Ministri i Brendshëm Saimir Tahiri, komenton deklaratën e ministrit të Drejtësisë Ylli Manjani, lidhur me situatën e kanabisit në vendin tonë.

Në konferencën e përbashkët që mbajti mesditën e sotme me homologun austriak, Wolfgang Sobotka, ai u pyet lidhur me atë që Manjani deklaroi se në mbledhjen e qeverisë është diskutuar mbi problematikën e kanabisit dhe nëse për vitin 2017 ka ndonjë plan konkret për ta luftuar.

“Unë nuk jam komentator, jam ministër dhe kam detyrimin të bëj punën time më mirë për një Shqipëri më të drejtë, më të sigurtë dhe më të zhvilluar. Nuk kam dëshirë të komentoj komentet, aq më pak kur komentet janë nga një koleg tjetër i imi, i cili po si unë ka detyrën të bëjë sa më mirë detyrën. Punën tonë e vlerëson Kryeministri dhe mbi të gjitha e vlerëson dhe e gjykon publiku dhe qytetarët të cilët me plot të drejtë presin sa më pak fjalë dhe sa më shumë punë”, u shpreh Tahiri.

Ai shtoi më tej se ajo që është bërë në luftën kundër drogës bashkë me partnerët është prioritet maksimal dhe se Shqipëria do vazhdojë të bëjë akoma më shumë për një vend të denjë për shqiptarët.

Kryeministri Edi Rama në një takim me nxënësit më të mirë të programit për vlerësimin ndërkombëtar PISA, thotë se reforma në arsim është një mundësi e mirë për ndryshim tek të rinjtë.

Ai u tha të rinjve se sot ata do të vendosin që e ardhmja e tyre përmes dijes të jetë më e mirë dhe se e bën rezultatin shumë më tepër se sa një rezultat shkollor.

“Kushdo që qeverisi nuk mendoi për gjeneratën tjetër, por për zgjedhjet. Çfarë problemi ka, je pa punë? Shko në universitet u thuhej”, tha Rama, duke thënë se u thye një rekord botëror,

Arritjet e nxënësve më të mirë, ai i cilësoi si rezultate të jashtëzakonshme të vetëvendosjes individuale për të përballuar me dinjitet, sakrifica dhe punë të ndershme sfidën e të qenit nesër njerëz që do të kenë në dorë të vendosin si do të jetë e sotmja e tyre.

“Prandaj dua që ta dini shumë sinqerisht se ju jeni model frymëzimi për mua personalisht dhe gjithë ata që kanë zgjedhur të besojnë dhe shpresojnë se në këtë vend mund të bëhet sukses. Se suksesi nuk kalon nga kafja dhe lënia e orëve të mësimit, por se kalon nga vullneti i hekurt për t’ia dalë.  Rezultatet e vitit 2015, kanë qenë arsyeja për të marrë frymë i lehtësuar, për faktin se reforma jonë në arsim është provuar si gjëja e drejtë”, u shpreh Rama.

Ai shtoi se rezultatet e reformës duan kohë, vite, dhe se patjetër edhe reforma në arsim do duhet kohë të provohet në faktet reale të jetës përtej mureve të shkollës, si një nxitëse e pazëvendësueshme e një transformimi të madh ekonomik e social të Shqipërisë.

Ai citoi një shprehje të Nënë Terezës, duke thënë se “Në vend të mallkosh errësirën, ndiz një qiri”

Gjyqtarja Majlinda Andrea e cila është vënë nën hetim për ryshfetin prej 50 mijë euro, për një çështje që kishte në gjykim, kërkon gjykim të shkurtuar.

Ditën e sotme nëpërmjet avokatit Theodhori Sollaku gjyqtarja e pezulluar, bëri kërkesë në Gjykatën e Lartë, që të gjykohet në mënyrë të përshpejtuar. Pas kërkesës së bërë prej saj seanca u shty për në 17 janar.

Gjyqtarja Andrea dhe tre të pandehurit e tjerë Eleni Lino, Ilia Çabiri dhe Patraq Dashi i cili është cilësuar si sekser, kanë kërkuar gjykim të shkurtuar, ndërsa bashkëshorti i gjyqtares, Odhise Andrea, ka kërkuar proces gjykimi normal.

