Një operacion i policisë së kryeqytetit i koduar “Snow men” (Njeriu i dëborës) ka zbuluar lëndë narkotike duke vënë në pranga katër persona.

Ylber Gega, 45 vjeç, banues në Fushë Krujë, Ylber Zllami, 36 vjeç, Albert Ajdini, 27 vjeç dhe Leonard Çela, 37 vjeç, që të tre banues në Tiranë, dyshohen se në bashkëpunim me njëri tjetrin kryenin aktivitetin e shpërndarjes së lëndës së dyshuar narkotike kanabis sativa në afërsi të autostradës Tiranë – Durrës pranë fshatit Domje, Qaf Kashari, shinat e trenit etj.

Në bazë të informacioneve të siguruara nga policia për të dyshuarit se do bënin një shkëmbim të një sasie të konsiderueshme lënde të dyshuar narkotike kanabis saiva, në zonën e Domjes pranë autostradës Tiranë- Durrës, gjatë ditës së djeshme, teksa kishte rënë edhe dëborë, prej të cilit mori edhe emrin operacioni, efektivët e policisë janë vënë në lëvizje me qëllim kapjen në flagrancë të tyre.

Më konkretisht janë konstatuar dy automjete, një “Ford” dhe një “Opel”, të cilat kanë ndaluar pranë njëra tjetrës me disa persona në brendësi të tyre, e më pas kanë kaluar në një fushë pranë shinave të trenit.

Menjëherë është bërë ndërhyrja nga ana e policisë dhe është ushtruar kontrolli në automjetet e mësipërm, ku janë gjetur gjashtë thasë të zinj me lëndë narkotike të llojit kanabis sativa, në pjesën e bagazhit dhe katër thasë të tjerë në sediljen e pasme të automjetit tip “Ford”.

Në cilësinë e provës materiale janë sekuestruar 58 kilogramë e 600 gramë lëndë narkotike kanabis sativa, dy automjetet dhe gjashtë aparate telefonik celular të markave të ndryshme.

Lidhur me këtë rast po punohet për identifikimin e personave të tjerë të përfshirë, ndërkohë që materialet i’u referuan Prokurorisë së Tiranës për veprën penale të “Prodhimit dhe shitjes së lëndëve narkotike në bashkëpunim”

Partitë e vogla parlamentare të opozitës të mbështetura edhe nga PDIU dhe LIBRA i dorëzuan dje në zyrë ambasadores së delegacionit të BE-së në Tiranë, Romana Vlahutin, pesë kushtet e tyre si garanci të votës së lirë të 18 qershorit.

Sipas këtij memorandumi, kushti i parë ka të bëjë me “realizimin e identifikimit biometrik të zgjedhësve, votimin elektronik, si dhe numërimin elektronik të votave nëpërmjet një sistemi të aplikuar në shkallë vendi”.

Kushti i dytë lidhet me “dekriminalizimin e procesit zgjedhor nëpërmjet zbatimit me intensitet, shpejtësi dhe forcë të ligjit 138’2015 për dekriminalizimin e strukturave të fushatës zgjedhore të partive, largimin e bandave dhe elementëve kriminalë nga procesi zgjedhor, fushata dhe veçanërisht, prania e tyre ditën e zgjedhjeve”.

Kushti i tretë sipas të vegjëlve, “duhet të ulet kostoja e fushatës zgjedhore në mënyrë drastike, të bëhet transparencë efikase e shpenzimeve dhe burimeve të financimit, të forcohen ndalimet për financimin dhe të forcohen penalitete, përfshirë ato në Kod Penal, përfshirë kategorizimin e shitblerjes së votës në krim të rëndë.

Si kusht të katërt, partitë e vogla kërkojnë “të ndalohet rreptësisht përdorimi i burimeve njerëzore të administratës publike në fushatë si dhe të ndalohet rreptësisht përdorimi i burimeve materiale të administratës publike”.

