19 efektivë policie, një qytetar dhe deputeti demokrat Beldjon Nallbati mbetën të plagosur gjatë protestës së djeshme të PD në kryeqytet.

Por protestën e cila u mbyll me akte dhunë, molotovë dhe fishekzjarrë, Sali Berisha e cilësoi sot gjatë konferencës për mediat si një kryengritje paqësore.

“Protestuesit meritojnë mirënjohjen më të pakufishme, nderimin më të madh, të cilët dje me kryengritjen paqësore i zbardhën faqen Shqipërisë. Shënuan një kapitull të ri, në kryengritjen paqësore të popullit shqiptar kundër narkoregjimit të Edi Ramës”, tha Berisha.

Berisha tha me tej se Edi Rama kishte përgatitur “skenar gjakderdhjeje dhe ekzekutimi të protestuesve”.

“Të tmerruar nga urtia dhe qëndrueshmëria e protestuesit, Edi Rama kishte përgatitur skenarin e gjakderdhjes, ekzekutimin e protestuesve paqësorë në shesh. Për këtë qëllim kishte vënë në krye të banditëve me uniformë, kriminelin Sokol Bizhga. Urdhëroi sjanpër të qëllojnë tre protestues, katër më falni, katër… të cilët në mënyrë absolute nuk po kryenin asnjë veprim ndaj policëve të rendit. Goditja me plumba gome në kokë provohet në të shumtat e rasteve vdekjeprurës. Dhuna e egër e banditëve nuk kurseu as deputetë. U vërsulën me urdhër dhe goditën Bledjon Nallbatin, i cili nuk po kryente asnjë veprim”, tha më tej Berisha.

“Ky urdhëroi snajperët të qëllojnë katër protestues, të cilët në mënyrë absolute nuk po kryenin asnjë veprim ndaj policëve të rendit. Jo. Ilir Tufi, protestues i vazhdueshëm në protestat tona, po filmonte, në një kohë kur e godasin snajperët në ballë. Goditja me plumba gome në kokë provohet në të shumtën e rasteve vdekjeprurëse. Tjetër, Luan Lleshi i goditur edhe ai pa asnjë motiv. Demë Dollapi, i goditur edhe ai në kokë. Me plagë. Dhe një zonjë. Pra, janë katër protestues të plagosur, të qëlluar tre prej tyre në kokë, me qëllim eliminimin fizik të tyre”, u shpreh Berisha.

Përfaqësuesit e mazhorancës me në krye Edi Ramën që deri më dje përbetoheshin si “dashnorë” të drejtësisë e që nuk komentonin çështje të saj, prej ditës së sotme janë derdhur nëpër ekrane.

Kanë vetëm një mision; të mbrojnë Belinda Ballukun në aferën e saj përballë drejtësisë. Edhe pse debatin tentojnë ta maskojnë si një çështje të jurisprudencës dhe thellësisht kushtetuese, në fakt ata janë në media për hallin e Ballukut dhe Ramës.

Kjo kthesë e papritur nuk është aspak rastësi, por një urdhër politik i Edi Ramës. Siç mëson Lapsi.al nga radhët e deputetëve të PS, sot në mbledhjen e grupit parlamentar, Edi Rama kërkoi prej deputetëve të tij të mos ishin pasivë në këtë situatë.

Ai ju tërhoqi vëmendjen të vetëve, sidomos figurave që janë me përvojë, për të dalë në mbrojtje të Ballukut në betejën e saj me drejtësinë. Përbetimet e kryeministrit si “dashnor” i drejtësisë janë një vegim i së shkuarës.

Belinda Balluku e ka tërhequr në batakun e saj në një përballje frontale me SPAK që kërkon “kokën” e zëvendëskryeministrës, tashmë të pezulluar pas vendimit të Gjykatës Kushtetuese.

Po të shihje sot prej mesditës dhe deri vonë në mbrëmje në disa ekrane u shfaqën befas si kërpudha përfaqësues të PS-së e të qeverisë, në një përpjekje të dëshpëruar për të mbrojtur Ballukun.

Kishte kohë që përfaqësues të PS nuk dilnin nëpër studio televizive. Aq më tepër të flisnin për cështje që kanë të bëjnë me drejtësinë. Por Rama nën presion të fortë nga Balluku ka ndryshuar strategji. PS si një kazermë ushtarake nën thundrën e tij, tashmë so të marrë në mbrojtje Ballukun.

