuk i përfaqësojnë.
Deri tani kanë kaluar më shumë se dy orë nga grumbullimi i studentëve, gjimnazistëve dhe qytetarëve të Tiranës në zonën e Rrugës së Durrësit, ku nuk kanë munguar përplasjet me efektivët dhe vandalizmat ndaj Ministrisë së Arsimit.
“Policia e Shtetit u bën thirrje të gjithë pjesëmarrësve në tubim të ruajnë qetësinë, të shmangin çdo akt dhune dhe të distancohen nga personat e maskuar që po sulmojnë punonjësit e Policisë dhe po dëmtojnë pronën publike e private”, thuhej ne apel.
