E kush nuk u mërzit për ndarjen e Muhammad Ali nga jeta? E tillë është edhe këngëtarja Linda Morina, por me një ndryshim të vogël. Ajo ka ngatërruar boksierin Muhammad Ali me Mike Tyson. Kështu, Linda i ka dhënë lamtumirën njeriut të gabuar.

Sigurisht, kaq ka mjaftuar që ajo të bëhet objekt talljeje dhe ironie, por këngëtarja duket se është njeri pa komplekse. Ajo nuk e ka fshirë postimin me foton e Mike Tyson, por ka bërë një status tjetër ku e krahason veten me Muhammad Ali.

Ndoshta do e keni pak të vështirë për ta kuptuar statusin në fjalë sepse, duhet thënë, Linda shkruan një shqipe “perfekte”.

“Edhe un do te mes ne histori si Muhamet Alija. Vepra jeme sdo te harrohet me shekjujt te tan. Fansat e mij nuk do te desin astenihere”, shkruan ajo në Facebook. (jetaoshqef / r.a) 

Burimi : / Javanews.al

Zbardhen detaje të reja nga vrasja e biznesmenit Vasil Biba, i cili u gjet i vrarë dhe i groposur në Malin e Dajtit rreth 4 muaj më parë.

Ndërtuesi, sipas Policisë, është rrëmbyer në afërsi të rrugës “5 Maji” në Tiranë nga të paktën 3 persona, në fund të dhjetorit 2015.

Ai është futur me forcë në një makinë tip “Range Rover” nga shtetasi Bledar Mneri, i shpallur në kërkim si i dyshuari kryesor i vrasjes, bashkë me dy persona të tjerë, emrat e të cilëve nuk bëhen publikë nga policia. Me këtë mjet ai është transportuar në drejtim të Priskës, në Dajt, ku edhe është vrarë dhe më pas është groposur në zonën e Zabelit.

Burime nga grupi hetimor thanë se në këtë mënyrë është bërë rindërtimi i ngjarjes, për të cilën pritet të ketë edhe arrestime të tjera. I vetmi moment që ka mbetur ende i pasqaruar është vendi i vrasjes. Edhe pse burimet thanë se ka dyshime të forta se 36-vjeçari Vasil Biba mund të jetë ekzekutuar me dy plumba në makinë, në momentin që është dërguar në Malin e Dajtit dhe më pas atje e kanë varrosur.

Makina tip “Range Rover” e përdorur për këtë krim, tashmë është e sekuestruar nga Policia e Tiranës dhe ekspertët kriminalistë kanë nisur ekzaminimin për gjetjen e provave shkencore. Mësohet se dy personat e tjerë, të identifikuar dhe shpallur në kërkim nga Policia, dyshohet se kanë bashkëpunuar me 32-vjeçarin Bledar Mneri për rrëmbimin dhe vrasjen e biznesmenit nga Pogradeci.

Nga hetimet dyshohet se motivi i ekzekutimit të Vasil Bibës ka qenë mashtrimi në fushën e ndërtimeve dhe shuma të mëdha parash që ai nuk ia kishte kthyer Mnerit.

AUTORI NE KERKIM

Që prej datës 11 maj të këtij viti, kur Policia e Tiranës bëri të mundur identifikimin e autorit të vrasjes së biznesmenit Vasil Biba, i dyshuari Bledar Mneri vijon t’i shmanget Drejtësisë dhe është person i shpallur në kërkim.

Mneri u shpall në kërkim menjëherë pasi Gjykata e Tiranës caktoi ndaj tij masën e sigurisë “arrest me burg” në mungesë, pas kërkesës së Prokurorisë. Burime nga grupi hetimor thanë se Bledar Mneri rezulton të jetë larguar nga Shqipëria që prej datës 16 shkurt të këtij viti, menjëherë sapo në media u dha lajmi për identifikimin e kufomës së gjetur në Malin e Dajtit, më 14 shkurt.

Fillimisht mësohet se ai ka udhëtuar drejt Holandës e nga aty më pas ka shkuar në Gjermani. Policia ka gjurmuar të gjitha lëvizjet e tij, ndërsa, sipas informacioneve të siguruara në rrugë operative, momentalisht ka dyshime se ai fshihet në banesën e disa shqiptarëve në Holandë.

Nisur nga këto të dhëna, autoritetet shqiptare kanë nisur një letërporosi drejt Holandës, me qëllim arrestimin e këtij personi për llogari të Drejtësisë shqiptare. Më herët një letërporosi u ishte dërguar edhe autoriteteve gjermane. Ndërsa mësohet se ka nisur një bashkëpunim mes Interpol Tiranës dhe oficerëve të Europol, për të bërë të mundur arrestimin e 32-vjeçarit Bledar Mneri.

