Një tjetër kapitull nis për Kombëtaren shqiptare dhe këtë herë me një emër të ri në krye të pankinës. Rolando Maran ka bërë zgjedhjet e tij për katër përballjet e para të UEFA Nations League, ndaj Bjellorusisë, San Marinos dhe Finlandës
Në listen prej 29 lojtaresh te thirrur shfaqen edhe dy emra të rinj. Sabah Kerjota, mesfushori i Hearts, merr për herë të parë ftesën me Kombëtaren A, ndërsa Samuele Sina, mbrojtësi i Union Brescia, është risia tjetër.
Rey Manaj, Ernest Muçi dhe Marash Kumbulla rikthehen pas dëmtimeve që kaluan, ndërsa një tjetër emër me eksperiencë është Etrit Berisha.
Në krahun tjetër, ka edhe emra që këtë herë nuk janë pjesë e listës. Thomas Strakosha mungon, ndërsa nuk janë grumbulluar as Armando Broja dhe as Nedim Bajrami. Këto zgjedhje i japin një tjetër pamje grupit të Maranit, i cili duket se po kërkon të zgjerojë alternativat dhe të krijojë konkurrencë në çdo repart.
Sfida e parë do të jetë në shtëpi, më 26 shtator, ndaj Bjellorusisë. Vetëm tri ditë më vonë kuqezinjtë udhëtojnë drejt San Marinos, ndërsa më 3 tetor përballen me Finlandën në transfertë. Cikli mbyllet më 6 tetor, sërish në Tiranë, me San Marinon.
Grumbullimi nis të hënën, më 21 shtator. Katër ndeshje në vetëm dhjetë ditë, një kalendar intensiv që do t’i japë Maranit mundësinë e parë për të treguar se çfarë Shqipërie kërkon të ndërtojë.. Objektivi mbetet i qartë: vendi i parë në grup.
Njoftimi i FSHF
Trajneri Rolando Maran shpall listën për katër ndeshjet e UEFA Nations League, dy debutues dhe rikthime në skuadër
Kombëtarja shqiptare do të nisë rrugëtimin e saj të ri në kompeticionin UEFA Nations League, me katër ndeshjet e para ndaj Bjellorusisë, Finlandës dhe San Marinos, me të cilën do të përballet në dy takime.
Trajneri i Kombëtares, Rolando Maran, ka publikuar listën me 29 lojtarët e grumbulluar për këto sfida. Në listë bëjnë pjesë edhe dy emra që marrin ftesën e parë me Kombëtaren, mesfushori i Hearts, Sabah Kerjota dhe mbrojtësi i Union Brescia, Samuele Sina.
Ndërkohë, në skuadër rikthehen pas mungesave për shkak të dëmtimeve Rey Manaj, Ernest Muçi dhe Marash Kumbulla. Në listë është edhe portieri Etrit Berisha, i cili rikthehet të jetë pjesë e grupit të Kombëtares.
Më poshtë lista e plotë e lojtarëve të grumbulluar:
Portierë: Etrit Berisha, Alen Sherri, Mario Dajsinani dhe Simon Simoni.
Mbrojtës: Berat Gjimshiti, Ardian Ismajli, Marash Kumbulla, Klisman Cake, Samuele Sina, Mario Mitaj, Naser Aliji, Stavro Pilo, Elseid Hysaj dhe Ivan Balliu.
Mesfushorë: Kristjan Asllani, Ylber Ramadani, Juljan Shehu, Qazim Laçi, Luis Hasa, Adrion Pajaziti, Arbër Hoxha, Taulant Seferi, Anis Mehmeti, Ernest Muçi dhe Sabah Kerjota.
Sulmues: Rey Manaj, Mirlind Daku, Myrto Uzuni dhe Cristian Shpendi.
Kombëtarja shqiptare nis zyrtarisht grumbullimin ditën e hënë, më 21 shtator, ku do të stërvitet në “Shtëpinë e Futbollit”. Biletat për dy ndeshjet ndaj Bjellorusisë dhe San Marinos mund t’i blini online në ebileta.al, si edhe në pikën fizike pranë stadiumit “Air Albania”.