Kushti i fundit ka të bëjë me “garantimin e aksesit të drejtë në media dhe mbulimin mediatik si dhe reduktimin dhe nominimin e hapësirës publicitare në fushatën zgjedhore”, shkruan “Gsh”.

Në memorandumin e partive të vogla parlamentare thuhet: “Ne partitë parlamentare nënshkruese të këtij memorandumi konsiderojmë se përmbushja e kushteve të mësipërme është një minimum i domosdoshëm dhe i pakapërcyeshëm për një proces zgjedhor të lirë, të ndershëm dhe të besueshëm dhe në përputhje me standardet ndërkombëtare. Një proces reforme duhet patjetër të zgjidhë çështjet e mësipërme për të qenë efektiv dhe i besueshëm. Mospërmbushja e tyre është garanci që zgjedhjet e ardhshme nuk do të jenë zgjedhjet që presin shqiptarët dhe që hapin rrugën e integrimit evropian, por janë vetëm votime të manipuluara, që nuk pasqyrojnë vullnetin e shqiptarëve. Në këtë kuadër, i kërkojmë shumicës qeverisëse, si mbajtësja e përgjegjësisë kryesore dhe çdo faktori tjetër politik dhe shtetëror të tregojnë vullnetin e mirë politik për sigurimin e standardeve zgjedhore nëpërmjet mbështetjes publike të kushteve të mësipërme dhe kontributit për realizimin e tyre”.

Pas takimit, kreu i PR-së, Fatmir Mediu paralajmëroi bojkot të parlamentit nëse nuk pranohet përdorimi i teknologjisë.

Ndryshe nga të djathtët, PDIU-ja e mazhorancës këmbënguli më shumë tek depolitizimi i procesit. “Ose të jemi të gjithë pjesë e infrastrukturës zgjedhore, ose sistemi të kalojë në një stad tjetër. Historia e sistemit me dy partitë kryesore, njësoj si sistem Stalinist, që numërojnë dhe rezultatet ua japin të tjerëve aq sa duan dhe si duan ato është një epope që duhet të marrë fund”, deklaroi deputetja Mesila Doda. Kurse deputetja e LIBRA-s, zj.Mimoza Hafizi u shpreh: “Kërkesa kryesore që pranohet është ajo e administrimit teknologjik të zgjedhjeve të ardhshme, si numërimi elektronik, e cila do ta çtensionojë mjaft situatën në zgjedhjet e ardhshme”.

Kushtet e partive të vogla për zgjedhjet e 18 qershorit

1- Realizimin e Identifikimit biometrik të zgjedhësve, votimin elektronik si dhe numërimin elektronik të votave nëpërmjet një sistemi të aplikuar në shkallë vendi, që integron në një proces të tre komponentët e mësipërm.

2- Dekriminalizimin e procesit zgjedhor nëpërmjet zbatimit me intensitet, shpejtësi dhe forcë të ligjit 138’2015 për dekriminalizimin e strukturave të fushatës zgjedhore të partive, largimin e bandave dhe elementëve kriminalë nga procesi zgjedhor, fushata dhe veçanërisht prania e tyre ditën e zgjedhjeve.

3- Duhet të ulet kostoja e fushatës zgjedhore në mënyrë drastike, të bëhet transparencë efikase e shpenzimeve dhe burimeve të financimit, të forcohen ndalimet për financimin dhe të forcohen penalitetet, përfshirë ato në Kod Penal dhe kategorizimin e shitblerjes së votës në krim të rëndë.

4- Të ndalohet rreptësisht përdorimi i burimeve njerëzore të administratës publike në fushatë si dhe të ndalohet rreptësisht përdorimi i burimeve materiale të administratës publike:

5- Garantimi i aksesit të drejtë në media dhe mbulimi mediatik, si dhe reduktimi e nominimi i hapësirës publicitare në fushatën zgjedhore.

Për tetë muaj me radhë, një 23-vjeçar është kthyer në makthin e një gruaje të martuar në Tiranë, duke iu qepur këmba-këmbës me kërkesën për një lidhje intime. E ndierë e frikësuar nga i riu, që ishte fqinj i saj, gruaja, nënë e dy fëmijëve të mitur, e ka kallëzuar atë në polici.

