Është zbardhur vendimi i GJKKO-së për Belinda Ballukun, e cila u pezullua nga detyra si zv kryeministre dhe ministre e Infrastrukturës dhe Energjisë dhe ju bllokua pashaporta.

Në vendimin e gjykatës sqarohet se dy masat janë caktuar pasi Balluku, për shkak të detyrës që ushtron, vë në rrezik marrjen e provave.  Gjykata sqaron se ajo mund të kryejë të njëjtat procedura, që kanë rezultuar më herët në shkelje.

Po ashtu, në vendimin e GJKKO, sqarohet se bllokimi i pasaportës bëhet për arsye se e pandehura mund të ketë rrezik që të arratiset ndërsa thuhet se për veprën penale të parashikuar, Balluku rrezikon 1 deri në 5 vite burg.

“Gjykata vlerëson se, në rastin konkret ekziston rreziku i largimit të të pandehurve të sipërcituar, nisur nga sanksioni dhe marzhi i lartë që parashikon ligji për veprën penale që ata dyshohen, konkretisht nga një deri në pesë vjet burgim për veprën penale të parashikuar nga neni 258 i K.Penal, duke marrë parasysh rrethanën se të pandehurit dyshohen për këtë vepër penale të kryer dy here dhe në bashkëpunim.

Në rastin konkret për shkak të rrethanave të faktit dhe personalitetit të të pandehurve të sipërcituar, duke qenë në ushtrimin e funksioneve respektive të tyre për shkak të detyrës, ekziston rreziku që ata të kryejnë krime të të njëjtit lloj me atë për të cilin po procedohen, kjo lidhur me rrethanat e veprimeve të kundraligjshme të të pandehurve në disa procedura prokurimi, si dhe nisur nga fakti se të pandehurit menaxhojnë në vazhdim fondet publike për investimet publike të tjera të parashikuara për Institucionet Qëndrore që ata drejtojnë.

Në rastin konkret ekzistojnë shkaqe të rëndësishme që vënë në rrezik marrjen ose vërtetësinë e provës në funksion të hetimit të kësaj çështjeje. pasi për shkak të detyrës që ushtron e pandehura Belinda Balluku. (aktualisht me funksionet e larta shtetërore, Zv. Kryeministër i Republikës së Shqipërisë dhe Ministër i Energjisë dhe Infrastrukturës). por dhe të pandehurit e tjerë Gentian Gjyli, (aktualisht me detyrën e Drejtorit të Përgjithshëm të Autoritetit Rrugor Shqiptar), Frald Elezi, (me detyrën e Administratorit të Koorporates Elektroenergjitike Shqiptare SH.A). ekziston mundësia që ata të mund të ndërhyjnë dhe të ndikojnë në prishjen ose asgjësimin e provave, në krijimin e rrethanave që vështirësojnë mbledhjen e provave, kjo nisur nga fakti që organi procedues po verifikon çdo dokumentacion të administruar nga Institucionet”, sqarohet në vendimin e GJKKO.

Të mërkurën në parlament, ndërsa fliste për herë të parë mbi procesin gjyqësor ku u mor e pandehur, Belinda Balluku lëshoi një premtim që reflektonte besnikërinë e saj të palëkundur tek Edi Rama. Ajo premtoi se kurrë, asnjëherë nuk do ta sulmonte drejtësinë e re edhe kur prekej personalisht.

“Nuk do të dëgjoni kurrë nga unë akuza, sharje dhe as kërcënime për drejtësinë e re edhe kur prekem personalisht” u shpreh Balluku me të njëjtin përkushtim ndaj partisë si në kohën kur nuk ishte e pandehur.

Si një zyrtare që e ka ndërtuar karrierën mbi bindjen se linja e partisë është gjithmonë rruga më e sigurt ajo shtoi “kjo drejtësi e re e dalë nga reforma, produkt i vullnetit të PS dhe Ramës, është duke kryer misionin për të cilin u reformua”.

“S’do më dëgjoni kurrë të merrem me prokurorë e gjyqtarë, pasi secili prej tyre bën detyrën ashtu si e gjykon” u shpreh ajo, duke shtuar se bashkë me kolegët e PS e mbështeste reformën në drejtësi, “edhe kur prekemi personalisht”.

