Edhe politikanët duhet të kalojnë në vetting, ashtu si prokurorët, gjykatësit apo policët. Kjo ishte deklarata e Ministrit të Brendshëm, Fatmir Xhafaj, në Komisionin e Sigurisë, i cili miratoi në parim këtë projektligj. Përfaqësuesit demokratë lëshuan akuza të forta ndaj këtij procesi. Vettingu në Policinë e Shtetit u diskutua këtë të hënë në Komisionin e Sigurisë, kur deputetët e miratuan në parim këtë projektligj, ndonëse pati debate mes anëtarëve. Ministri i Brendshëm, Fatmir Xhafaj, duke i kthyer përgjigje deputetit demokrat Ervin Salianji, u shpreh se edhe politikanët duhet të kalojnë në vetting.

Xhafaj: Pyetja e parë ishte, a mund dhe duhet të përfshihet Ministri i Brendshëm në procesin e Vetting-ut? Natyrisht, nëse unë do të isha punonjës i Policisë së Shtetit, i Gardës apo SHÇBA-së, do të isha sot subjekt i këtij ligji vlerësimi. Nëse bëhet fjalë që të vetohem unë si politikan, unë vetohem sot si gjithë politikanët e tjerë, përfshirë edhe ju që jeni në këtë tavolinë. Nëse duhet një ligj i Vetting-ut për politikanët, unë jam i pari që do ta votoja me të dy duart dhe mund t’ju jap një draft që mund ta keni në konsideratë, nëse do të ndërmerrni një inciativë të tillë. Dhe do të ishte një gjë tejet pozitive dhe besoj që ai draft duhet të ketë të parin, si do që të jetë, që të vetohem unë i pari, meqenëse jam hartuesi i Reformës në Drejtësi, hartuesi i këtij projektligji dhe Ministër i Brendshëm për momentin në këtë detyrë, nëse kjo është e nevojshme për t’u parë si e tillë. Kjo do të ishte një gjë shumë pozitive. Por besoj fort që në mënyrën si është ndërtuar dhe vetë Reforma në Drejtësi, në mënyrën se si është konceptuar ajo, unë besoj shumë shpejt që do të kemi dhe Vetting për politikën, qoftë për çështje të figurës, qoftë për çështje të njerëzve në politikë. Dhe në mënyrë të veçantë të atyre që kanë pasur rol vendimmarrës, në fatet e këtij vendi dhe në pasuritë e qytetarëve të këtij vendi. Gjithashtu, Ministri shpjegoi edhe disa detaje të projektligjit të vettingut. Deputeti demokrat, Flamur Noka, lëshoi disa akuza në drejtim të mazhorancës. Deputetët e Partisë Demokratike, ata të Partisë Socialise dhe të Lëvizjes Socialiste për Integrim, ishin kryesisht dakord me projektligjin, ndonëse kishin disa vërejtje që kishin të bënin me aspekte teknike. Në vetting mund të kalojnë edhe policët e larguar për ndryshime strukturore, ose ata që kanë fituar në gjykatë, por që nuk duhet të jenë më tepër se 47 vjeç, e cila ishte një tjetër pikë e debatuar nga anëtarët e Komisionit.

Gjykata e Apelit në Durrës ka lënë në burg dy ish-Drejtorët e Përgjithshëm të Rrugëve, Dashamir Xhika dhe Andi Toma.  Në seancën gjyqësore për rivlerësimin e masës së sigurisë, trupa gjykuese vendosi të lërë në fuqi ‘arrestin me burg’ të vendosur Gjykata e Elbasanit, vendim që është apeluar nga mbrojtja në Gjykatën e Apelit në Durrës. “Arrest me burg” Apeli i Durrësit vendosi edhe Rexhep Tarban (mbikqyrës i punimeve në rrugën e Gjinarit), ndërkohë për Agron Hysën, Kujtim Hysën dhe Rezarta Bokçiun u vendos detyrim paraqitje. Gjashtë persona të tjerë janë shpallur në kërkim nga prokuroria. Në këtë çështje akuzohen gjithsej 11 persona për të cilët prokuroria ka kërkuar caktimin e masave të sigurisë në gjykatë.

Ministria e Infrastrukturës dhe Energjisë ka nisur procedurat për zgjidhjen e njëanshme të kontratës së koncesionit për ndërtimin e hidrocentraleve “Bigas 1&Bigas 2 dhe Veleshnje” në lumin Osum. “Ministria e Infrastrukturës dhe Energjisë njofton se ka administruar vendimin Nr.01, datë 15.02.2018 të Ministrisë së Turizmit dhe Mjedisit, e cila ka njoftuar pavlefshmërinë absolute të aktit administrativ “Vendimi për VNM paraprake, Nr.13, Nr.137 identifikimi, datë 26.03.2015” për aktivitetin instalime për prodhimin e energjisë hidroelektrike për hidrocentralet Bigas 1 dhe Bigas 2”, në pellgun ujëmbledhës “Përroi i Bigasit”, Skrapar””, thuhet në njoftimin e ministrisë. Më tej në deklaratë thuhet gjithashtu, se është administruar edhe njoftimi se Agjencia e Zhvillimit të Territorit ka kërkuar “Inspektimin në terren me qëllim pezullimin e punimeve për ndërtimin e hidrocentraleve Bigas 1 & Bigas 2 dhe Veleshnje”, deri në vendimmarrjen e Ministrisë së Turizmit dhe Mjedisit. “Në këto kushte, bazuar në nenin 12 “Zgjidhja e kontratës së koncesionit” të kontratës së koncesionit për ndërtimin e hidrocentraleve “Bigas 1&Bigas 2 dhe Veleshnje”, Ministria e Infrastrukturës dhe Energjisë në cilësinë e Autoritetit Kontraktues ka njoftuar shoqërinë për fillimin e procedurave për zgjidhjen e njëanshme të kontratës së koncesionit”. Ministria e Infrastrukturës dhe Energjisë shprehet më tej se mbështet dhe inkurajon zhvillimin e burimeve të reja energjetike pasi vendi ka potenciale hidrike dhe është përballë sfidave të mëdha me kërkesë energjie gjithnjë në rritje. “Gjithsesi, paralelisht me mbështetjen për vepra të reja energjetike, Ministria e Infrastrukturës dhe Energjisë nënvizon se projektet duhet të jenë në përputhje me kushtet teknike dhe në harmoni me mjedisin”.