Një gjykatë federale në Nju Jork ka lëshuar një urdhër të jashtëzakonshëm me të cilin përkohësisht ndalon SHBA-në që të dëbojë qytetarët nga vendet të cilat presidenti amerikan, Donald Trump ka ndaluar hyrjen e tyre në vend.

Gjykatësja Ann Donnelly lëshoi një urdhër të shtunën në mbrëmje, pasi avokatët e Unionit Amerikan për Liritë Civile kishin ngritur padi në emër të qytetarëve nga shtatë vende myslimane, që u bllokuan në aeroportet në mbarë vendin, pas hyrjes në fuqi të ligjit që ndalon hyrjen e tyre në SHBA.

Ky vendim, i cili vlen në të gjithë vendin, u mirëprit nga një numër i madh i protestuesve që ishin mbledhur para sallës së gjyqit në Bruklin.

Urdhri ndalon policinë kufitare amerikane që të kthejë këdo që ka mbërritur në SHBA nga Iraku, Siria, Irani, Sudani, Libia, Somalia dhe Jemeni.

Vendimi do të jetë në fuqi deri në seancën e radhës, të planifikuar për 21 shkurt, dhe vlen për njerëzit me viza të vlefshme si dhe për të gjithë ata të cilëve u është miratuar kërkesa e refugjatit.

Më 27 janar, një urdhër ekzekutiv i nënshkruar nga presidenti amerikan, Donald Trump pezullonte programin amerikan për refugjatët për 120 ditë.

Trump urdhëroi sekretarin e Shtetit të rishikonte programin amerikan të refugjatëve gjatë pezullimit prej 120 ditësh për t’u siguruar që personat e miratuar si refugjatë nuk përbëjnë një kërcënim për sigurinë dhe mirëqenien e Shteteve të Bashkuara të Amerikës.

Urdhri gjithashtu ndalonte në mënyrë specifike shtetasit sirianë të hyjnë në SHBA qoftë si emigrantë apo joemigrantë, sepse duke i lejuar ata do të ishte e dëmshme për interesat e Shteteve të Bashkuaratë Amerikës.

“News Service” shkruan se Papa Françesku ka dënuar hipokrizinë nga të krishterët të cilët janë të pamëshirshëm ndaj refugjatëve dhe personave të besimeve të tjera, duke iu drejtuar një mbledhjeje të pelegrinazhit të katolikëve dhe nga Gjermania.

Papa kritikoi ashper ata që duan të mbrojnë krishterimin në Perëndim dhe nga ana tjetër janë kundër refugjatëve dhe feve të tjera.

“Kjo nuk është diçka që e kam lexuar në libra, por në gazeta dhe në televizion çdo ditë,” tha ai.

Ai vazhdoi të citonte disa rreshta nga Bibla dhe më pas tha: “Është hipokrizi ta quash veten të krishterë dhe të dëbosh një refugjat ose dikush që kërkon ndihmë, dikush që është i uritur ose i etur, të dëboj dikë dikush që ka nevojë për ndihmën time.

Nëse unë them që jam i krishterë, por i bëj këto gjëra, unë jam një hipokrit.

Të gjitha vendet duhet të përqendrohen në “shërbimin ndaj të varfërve, të sëmurëve dhe atyre që kanë braktisur vendet e tyre në kërkim të një të ardhmeje më të mirë për veten dhe familjet e tyre.

Duke e vënë veten në shërbim të atyre që kanë nevojë, do të ndiejmë se jemi të bashkuar, është mëshira e Perëndisë që na bashkon”, tha Papa.

Kryeministri kanadez Justin Trudeau ka replikuar Trump-in në lidhje me ndalimin e refugjatëve në Amerikë, nga presidenti Donald Trump, duke i bashkangjitur mesazhit të tij në Tëitter, një foto me një vajzë siriane në aeroportin e Torontos.

Nuk ka rëndësi cila është feja juaj, në Kanada jeni të mirëpritur. Diversiteti është forca jonë’.

Trudeua ka përdorur rrjetet sociale për tu solidarizuar me të gjithë ata që ikin nga lufta dhe tmerri, një mesazh që është ndarë në Twitter nga mijëra njerëz.

Të shumta kanë qenë përgjigjet dhe falënderimet për kryeministrin, mbi të gjitha nga qytetarët amerikan.