Deputeti me mandat të ndërprerë, Shkëlqim Selami ka ankimuar sot në Gjykatën Administrative vendimin e KQZ, duke kërkuar shfuqizimin e vendimit për shkelje të dekriminalizimit.

Shkëlqim Selami, thotë se nuk paragjykon vendimin e KQZ-së, por do të kërkojë të drejtën e tij në të gjitha shkallët e gjyqësorit siç ia garanton ligji.

Selami thotë se KQZ nuk e ka shqyrtuar çështjen e tij në themel. Ai thekson se, akuzohet për një çështje të pushuar nga Italia, vendi që edhe ka ngritur akuzën.

Të njëjtën rrugë ka ndjekur edhe Dashamir Tahiri, i cili ka bërë ankimim pranë Kolegjit Zgjedhor. Avokati i deputetit, Fatmir Braka thotë për  se ankimimi është bërë më 30 dhjetor.

“Ankimuam në Kolegjin Zgjedhor heqjen e mandatit të deputetit Tahiri që më 30 dhjetor. Shumë shpejt do ta ankimojmë çështjen edhe në Gjykatën Administrative. Ligji nuk e ka të qartë se ku duhet të bëjmë ankimimin për këtë çështje”.

Komisioni Qendror i Zgjedhjeve i hoqi mandatin Selamit dhe Tahirit më 29 dhjetor të vitit të shkuar se kishin fshehur të dhënat e tyre personale në formularin e dekriminalizimit.

Bujar Xhaferri, një 52- vjeçar nga Kashari, nuk e ka duruar faktin që babai i personit që i kishte vrarë të vëllanë 10 muaj më parë, punonte në një arë 50 metra larg shtëpisë së të ndjerit.

Duke e konsideruar si karshillëk dhe mungesë respekti, ai ka vendosur ta vrasë, veprim që e realizoi në 18 mars 2016, në rrugën kryesore të fshatit Kashar. Pas krimit, ai telefonoi policinë duke u treguar se kishte vrarë shtetasin Skënder Aluku dhe u vetëdorëzua, bashkë me armën.

Pak ditë më parë, Gjykata e Tiranës përfundoi gjykimin e dosjes në ngarkim të 52-vjeçarit Xhaferri, duke e deklaruar fajtor për akuzën e “vrasjes me paramendim” e “prodhim dhe mbajtje pa leje të armëve luftarake dhe municioneve”.

Ai u dënua me 25 vjet heqje lirie. Për shkak të gjykimit të shkurtuar, ai përfitoi uljen e një të tretës dhe përfundimisht do të vuajë një dënim me 16 vjet e 8 muaj burg.

“Panorama” ka siguruar një kopje të vendimit të Gjykatës, ku zbardhet rrëfimi i vetë të pandehurit mbi shkaqet që e shtynë të kryente vrasjen dhe momentet e përleshjes dhe shkrehjen e armës drejt tij, si edhe dorëzimin në Polici.

“Pse e vrava”

Përpara hetuesve Bujar Xhaferri ka deklaruar se në datën 17 maj 2015, shtetasi Altin Aluku ka vrarë vëllanë e tij, Lutfi Xhaferri, dhe ka plagosur bashkëshorten e tij, shtetasen N. Xhaferri. Për këtë ngjarje Altini ishte dënuar.

Për 6 muaj pas kësaj ngjarjeje, babai i Altinit, shtetasi Skënder Aluku, nuk kishte dalë në fshat, por dy muajt e fundit ai dilte dhe sipas të pandehurit, e bënte për karshillëk dhe po ashtu shkonte dhe afër banesës së Lutfi Xhaferrit, ku punonte një tokë që kishte aty.

Kjo, sipas Bujarit, ishte e papranueshme, duke menduar se edhe i kishin vrarë pa të keqe dhe tani nuk i respektonin.

Në datën 17 mars 2016, kur bëheshin 10 muaj që të pandehurit i kishte vdekur vëllai, Lutfiu, ishte tek banesa e tij, ndërsa shtetasi Skënder Aluku ishte para shtëpisë, te toka e tij, duke punuar në një distancë rreth 50 m.