Fjalimi respektoi pikë për pikë vijën e partisë. Asnjë devijim. Asnjë lëvizje nga logjika. Asnjë shenjë se interesi personal, mund të dalë mbi interesin e partisë.

Pranë Ballukut në kuvend ishte ulur edhe kryeministri Edi Rama, i cili deri dje kishte refuzuar ta shkarkonte nga detyra por në asnjë rast nuk e ka mbrojtur publikisht. Përkundrazi, në fjalën e tij në Kuvend, Rama u mburr se “sot Shqipëria për herë të parë në histori lufton me korrupsionin dhe heton pa dallim” dhe se PS është “garantja ekskluzive” e pavarësisë së drejtësisë.

Mbrëmjen pas parlamentit Balluku vazhdoi si zakonisht punën e saj si ministre, duke ndarë njoftimet për reshjet e shirave dhe nivelin e ujit në diga. Dukej e qetë. Në fund të fundit, telashet me drejtësinë do t’i përballonte me mburojën që i jepte të qënit nr.2 i qeverise.

Vetëm se pa kaluar as 24 orë, premtimi i saj për besnikëri ndaj partisë po tingëllon i nxituar. Rrethanat ndryshuan me shpejtësi dhe pikërisht atëherë kur gjithçka dukej e qetë për Ballukun, situata u përmbys dhe u bë e paparashikuar.

Mjaftoi firma e gjykatësit Erjon Çela i cili mëngjesin e të enjtes, në seancën e masave të sigurisë, urdhëroi pezullimin e Belinda Ballukut nga detyra dhe bllokimin e pasaportës, duke e ndaluar të udhëtojë jashtë Shqipërisë.

Si të mos mjaftonin këto, prokurorët e SPAK i shtuan një akuzë të re: shkeljen e barazisë në tenderin e lotit nr.4 të Unazës së Madhe të Tiranës. Prova të tjera janë gjetur në celularin e Ervis Berberit, ish-vartësi i saj i pakujdesshëm, i cili në bisedat e tij zbulon gjithë mekanizmin e kontrollit të tenderave, një mekanizëm që Prokuroria thotë se lidhet drejtpërdrejt me ministren.

Ajo që gjer dje ndjehej e paprekshme në parlament, e ulur afër Edi Ramës dhe e gatshme të recitonte formulat propagandistike të partisë për drejtësinë e pavarur, sot e sheh veten pa pasaportë, pa pushtet ekzekutiv dhe gati për t’u shndërruar në kurbanin e radhës të Rilindjes.

Prova nuk ka, por instikti e ka çuar direkt në zyrën e Edi Ramës. Aty beson se e ka origjinën kjo kthesë e fortë në procesin gjyqësor, të cilën një ditë më parë nuk ia kishte marrë mendja.

Pretendimi i Ballukut është se vendimi i gjykatës është antikushtetues, se emërimi i ministrave dhe i zv.kryeministres është një ekskluzivitet i kryeministrit. Përndryshe, qeverisja nuk do të përcaktohej nga të zgjedhurit me votë, por nga prokurorët e SPAK dhe gjyqtarët e GJKKO.

Në mediat pranë qeverisë po raportohet se Balluku ka pretenduar se pezullimi nga funksionet që ka pasur është bërë në shkelje e Kushtetutës.

Gjithashtu, pretendon Balluku, këtë vendim nuk mund ta marrë kjo gjykatë, por vetëm Gjykata Kushtetuese pasi posti i zv.kryeministrit është i përcaktuar në Kushtetutë. Nuk dihet ende nëse do të jetë kjo mbrojtja që do të bëjë Balluku pasi Kodi i Procedurës Penale në nenin 242 pika 2 thotë se masa e pezullimit nga detyra merret ndaj çdo funksionari publik, “përveç atyre të zgjedhurve sipas Kodit Elektoral”.