Panorama/d.i.

Burimi : / Javanews.al

Në vitin 1242, papritur, hordhitë mongole vendosën që të ktheheshin sërish në tokat e tyre dhe të braktisnin misionin e nisur, pushtimin e Hungarisë, e më pas të territoreve të tjera të Europës, duke çliruar kontinentin e vjetër nga një makth i madh. Një nga ushtritë pushtuese më të tmerrshme të të gjitha kohërave, nuk ia doli të triumfonte, në Europë.

Koha e keqe ogurzezë mund të ketë ndihmuar në përballimin dhe më pas tërheqjen e ushtrive mongole të pandalshme, të cilat kishin për qëllim pushtimin e Europës dhe kishin arritur që të përparonin deri në qendër të saj.

Në vitin 1242, hordhitë mongole vendosën që të ktheheshin sërish në tokat e tyre dhe të braktisnin misionin e nisur, pushtimin e Hungarisë, e më pas të territoreve të tjera.

I këtij mendimi është historiani italian Nicola Di Cosmo, i cili jep mësim në Institutin për Studime të Avancuara të Princeton-it. Tezën e tij ai e botoi në një artikull i cili u publikua në “PNAS”.

Prova të kryqëzuara

Së bashku me klimatologun Ulf Buntgen, të “Swiss Federal Research Institute” të Birmensdorf-it në kantonin e Cyrihut, Di Cosmo rindërtoi historinë meteorologjike nga periudha e përparimit në Europë të luftëtarëve të Khan-it, duke u bazuar në dokumente historike me dëshmitë klimatike, të cilat janë nxjerrë nga kampionet e bimëve të dushkut dhe të pishave siberiane, shkruan shqip.

Një sërë motivesh

Për disa historianë, ndalimi i papritur i mongolëve gjatë avancimit në Europën Qendrore erdhi për shkak të arsyeve politike. Një nga ato është vdekja e Ögödei-t, birit të tretë të Gengis Khan-it. Por të tjerë mendojnë, për shkak të rezistencës së fortë të kështjellave të fortifikuara të Hungarisë dhe të Kroacisë. Por një tjetër faktor mund ta ketë shpëtuar Europën nga bastisjet e tyre të egra dhe sundimi i mongolëve.

Të fortë dhe me barkun plot

Kuajt e luftëtarëve nomadë ushqeheshin me barin e ultësirave euroaziatike. Në nisje të vitit 1200, temperaturat veçanërisht të ngritura në ato territore kishin ndikuar për të gjelbëruar luginat, duke garantuar rezerva ushqimore të mëdha të kalorësisë dhe që mbështeste suksesin ushtarak të trupave.

Pa ushqim

Më pas, në vitin 1241, mongolët arritën ultësirat në kufijtë perëndimore të Hungarisë. Të udhëhequr nga nipi i Gengis Khan-it, Batu-ja, ata thyen ushtritë polake dhe hungareze. Por nuk i kishin bërë llogaritë me lehtësinë e përmbytjes së atyre territoreve. Dimri i ashpër i vitit 1242, i konfirmuar nga “kujtesa klimatike” e pemëve hungareze, solli përmbytje masive të atyre ultësirave, duke i transformuar në moçale gjigante dhe duke iu hequr kuajve burimin fillestar të ushqimit. Dokumentet historike e konfirmojnë këtë hipotezë të hedhur, duke treguar për shembull që hordhitë hoqën dorë nga sulmi ndaj një kështjelle hungareze sepse ishin të rrethuar nga kënetat.

Larg që këtu

Kështu, luftëtarët u tërhoqën duke kaluar nëpër rrugë më të thata, duke përshkuar Bullgarinë dhe duke shkatërruar gjithçka që u dilte përpara. Sipas studiuesve të tjerë, edhe pse duhet treguar kujdes në lidhje me këtë hipotezë, faktet e paraqitura nga dy kërkuesit, të bëjnë që ai të merret në konsideratë. Ndoshta mund të mos jetë e vetmja, por gjithsesi ngelet mjaft bindëse.

Detaj

Për disa historianë, ndalimi i papritur i mongolëve gjatë avancimit në Europën Qendrore erdhi për shkak të arsyeve politike. Një nga ato është vdekja e Ögödei-t, birit të tretë të Gengis Khan-it. Në nisje të vitit 1200, temperaturat veçanërisht të ngritura në ultësirat euroaziatike, kishin ndikuar për të gjelbëruar luginat, duke krijuar rezerva ushqimore të mëdha

Burimi : / Javanews.al