Në pikën kufitare të Kakavijës janë krijuar rradhë të gjata, pas fluksit të krijuar nga emigrantët të cilët po kthehen sërish në Greqi, pasi festuan Pashkët në vendin tonë.

Nisma Thurje ka publikuar një foto të dërguar nga një emigrant shqiptar i cili shkruan:

Ajo qe nuk ka ndryshuar kurre për 25 vjet rresht jane oret pa fund në radhë në Kakavijë (greku).

Harram vota e e emigrantëve për të gjithë POLITIKANËT e këtyre 25 vjetëve që nuk bënë as interesimin më të vogël për ne.

Kuvendi do të mblidhet në orën 18 në një seancë të jashtëzakonshme për të votuar përbërjen e komisionit ‘ad hoc’ që do të përzgjedhë kandidatët e Vetingut.

Mazhoranca ka zbardhur në mesditë, emrat e anëtarëve që ka propozuar për dy komisionet ‘ad-hoc’ të Vetingut, komisionet që do të verifikojnë kandidatët për institucionet e Vetingut.

Partia Socialiste ka propozuar, Vasilika Hysin, Pandeli Majkon, Ervin Bushatin, Bashkim Finon, Ulsi Manjan dhe Evis Kushin.

Lëvizja Socialiste për Integrim ka propozuar Silva Cakën, Vangjel Tavon dhe Luan Ramën kurse PDIU ka propozuar Shpëtim Idrizin dhe Mesila Dodën.

Një operacion tre ditorësh i policisë rrugore ka përfunduar me 5200 gjoba për përdorimin e celularit gjatë drejtimit të mjetit, parakalim të gabuar dhe për mosvënien e rripit të sigurimit.

Në një komunikatë për shtyp, policia e Shtetit bëri me dije se 481 gjoba janë vënë për mosvendosjen e rripit të sigurimit, 716 për përdorimin e celularit gjatë drejtimit e parakalim i gabuar.

Më tej policia shtoi se janë pezulluar 169 leje drejtimi dhe janë arrestuar 20 drejtues mjetesh.

9 nga 10 të arrestuarit për laboratorin e kanabisit të gjetur në Shkozë, janë lënë të lirë nga Gjykata e Tiranës.

Në burg ka mbetur vetëëm Gerald Bilmani, i cili është dhe personi që ka marrë me qera ambientin.

7 nga të ndaluarit i’u është dhënë masa e sigurisë detyrim paraqitje, ndërkohë për Arjan Kadarenë dhe Ramazan Loshën masa e sigurisë arrest shtëpie.

Laboratori në Shkozë u zbulua të premten gjatë një aksioni të Komisariatit numër 1 në Tiranë, dhe në të u gjetën të mbjella rreth 1700 rrënjë dhe 46 kilogramë kanabis.

Shfryhet buja e dosjes së mëse 500 kilogramëve hashash me të pandehur Lutfi Shabanin i njohur ndryshe si Ben Çami.

Me kërkesë të organit te akuzës, një vit më parë gjykata vendosi ndaj Shabanit “arrest me burg” për dyshimet se kishte organizuar trafikimin e ngarkesës me drogë nga Shqipëria drejt Turqisë.

Por tashmë ky qëndrim i organit të akuzës ka ndryshuar, Lutfi Shabani do të përballet me gjykatën për veprën e mos kallëzimit të krimit.

Ndërkohë që akuza e trafikut të narkotikëve u ka ngelur vetëm dy transportuesve të kësaj ngarkese, shtetasve Eldi Zahiri dhe Janaq Kaceli. Ky i fundit, në seancën e parë, e shfaqi pakënaqësinë ndaj hetimeve të Prokurorisë.

“Avash mor burrë se nuk jam Bin Laden unë, s’duhet të më bije mua këtu”, tha para gjykatës i paraburgosuri Janaq Kaceli.

Prokuroria shpjegon në lehtësimin e akuzës për Lutfi Shabanin se i pandehuri kishte dijeni që personi me emrin Lenci dispononte sasira droge.