Vetë Rama sot e dha sinjalin që nuk do ta lëshojë imunitetin e saj duke u bërë zyrë avokatie për numrin dy të qeverisë. BE nga ana tjetër dha sinjalin e qartë se kjo është vijë e kuqe dhe mund të ketë pasoja për Shqipërinë.

Për të intensifikuar daljet mediatike të deputetëve, Rama prezantoi në mbledhjen e grupit të PS-së këshilltaren e tij të re, Jonida Shehu, fjala e së cilës tha ai, është njësoj sikur t’u ketë folur vetë kreu i mazhorancës.

Me çehre të prishur dhe e heshtur totalisht ishte shfaqur në mbledhje edhe vetë e pandehura Belinda Balluku, e cila njësoj si Rama plot me dëshpërim kërkonte herë “armiq” brenda radhëve dhe herë “argatë” që janë të gatshëm t’i vënë fytyrën mbrojtjes së aferës së saj me drejtësinë. /LAPSI.al

Kryetari i Bashkisë Rrogozhinë, Edison Memolla, ka reaguar publikisht pasi u shpall fajtor dhe u arrestua për korrupsion në zgjedhje. Në një mesazh drejtuar mbështetësve dhe qytetarëve, ai e cilëson veten “të burgosur politik”, ndërsa shprehet se do ta ndjekë çështjen deri në Gjykatën Europiane për të Drejtat e Njeriut në Strasburg.

Ai deklaron se kushtet në të cilat ndodhet nuk janë ato që priste nga drejtësia, për të cilën thotë se ka luftuar, ndërsa shton se “lufta nuk mbaron këtu” dhe se do të përdorë çdo mundësi ligjore për të fituar pafajësinë.

REAGIMI

Së pari, falenderoj me zemër çdo mik/e, shok/shoqe, koleg/e, mbështetës/e, qytetar/e dhe familjarë për mbështetjen e pakufijshme që më keni dhënë nga dhjetori i vitit 2020 e deri më sot, bashkë kaluam sfida përtej asaj çfarë mendonim se ishim të aftë të përballonim por sot fjalët për të përmendur arritjet tona mendoj që janë të tepërta pasi kush ka pasur sadopak besim dhe dëshirën e mirë, ka parë transformimin dhe ‘luftën’ e pastër që të gjithë bashkë kemi bërë krah për krah për të bërë më të mirën për qytetin tonë.

Së dyti, kushtet në të cilat flas nuk janë absolutisht ato që prisja nga vetja ime dhe nga drejtësia për të cilën kam luftuar fort, por mesa duket tentakulat e gjyqtarëve kundërshtarë politik, shtrihen më gjerë sesa besimi dhe forca që ka drejtësia e re, ama lufta ime nuk mbaron këtu, do përdor çdo mundësi ta fitoj të drejtën time deri në Stasburg.

Së treti, fjala merr dhenë më shpejt se era dhe përveçse flitet se këtë situatë e kam “peshqesh” nga kundërshtarë politik, nuk më pëlqen aspak ideja që diskutimi zgjerohet duke thënë që “peshqeshi” vjen nga rradhët e partisë socialiste qoftë brenda qytetit apo më lart. Miqtë e mi, me Partinë Socialiste dhe kryeministrin Edi Rama në krye, në Rrogozhinë, kemi fituar pesë palë zgjedhje, qytetarët na besuan plot pesë herë për aq kohë sa kam qenë drejtues apo kandidat, nëse do kishte sulme personale, askush s’do më kishte lejuar të ushtroja këtë “pushtet” me të gjithë ju përkrah nëse punët do ishin ndryshe nga çfarë janë, unë jam socialist dhe i tillë do mbetem dhe ju duhet të siguroheni që me ose pa mua të qëndroni të bashkuar, mos lejoni as kundërshtarët politik dhe as njëri tjetrin që t’ju distancojë nga qëllimi final, këto s’janë vetëm fjalët e një të burgosuri por janë fjalët e dikujt që njeh çdo rrënjë, degë apo gjethe të familjes së madhe socialiste.