Duke nuhatur këtë dredhi në arsyetim, opozita ka reaguar menjëherë duke e akuzuar Edi Ramën për një grusht shteti. “Belinda Balluku nuk është pezulluar nga funksioni si deputete. Këtë e ndalon ligji! Gjykata dhe SPAK e kanë respektuar këtë ndalim. Ndërkohë “pezullimi për të ushtruar funksionet publike” në pushtetin ekzekutiv është qëllimi për të cilën ekziston kjo masë ndaluese në ligj” shkruan kreu i grupit parlamentar të PD, Gazment Bardhi.

Më herët është përfolur se Belinda Balluku e ka bërë të qartë se nuk do të bjerë e vetme në kthetrat e drejtësisë. Ndaj këtë të enjte u ngujua bashkë me Edi Ramën në kryeministri. Takimi zgjati shumë, më shumë se 7 orë dhe gjatë pasdites, dyshes Rama-Balluku i është bashkuar edhe kreu i komisionit të ligjeve, Ulsi Manja.

I pari që la zyrën ishte kryeministri Edi Rama, i cili kishte planifikuar një darkë me komisioneren Marta Kos. Ndërkohë mediat ndërkombëtare e lidhën menjëhere ndjekjen penale të Bullukut me procesin e integrimit.

“Shqipëria synon të anëtarësohet në Bashkimin Evropian deri në vitin 2030, por blloku i pasur po kërkon që vendi të bëjë më shumë për të luftuar krimin dhe korrupsionin” shkruajti Reuters.

Belinda Balluku, e njëjta që deri dje betohej se nuk do t’i kundërvihej drejtësisë dhe se do t’i qëndronte besnike partisë deri në vetësakrifikim, sot po kërkon ndërmjetësim politik, një marrëveshje pandëshkueshmërie nga Edi Rama.

Për të mos shkuar në hapat e Erion Veliajt, i cili e besoi shefin deri në momentin e fundit para se t’i vinin prangat. Për të mos ndjekur as modelin e Arben Ahmetajt, që iku jashtë vendit duke  lëshuar nga larg akuzat e tij për Ramën. Çështja tashmë nuk është politike dhe as penale. Marrëdhëniet kanë marrë ngjyrat e një thrilleri kriminal dhe veprimet e njërit apo tjetrit po funksionojnë sipas rregullave të mafias./Lapsi.al

Opozita mban sërish të hënën më 24 nëntor protestën e radhës para Kryeministrisë. Foltorja e parlamentit do të jetë sërish e vendosur para zyrës së Ramës.

Mësohet se protesta pritet të nisë edhe kësaj here në orën 18:00.

Kreu i demokratëve, Sali Berisha e ka quajtur këtë protestë një ‘foltore të Parlamentit’ ku mund të flasin deputetë, por dhe qytetarë.

Prokuroria e Posaçme ka ngritur akuzë të re përsa i përket zv.kryeministres Belinda Balluku, njëherësh ministrja e Infrastrukturës dhe Energjetikës.

Gazetarja Klodiana Lala raporton se akuza është dy herë për shkelje të barazisë në tendera, për tunelin e Llogarasë dhe lotin 4 të Unazës së Madhe.

Gjykata e Posaçme Anti-Korrupsion ka pezulluar ditën e sotme nga detyra Belinda Ballukun, si dhe i ka ndaluar asaj daljen jashtë vendit.

Gjithashtu gjykata ka caktuar masë sigurie edhe për dy vartësit e Ballukut, drejtori i KESH, Erald Elezi dhe kreu i ARRSH-së, Gentian Gjyli, të cilën janë lënë në “arrest shtëpie”.

Gjykata e Posaçme ka caktuar dy masa sigurie për Belinda Ballukun, pezullim i ushtrimit të detyrës dhe funksionit si zv.kryeministre dhe ministre e Infrastrukturës dhe Energjisë, dhe ndalim i daljes jashtë vendit.

Kujtojmë se Belinda Balluku është marrë e pandehur nga SPAK për procedurat e tenderit të Llogarasë, ku ajo akuzohet për shkelje të barazisë në tendera.

SPAK konfirmon se Balluku ishte nën hetim për shkelje të barazisë në tendera për një kallëzim të vitit 2024, ndërkohë që ka bashkuar dhe një tjeter cështje, në vitin 2025.