Sipas Bujarit, ky ishte momenti që i erdhi kulmi durimit dhe vendosi që kur ta takonte, do ta vriste.

Referuar vendimit, i pandehuri ka marrë një pistoletë të fshehur prej tij nga viti 1997 dhe ka dalë të vrasë shtetasin Skënder Aluku. Ditën e parë ai nuk e ka gjetur, por të nesërmen, ai është përballur me të në orën 06:30.

“Te vendi i quajtur ‘Lagja e re’ hasi në rrugë Skënderin dhe i foli duke i thënë ‘kaq trim i madh je që vjen lart te shtëpia?’ dhe menjëherë ka nxjerrë pistoletën dhe e mbushi për të qëlluar, por arma nuk shkrepi”, thuhej në vendim.

Në këtë moment, Skënderi i është hedhur sipër, por i pandehuri e ka qëlluar në kokë 2-3 herë me qytën e pistoletës derisa e ka rrëzuar në tokë. Pasi ka bërë rimbushje të armës, i pandehuri ka qëlluar tri herë në drejtim të tij.

Pas këtij momenti, ai ka hequr krehërin e pistoletës dhe është larguar duke dalë poshtë rrugës e më pas ka njoftuar Policinë, duke i thënë se kishte vrarë shtetasin Skënder Aluku.

Dy persona kanë mbetur të plagosur si pasojë e një aksidenti të ndodhur mëngjesin e sotëm.

Rreth orës 06:30 të mëngjesit të sotëm, në aksin rrugor Fushë Krujë- Rinas, tek “Ura e Gjoles”, 32- vjeçari A.B., duke drejtuar mjetin tip “Peugeot” me targa DR 2345 F, ka humbur kontrollin dhe ka dalë nga rruga.

Për pasoje janë aksidentuar pasagjerët në mjet, K.V., 22 vjeç dhe D.B,. 21 vjeç, të cilët ndodhen në Spitalin Ushtarak Tiranë jashtë rrezikut për jetën.

Drejtuesi i mjetit është shoqëruar në ambientet e komisariatit të Policisë Krujë dhe policia po punon për sqarimin e plotë të ngjarjes.

Një person në Tiranë i ka dhënë fund jetës duke u vetëvrarë me çifte.

Rreth orës 07:00 të mëngjesit të sotëm, në Bathore, në banesën e tij është gjetur i vdekur 62- vjeçari, Q. N.

Nga hetimet paraprake dyshohet se viktima ka kryer vetëvrasje, pasi është gjetur dhe një letër që viktima i ka lënë familjarëve.

Në letrën përmbajtja e së cilës nuk bëhet me dije, shpjegohen edhe aryset e aktit tragjik.

Në krahë të trupit është gjetur një armë zjarri, çifte. Nuk dihen ende shkaqet që e kanë detyruar 62- vjeçarin drejt fundit fatal, ndërkohë që policia po heton për zbardhjen e rrethanave të ngjarjes.

Pasditen e djeshme dy persona gjetën vdekjen në aksin rrugor Shkodër-Koplik.

Fran Luca, 85 vjeç, dhe Kol Gjoni, 77 vjeç, që të dy banues në Shkodër, rreth orës 17:20, në vendin e quajtur Shtoj i Ri, u aksidentuan teksa ecnin anës rrugës nga një automjet tip “Benz” me targë AA 372 KJ, me drejtues Nimet Bilani, 61 vjeç, banues në Shkodër.

Të plagosurit u dërguan në spitalin e Shkodrës, por për shkak të plagëve të marra ndërruan jetë.

Në fotografinë që shoqëron shkrimin shihen të aksidentuarit në rrugë, të cilët sipas një denoncimi tek “JOQ” qëndruan për mbi 20 minuta në rrugë, pa ardhur askush për t’i marrë.

I dyshuari për aksidentin 61-vjeçari Nimet Bilani, banues në Shkodër, tashmë nën akuzë për veprën penale “Shkelja e rregullave të qarkullimit rrugor”, u arrestua mbrëmjen e djeshme.