Së katërti, sulmet personale, politike madje edhe familjare kanë qenë të njëpasnjëshme që në momentin që kam futur këmbët në zyrën e kryetarit të bashkisë Rrogozhinë dhe kam pasur bindjen që janë normale por të sulmohem dhe të burgosem sa kam ndihmuar dikë në nevojë, e kam shprehur dhe do ta them sërish…sa herë të kem mundësi t’i qëndroj pranë dikujt në vend që ta “gjunjëzoj” përballë vështirësive të jetës, çdo herë do kisha bërë të njëjtën sjellje për ta ndihmuar, qoftë kjo për energjinë elektrike apo nevoja të tjera jetësore. Kryetarllëku ikën e vjen po dashtë zoti jeta do të jetë shumë më e gjatë sesa kaq.

Së pesti, do ketë plot që do mërziten sikundër do jenë të shumtë dhe ata që janë gëzuar për gjendjen ku ndodhem, kam dy fjalë edhe për këtë…ndoshta do quhem i korruptuar, ndoshta hajdut, ndoshta i pabesë, ndoshta zaptues i asaj karrigeje, ndoshta do përflitem që mora apo lash stafetë kur ndërkoh aty vendoset ai që populli dhe drejtuesit mendojnë të aftë, ndoshta quhem si dikush që i ka rënë dikujt kot në qafë, mund të hidhet vrer mbi mua apo dhe ndaj familjes time, këto janë fjalë që do thuhen qofsha un më i miri apo më i keqi drejtues që ka qenë në krye të atij institucioni por dëshira e mirë dhe të kem dinjitetin tim të paprekur kanë qenë gjithnjë udhëheqësit e mi kryesor.

Së fundmi, qyetarëve i uroj përzemërsisht të kenë shëndet, mbarësi dhe dashuri në familjet e tyre. Mbështetësve i them besojnë fort që më e mira është përpara, fati bëri një lojë tjetër me mua dhe vendosi që të vuaj dënimin në një institucion për të cilin u bë “molla e sherrit” në “kulmin” e karrierës sime por siç kuptuam edhe atëherë, fundi mund të jetë afër por shpresa për më mirë nuk ka asnjëherë fund. Vazhdoni të besoni dhe të luftoni për idealet tuaja, pavarësisht pengesave që do dalin para. Dhe e fundit edhe më e rëndësishme, i them familjes dhe të afërmve të mi që të rrijnë me kokën lart, Edisoni juaj është i burgosur por nuk është kriminel, Edi juaj as nuk ka vrarë, as nuk ka prerë dhe as nuk ka vjedhur, ju s’keni gabuar askund ndaj mos u mërzisni, është thjeshtë një sfidë tjetër të cilën do ta kalojmë të gjithë bashkë me miq e shokë zemre pranë. Për të gjithë…nuk është një lamtumirë por vetëm një mirupafshim për një kohë të caktuar, zoti ju bekoftë! Me respekt, Edison Memolla!

Edi Rama ka reaguar lidhur me protestën e mbajtur një natë më parë nga Partia Demokratike para Kryeministrisë ku kërkohej largimi i tij pas skandaleve që përfshinë qeverinë.

Përmes një postimi në rrjetin social ‘X’ të cilin e shoqëron me një foto të bombave molotov të përdor nga protestuesit e opozitës, Rama i tërbuar e ka cilësuar Berishën si një 80-vjeçar të damkosur dhe lajthitur.

“Këto janë bombat artizanale me të cilat janë sulmuar dhe djegur e plagosur mbrëmë punonjësit e policisë, nga e vetmja parti politike në botën demokratike që ushtron dhunë dhe e dyta në historinë e botës së tërë – pas asaj të famëkeqit Robert Mugabhe të Zimbabves – që i shkon mbrapa një tetëdhjetë e kusur vjeçari të damkosur e të lajthitur! Uroj që drejtësia të bëjë drejtësi për policët e plagosur dhe të ndëshkojë pa ngurrim bartësit e këtyre armëve me kapacitet vdekjeprurës! Sa për fatin politik të këtij cikli të ri jashtënxjerrjesh në bulevard, ai do të shkruhet si zakonisht në zgjedhjet e vitit të ardhshëm me një disfatë ende më shembullore se sa të mëparshmet, ndërkohë që ne do të vazhdojmë pa u ndalur rrugën drejt Shqipërisë 2030 në Bashkimin Europian”, shkruan Rama.