Kryeministri Edi Rama bëri të ditur në një takim me fermerët e Librazhdit, se ashtu si legalizimi i ndërtesave të ndërtuara në tokë shtetërore, do të veprohet me tokat shtetërore që janë mbjellë tashmë me pemë të ndryshme. “Ajo që unë po insistoj me ministrin e Bujqësisë është që ne i kemi dhënë legalizim njerëzve që kanë ndërtuar shtëpi, ndërkohë që tokat shtetërore të lira ne i vëmë në dispozicion të sipërmarrësve dhe i themi hajde merrini me qira 1 euro dhe mbilleni që këtu këto toka janë mbjellë. Për të shkuar e për ti prerë me sharrë këto pemë është pa logjikë. Atëherë ajo që po bëjmë është të përgatisim një formë pronësie, marrje në përdorim, po po punoj të njihet e drejta atyre që i kanë mbjellë, punojnë, kultivojnë dhe me to jetojnë, sepse në fund të fundit këtë po kërkojmë dhe ne”, tha Rama. Ai shtoi se bujqësia ka dy realitete, suksesi ku njerëzit fitojnë dhe varfëria e njerëzve që presin nga qielli. “Në bujqësi ne kemi dy realitete, një realitet suksesi ku njerëzit fitojnë para, nuk janë të varfër, dhe një realitet varfërie ku njerëzit rijnë dhe shikojnë qiellin se çfarë do sjelli po e solli. Nuk ka arsye të ketë varfëri në fshat nëse ne jemi të qartë të organizuar dhe bashkëpunojmë. Shteti nuk mund të vijë të bëjë punën tuaj”, tha Rama. Ai u kërkoi fermerëve të bashkohen në shitjen e prodhimeve, për të mos hedhur poshtë prodhimet e tyre, dhe për të përthithur sa më mirë fondet e BE-së për bujqësinë. Ai i siguroi ata se përgjigjet e aplikimeve nuk do të jenë me parti apo ryshfet, por në bazë të kritereve të qarta. “Mos kini asnjë dyshim, koha do ta tregojë, që përgjigjet për aplikimet do të jenë korrekte, nuk do të ketë përgjigje me parti, nuk do të ketë përgjigje me ryshfet, po në bazë të drejtësisë që do të vendosë vlerën e një aplikimi me kritere të qarta e transparente. Ne duam që këto para të mund t’i thithim të gjitha dhe të bëjmë sukses. Shoqëritë e bashkuara nuk janë më subjekt i TVSH-së, nuk ka më detyrimin që ri nën 8 milionë se ndryshe të kap TVSH-ja”, tha Rama. Ai bëri të ditur se për agroturizmin, si një program i ri në vend, është shtyrë aplikimi me një muaj, për shkak të kërkesave të larta. “BE vërtetë jep lek, po lekë qyl nuk ka. Ti marrësh këto para, duhet ti përdorësh të kesh projekt të qartë, dhe të kesh argumenta të plotë për të marrë financimin. Nga ana tjetër, është shtyrë një muaj aplikimi për agroturizmin, sepse ka interesim dhe ne kemi qenë pak më të vonuar në kohë, pasi është një program i ri i qeverisë së re, kush ka një strukturë që do ta kthejë në agroturizëm, në bujtinë, të ketë mundësi të aplikojë”, tha ai.

Kreu i Partisë Demokratike Lulzim Basha duhet të ndiqet penalisht dhe të ndëshkohet moralisht për financimin rus të Partisë Demokratike tha në një dalje për mediat, kreu i grupit parlamentar të PS-së, Taulant Balla. Ai thotë se Basha duhe të japë shpjegime si personi kryesor “për një sërë veprash penale e për të zbardhur një orë më parë këtë skandal të rëndë”. “Lulzim Basha dhe PD duhet të marrin të gjitha përgjegjësitë e vetë për financimin e paligjshëm në kohën e çadrës së Republikës së Re. Burime të errëta të këtij financimi, ku përfshihen edhe xhepa oligarkësh ruse, janë një arsye e pashmangshme që Lulëzim Basha të ndiqet penalisht dhe kjo PD e marrë peng prej tij, të ndëshkohet moralisht nga çdo demokrat i ndershëm”, tha Balla. Balla tha më tej se Basha duhet të tregojë se çfarë ka premtuar në këmbim të këtyre pagesave të biznesmenëve rusë. “Ça është kjo dhuratë ruse për Lulzim Bashën dhe përse i është dhënë, dhe çka është më e rëndësishme ca ka premtuar Lulzim Basha në këmbim të këtyre pagesave biznesmenëve rus. Shqiptarët duan të dijnë të vërtetën. Dhe brenda PD-së janë shumë zëra publikë që kërkojnë të dijnë të vërtetën. Ne duam të dimë si e ka financuar Lulzim Basha fushatën e turpshme të nxirrjes së imazhit të Shqipërisë në institucione dhe media amerikane. Është dëm i madh që i është bërë Shqipërisë dhe shqiptrarëve, po sot është momenti që Lulzim Basha të tregojë nga i ka gjetur këto para?”, vijoi ai.

Partia Demokratike ka zhvilluar një mbledhje para komisionit hetimor “Tahiri” i cili mblidhet për herë të parë këtë të hënë. Kreu i PD-së, Lulzim Basha kërkoi që prokuroria të vijojë paralelisht hetimet, pasi po bëhet presion i madh politik për ta mbyllur çështjen “Tahiri”. “Paralelisht me punën e këtij komisioni Prokuroria duhet të bëjë punën e saj për të hetuar grupin kriminal Habilaj-Tahiri dhe të gjithë policët e bashkëpunëtorët e tjetë politik dhe jo të këtij grupi të rrezikshëm. Ta bëjë në mënyrë të paanshme. Po bëhet presion shumë i madh politik për të mbyllur çështjen Tahiri”, tha Basha. Ai u shpreh se qëllimi i komisionit është të zbardhë se çfarë ndodhi dhe pse ndodhi “për të mos lejuar kurrë më që shteti të kapet nga krimi dhe të kthehet në zgjatim të bandave të drogës”. “Në rastin e Saimir Tahirit pushuan së ekzistuari të gjitha institucionet ligzbatuese në vend. Qëllim i komisionit është të zbardhë çfarë ndodhi dhe pse ndodhi për të mos lejuar kurrë më që shteti të kapet nga krimi dhe të kthehet në zgjatim të bandave të drogës. Ne do të hetojmë si dhe pse ndodhi që e gjithë kupola e policisë u kthye në organizataë kriminale dhe askush në qeverisje nuk reagoi. Si dhe pse ndodhi që megjithë informimet e shumta për përfshirjen e Saimir Tahirit në trafikun e drogës asnjë institucion shtetëror nuk e vuri para drejtësisë. Si dhe pse ndodhi që vendi u mbulua me drogë sheshit, dhe asnjë institucion shtetëror nuk reagoi dhe nuk bëri asnjë përpjekje për ta ndaluar”, vijoi Basha. Kryetari i PD-së Lulzim Basha doli në një deklaratë për median për të kërkuar hetim të paanshëm dhe jo politik për Fran Frrokaj, kryetarin e Bashkisë së Lezhës, i zgjedhur nga Partia Demokratike në zgjedhjet e 2015. “Shpresojmë dhe urojmë që Fran Frrokaj të jetë i pafajshëm. Kërkojmë që hetimi të jetë transparent, jo politik dhe i panashën”. Fran Frrokaj është njëri prej 12 personave të arrestuar më 16 mars si të akuzuar për përfshirjen në skandalin e abuzimit të pronave në bregdetin e Lezhës.