Gjykata e Tiranës ka caktuar masën e sigurisë “arrest në burg” për Ylli Zallën, ndërsa mbrojtja e tij ka kërkuar një masë më të lehtë, duke kundërshtuar pretendimin se ai paraqet rrezikshmëri të lartë shoqërore.

Avokati i Zallës argumentoi se as personi dhe as vepra për të cilën ai dyshohet nuk paraqesin rrezikshmëri të veçantë. Sipas mbrojtjes, armët dhe municionet e sekuestruara janë gjetur në pjesën e pasme të banesës, mes ferrave, pa masa të veçanta për ruajtjen apo ambalazhimin e tyre.

Mbrojtja pretendon gjithashtu se disa prej kapsollave detonatore nuk kanë qenë funksionale, ndërsa disa mjete shpërthyese nuk kanë qenë të lidhura në mënyrën e duhur për të shkaktuar shpërthim.

Sa i takon armëve, avokati deklaroi se bëhet fjalë për armë të vjetra, të prodhimit kinez, të viteve ’80. Edhe sasia e kanabisit e sekuestruar, sipas tij, ka qenë e ekspozuar ndaj faktorëve atmosferikë dhe nuk tregon kujdes të veçantë për ruajtjen e saj.

Avokati theksoi se Ylli Zalla nuk është i përfshirë në ngjarje të tjera kriminale dhe se nuk ka prova që materialet e gjetura të jenë përdorur në ngjarje të tjera apo që ai të ketë ndërmarrë veprime për shitjen e lëndëve narkotike.

Një tjetër argument i mbrojtjes lidhet me mënyrën e dorëzimit të tij. Avokati tha se, pavarësisht angazhimit të forcave të shumta të policisë dhe përdorimit të dronëve gjatë operacionit, Zalla nuk u kap nga forcat e policisë, por vendosi vetë të dorëzohej.

Sipas avokatit, ai ka thirrur një efektiv që ndodhej pranë banesës, i është prezantuar dhe është dorëzuar, me qëllim që të sqaronte pozicionin e tij.

Për këto arsye, mbrojtja kërkoi që ndaj Ylli Zallës të vendosej një masë më e lehtë sigurie, por gjykata vendosi “arrest në burg”.

Një tjetër argument i mbrojtjes lidhet me mënyrën e arrestimit. Avokati pretendon se Zalla është dorëzuar vetë, pavarësisht angazhimit të forcave të shumta të policisë dhe përdorimit të dronëve në operacion.

“Në këtë drejtim, me interes të veçantë të theksohet se Ylli Zalla është dorëzuar vetë. Është e vërtetë që policia është angazhuar me dron dhe me efektivë të shumtë, por kështu ajo ka realizuar çdo operacion ndaj Ylli Zallës për ta kapur dhe nuk ka mundur dot ta kapë atë. I vetmi element që solli sukses në operacionin e policisë ishte dëshira e Yllit për t’u dorëzuar, për të sqaruar pozicionin e tij.”

Avokati iu referua edhe pamjeve të bëra publike nga operacioni, duke pretenduar se ato tregojnë momentin kur Zalla identifikohet dhe dorëzohet.

“Videot publike para shtëpisë së tij e tregojnë më së shumti këtë gjë. Madje ai vetë ka thirrur me zë një person që i është dukur si pjesë e forcave RENEA dhe i është prezantuar, duke u dorëzuar kësisoj.”

Për këto arsye, mbrojtja kërkoi që ndaj Zallës të vendosej një masë më e lehtë se “arresti në burg”, masë e kërkuar nga Prokuroria. Megjithatë, gjykata nuk e ka pranuar kërkesën e mbrojtjes dhe ka vendosur që 49-vjeçari të qëndrojë në burg.

Ylli Zalla ishte shpallur në kërkim që prej nëntorit 2025, pasi në banesën e tij u zbulua një arsenal armësh gjatë hetimeve që pasuan atentatin në Rinas.

Në të kaluarën, Zalla është arrestuar edhe për vepra të tjera penale, ndërsa emri i tij është lidhur nga autoritetet me akuza për prodhim eksplozivësh dhe veprimtari të lidhura me narkotikët. Megjithatë, këto janë çështje të veçuara dhe akuzat duhet të vërtetohen përmes procesit gjyqësor.

Banorët e Patosit janë ngritur paraditen e sotme për të dytën herë në protestë për të kundërshtuar propozimin e Partisë Socialiste për hartën e re territoriale ku parashikohet shkrirja e bashkisë Patos me atë të Fierit.

Me pankarta në duar dhe disa fjalime, ata kanë kërkuar njëzëri që kryeministri Rama të rishikojë këtë propozim pasi Patosi është qytet me identitet dhe histori, teksa kanë theksuar se dhe performanca e bashkisë renditet ndër më të mirat në vend.

“Unë jam naftëtar i vjetër. E kemi bërë me kontribut vullnetar këtë Patos. Spitali, ambulanca, shkolla janë bërë me kontribut vullnetar. Kemi punuar 8 orë në naftë dhe ktheheshim këtu.”

“I bëjmë thirrje Ramës të bisedojë me naftëtarët, të marrë mendimin e tyre. Është krim të shkrihet bashkia e Patosit. I themi jo reformës së bërë nga Partia Socialiste”, thanë disa prej banorëve.

Ata kanë argumentuar se nëse Patosi i bashkohet Fierit do të humbasin të gjitha shërbimet duke ua vështirësuar jetën e përditshme ndërsa kanë theksuar se ekziston edhe rreziku i shkrirjes së shumë institucioneve.

“Nëse mbyllet bashkia, shkurtimi i fuqisë punëtore do të bëhet me 50%. Sa më e vogël të jetë bashkia, aq më organizim e kërkesë llogarie ka. Kontrollon çdo gjë.”

“Sa më afër bashkia e komuna, aq më të zgjidhshme janë problemet. Neve nuk na mposhtin.”

“Bashkia e Patosit është ndër më të mirat, ku çdo gjë gjelbëron e lulëzon”, thanë qytetarët.
Protestuesit kanë paralajmëruar përshkallëzim të protestave teksa kanë shprehur vendosmërinë për ta kundërshtuar deri në fund këtë propozim të Partisë Socialiste.

Një autobus është shkrumbuar nga flakët paraditen e kësaj të marte në Berat. Bëhet me dije se autobusi me turistë po ngjitej drejt kalasë së Beratit. Në ato momente shoferi ka kuptuar se kishte një defekt dhe ka zbritur menjëherë pasagjerët. 

Fatmirësisht nga flakët nuk ka asnjë person të lënduar. Siç shihet edhe në pamje, zjarri që ka përfshirë mjetin ka shkaktuar tym të dendur e të zi që ka mbuluar zonën. Megjithatë, ende nuk dihen rrethanat e ngjarjes dhe shkaku që ka shkaktuar zjarrin.