Shqipëria bëhet vendi i parë në rajon kur Europol do të ketë një zyrë të tij. Në ceremoninë e hapjes së zyrës së oficerit ndërlidhes të Europol, Ministri i Brendshëm tha se thellimi i integrimit dhe lëvizjes së lirë na vë edhe përpara sfidave për forcimin e sigurisë.
Sandër Lleshaj: Hapja e zyrës së Europol në Tiranë është një ngjarje shumë e rëndësishme dhe pozitive. Në 10 vitet e fundit numri i njerëzve që kalojnë kufijtë e Republikës së Shqipërisë është rritur 160%. Tendenca vazhdon me po të njëjtin ritëm rritje. Mjafton vetëm kjo shifër për të treguar nivelin e jashtëzakonshëm që ka arritur lëvizja e njerëzve dhe mallrave.Thellimi i integrimit nuk e cënon sigurinë po e forcon atë, por me një kusht. Thellimi i integrimit duhet të shoqërohet dhe nga rritja e pandalshme dhe shkëmbimi i vazhdueshëm i bashkëpunimit dhe informacionit. Duhet të sigurojmë që kjo të mos ndodhë vetëm në nivelin e deklaratave politike por edhe praktikën e përditshme.
Në ceremoni merrnin pjesë edhe Ambasadori i BE-së dhe Drejtoresha Ekzekutive e Europol.