Kjo kërkesë e gjyqtares Andrea, vjen një ditë pasi Gjykata e Lartë vendos si masë sigurie “arrest me burg” për Odhise Andrean, bashkëshortin e saj.

52- vjeçari u vetëdorëzua në policinë e Tiranës mbrëmjen e së hënës. Andrea, i cili ka punuar si këshilltari i Komisionit të Sigurisë në Parlament, është bashkëshort i gjyqtares së gjykatës së Lartë, Majlinda Andrea.

Ai akuzohet se ka luajtur rolin e sekserit në një çështje të bashkëshortes së tij, ku akuzohen se kanë përfituar 50 mijë euro për të dhënë vendim pronësie.

Ndaj tij, Gjykata e Lartë në muajin korrik të vitit 2016, kishte caktuar masën e sigurisë “arrest me burg” nën akuzën korrupsionit pasiv, ndërsa bashkëshortja e tij u pezullua nga detyra.

Majlinda dhe Odhise Andrea u larguan nga Shqipëria vetëm pak ditë para publikimit të akuzave ndaj tyre.

Ata akuzohen për një rast ryshfeti me një shumë prej 50 mijë eurosh për një çështjesh pronash, e cila po shqyrtohej në Gjykatën e Lartë.

Prokuroria tha, Odhise Andrea shërbente si ndërmjetës midis palës paditëse dhe gjyqtares Andrea, e cila është dhe bashkëshortja e tij.

Prokuroria e Përgjithshme tha në atë kohë se Gjykata e Lartë mori vendim për pezullimin e gjyqtares Majlinda Andrea, e cila nëpërmjet bashkëshortit të saj dyshohet se ka marrë një shumë prej 50 mijë eurosh për influencuar në vendimin, ky gjyqtarja ishte anëtare e trupit gjykues.

Ilia Çabiri, Petraq Dashi dhe Eleni Lino dyshohet se i kanë paguar gjyqtares Majlinda Andrea shumën për të dhënë një vendim në favor të tyre në një proces njohjeje prone, që ishte në gjykim pranë Gjykatës së Lartë.

Shuma prej 50 mijë eurosh i është dorëzuar Odhise Andreas, bashkëshortit të gjyqtares.

Nga veprimet hetimore rezulton se i dyshuari Ilia Çabiri nga Saranda, në cilësinë e përfaqësuesit të një familjeje ish-pronare, ka zhvilluar disa procese gjyqësore për njohjen e një sipërfaqeje toke rreth 40 hektarë, në zonën e Butrintit.

Kryeministri Edi Rama pak para mesditës së sotme ka shkuar në Kryesinë e Kuvendit për të takuar aleatin bashkëqeverisës Ilir Meta.

Takimi mes tyre ka nisur pak pas orës 11.30, në zyrën e kreut të Kuvendit.

Ky është takimi i parë mes Ramës dhe Metës për vitin që sapo ka nisur, i cili është edhe viti i zgjedhjeve parlamentare.

Ndërsa kreu i qeverisë është shprehur i hapur se Partia Socialiste dëshiron të dalë në zgjedhje në koalicion me Lëvizjen Socialiste për Integrim, kreu i saj, Ilir Meta, nuk ka dalë ende me qëndrim

Ndërsa zgjedhjet po afrojnë, komisioni i posaçëm për reformën zgjedhore ka intensifikuar punën për përcaktimin e rregullave në bazë të të cilave do të organizohet procesi i votimit më 18 qershor.

Bashkëkryetari i komisionit, socialisti Taulant Balla, tha ditën e sotme gjatë një forumi të shoqërisë civile se, Partia Socialiste është kundër listave të hapura.

Në vijim ai nënvizoi se partia që ai përfaqëson nuk është kundër numërimit elektronik.

“Ne dhe LSI nuk jemi kundër numërimit elektronik. Për listat e hapura duhet një libër me 66 faqe për zgjedhësit. Personalisht jam pro sistemit mazhoritar. Për listat e hapura do të jetë problem numërimi i votave. Do të mungonin gratë nëse do të kishim listat e hapura”, deklaroi Balla.