Sipas Prokurorisë, Shabani ndërmjetësoi që personi, i cili nuk dihet ende se kush është, të lidhej me dy transportuesit, njëri prej të cilëve shofer dhe tjetri pronar i kamionit. Por sipas Prokurorisë, i pandehuri Shabani nuk mund të akuzohet për trafik pasi ai ka qenë në dijeni të krimit që po kryhej dhe nuk e ka kallëzuar atë pranë organeve të ndjekjes penale. Avokati i tij Detar Hysi shmangu të përgjigjej se përse ndryshoi kualifikimi i veprës.

Lutfi Shabani ka dalë përpara drejtësisë edhe në dy raste të tjera për trafik heroine, por ja ka dalë mbanë t’i mbyllë llogaritë me të shumë shpejt.

Policia e Shkodrës ka vënë në pranga 2 persona pasi dyshohen se në ngjarjen e ndodhur më datë 16.04.2017, rreth orës 03:00, në lagjen Tom Kola, në vendin e quajtur “Dugajt e Reja”, kanë qëlluar me armë një automjet tip Benz, me targë AA487AN. Sipas të dhënave mjeti ka qënë i parkuar dhe është në pronësi të shtetasit N. L, 51 vjeç, banues në lagjen Skëderbeg.
Policia njofton se si pasojë është dëmtuar xhami i parë, si dhe është qëlluar me armë zjarri pistolete xhami i pasëm i automjetit, dhe nga veprimet e para proceduriale të kryera, rezultoi se:

Në vendin e ngjarjes janë gjetur dhe sekuestruar në cilësinë e provës materiale 5 gëzhoja model 54 kalibri 7.62 mm, automjeti i dëmtuar dhe automjeti AA740GN, që është në përdorim nga shtetasi Zef Sokoli dhe dyshohet se është përdorur nga autorët e ngjarjes.

Në lidhje me këtë rast si autorë të dyshuar u arrestuan shtetasit:

Zef Sokoli, 24 vjeç, banues në fshatin Grude e Re, Shkodër, për veprat penale “Prodhimi dhe mbajtja pa leje e armëve luftarake dhe e municionit“, “Prishje e qetësisë publike”, “Kanosje”, “Shkatërrim Prone“, kryer në bashkëpunim të parashikuara nga nenet 84 , 150 , 274 , 278 , 25 të Kodit Penal.

Valentin Ndreu, 23 vjeç, banues në fshatin Grude e Re, Shkodër, për veprat penale “Prodhimi dhe mbajtja pa leje e armëve luftarake dhe e municionit“, “Prishje e qetësisë publike”, “Kanosje”, “Shkatërrim Prone “, kryer në bashkëpunim të parashikuara nga nenet 84 , 150 , 274 , 278 , 25 të Kodit Penal.

Gjithashtu u bë shpallja në kërkim e shtetasit:

K. D, 24 vjeç, banues në lagjen “Skenderbeg“, Shkodër, për veprat penale të “Prodhimi dhe mbajtja pa leje e armëve luftarake dhe e municionit” , “Prishje e qetësisë publike” , “Kanosje”, “Shkatërrim Prone“ e kryer në bashkëpunim dhe “Kundërshtimit të punonjësit të rendit publik”, të parashikuara nga nenet 84 , 150 , 274 , 278 , 25 e 236 të Kodit Penal.

Ky shtetas ka qënë në statusin e të shoqëruarit dhe ka arritur të largohet forcërisht nga ambjentet e Komisariatit të Policisë Shkodër.

Nga ana e Policisë po vijon puna për kapjen e tij.

Ngjarja ka ndodhur për motive të dobëta pasi autorët e dyshuar kanë debatuar me dy persona të paidentifikuar ende.

Materialet i kaluan Prokurorisë së Rrethit Gjyqësor Shkodër për veprime te mëtejshme.

Gjithashtu për këtë rast, ku janë shkelur procedurat standarte për ruajtjen dhe shoqërimin e shtetasve në ambjentet e Policisë, kanë filluar hetimet nga Drejtoria Vendore Policisë Shkodër, nga Drejtoria e Standarteve Tiranë pranë Drejtorisë së Policisë Shtetit, si dhe SH. Ç. B. A.

U përgatit urdhëri i pezullimit disiplinor për 2 punonjësit e policisë dhe filloi ecuri e rëndë disiplinore për 4 punonjësit e tjerë.