Kallëzimi i saj ka rënë në “vesh të shurdhër”, ndërkohë që “tmerri” i gruas nga fqinji, që i shkonte te vendi i saj i punës, e ndiqte në rrugë, apo i thyente xhamat e dritares vijonte.

Janë dashur të paktën pesë kallëzime të njëpasnjëshme të të dëmtuarës K. A. në Policinë e Tiranës, si dhe një kallëzim i vetë babait të 23-vjeçarit të quajtur Alban Hadëri, që ai të arrestohej dhe të vendosej para përgjegjësisë penale.

Gjykata e Tiranës ka përfunduar pak ditë më parë gjykimin ndaj tij për akuzën e “përndjekjes”. Ai u deklarua i fajshëm dhe u dënua me 1 vit heqje lirie.

Seria e kallëzimeve

Referuar vendimit të shpallur nga gjyqtari Erjon Bani, kallëzimi i parë i të dëmtuarës është regjistruar më 19 maj 2016. Ajo ka rrëfyer se punonte si shitëse dhe se gjatë orarit të punës dy fëmijët e mitur i kanë rrëfyer se fqinji i tyre, Alban Hadëri, u kishte thyer një xham të dritares.

“Ndihem e kërcënuar për vete dhe familjen”, ka thënë ajo, duke shtuar se 23-vjeçari ato ditë e kishte kanosur me fjalë të ndryshme dhe e kishte shtyrë. Po ashtu, ajo ka sqaruar se i kallëzuari vuante nga probleme mendore dhe se për veprimet e tij kishte vënë në dijeni edhe të atin e tij.

Më 13 qershor 2016, ajo ka kallëzuar të njëjtën gjë. Faktet janë konfirmuar dhe nga babai i të pandehurit, K. Hadëri, i cili ka thënë se ishte në dijeni të kallëzimit dhe se dy herë të tjera djali i tij i kishte thyer xhamat të dëmtuarës… Pas disa kallëzimesh të tjera, në kallëzimin e datës 22 korrik ajo ka thënë:

“Unë jam drejtuar mbi pesë herë në polici dhe hera fundit ka qenë para një muaji dhe se në Prokurori para dy muajve jam thirrur, por në të tëra rastet unë s’po marr zgjidhje dhe jam nën një terror psikologjik nga ky person, Alban Hadëri. Jam në terror për jetën dhe kërkoj ndërhyrje urgjente dhe ndihmë nga shteti”.

“Kërkon lidhje intime”

Në kallëzimin e 22 korrikut 2016, e dëmtuara K. A., ka rrëfyer para oficerëve të policisë se 23-vjeçari e përndjek për lidhje intime.

“Kallëzoj se kam kërcënime me jetë dhe përndjekje në çdo ditë të jetës sime nga shtetasi Alban Hadëri. Prej 8 muajsh e në vazhdim, ky person më ndjek nga pas dhe kërkon me çdo kusht që unë të krijoj lidhje intime me të. Unë jam munduar ta sqaroj dhe t’i bëj me dije se jam grua e martuar, kam dy fëmije të mitur dhe të më lërë të qetë, por person sërish nuk bindet. Unë jam drejtuar disa herë në polici, ku dhe kam depozituar kallëzim penal ndaj këtij shtetasi. Ai nuk merr vesh, dhe për faktin se ka probleme psikike me veten e tij”, citohej kallëzimi në vendimin e gjykatës, shkruan ‘Panorama’.

Më tej, ajo ka pohuar se atë ditë i pandehuri i ka shkuar te vendi i saj i punës.

“Unë nuk e kam takuar dhe i jam fshehur, pasi ai më ka sulmuar dhe shtëpinë me një tullë para disa kohësh”, vijohej në kallëzim. Sipas vendimit të Gjykatës, i pandehuri qëndron në masën e sigurisë “arrest në burg” që prej 24 korrikut 2016.