Monika Kryemadhi ka folur ditën e sotme për marrëdhënien e saj me Ilir Metën, për të cilin u shpreh se sot gëzon ende respekt për 33 vitet e kaluara bashkë si partnerë.

E ftuar në ‘Breaking’ në Top News, Monika u shpreh se vitet e bashkëjetesës me Metën kanë qenë periudha më e bukur e jetës së saj, edhe pse me të ka kaluar shumë sfida dhe beteja me të.

“Më thuaj ti një femër që nuk mban mend puthjen e parë. Unë nuk mund të mohoj 33 vite jetë me Metën, nuk kanë qenë të tmerrshme, por shumë të bukura. Ka qenë periudha më e bukur e jetës sime. Me Metën kam kaluar shumë sfida, shumë beteja, disa i fituam, disa u humbën. Unë nuk mund të mohoj çdo gjë. Kjo që jam, jam për shkak të bashkëjetesës sime me të. Ai ishte shumë tolerant, më linte të bëja çfarë të doja, nuk kam pasur kurrë kontroll. Ne në jetën tonë kemi bërë a s’kemi bërë 5 herë pushime familjare.

Jam penduar që kam harxhuar kohën për të tjerët dhe jo për familjen time. Kam peng në marrëdhënien me fëmijët, sepse i jam përkushtuar njerëzve të tjerë dhe në fund të ditës, kur kthen kohën, thua çfarë kam bërë për fëmijën tim. Ndjej respekt për të. Meta kurrë nuk ka qenë i vëmendshëm për veshjen time. Vetëm një herë, kur i kam lyer flokët e kuqe, i bëri përshtypje.

Sot ndjej respekt dhe inat me veten që SPAK dhe Dumani përdorën metodologjinë e sigurimit të shtetit për të na futur në konflikt, duke i quajtur si bashkëpunëtor të SPAK, pra që kam tradhtuar Metën dhe doli që nuk ishte e vërtetë. Meta gjithmonë i ka besuar njerëzit dhe ky ka qenë problemi më i madh i tij. Ai ka një miqësi të tepruar brenda vetes së tij. Zhgënjimin e ka shumë më të madh. Manipulimi që është bërë ka qenë shumë i shëmtuar dhe jo njerëzor”.

Monika riktheu në vëmendjet edhe akuzat që i janë bërë.

“Të gjithë ata që kanë ndërtuar këtë lloj skeme… ata i than në fillim Metës, që në telefonin e Monikës kemi gjetur një të dashur, pra “Monika ka të dashur”. Unë thoja që të kesh të dashur duhet të kesh kohë njëherë. Meta kishte ikur nga shtëpia atëherë. Thonin që unë kam të dashur. I kishin çuar Metës mesazhet e mia me “Zemra ime”. Unë Metën e kisha të regjistruar në telefon me “Zemra ime”, u shpreh Monika Kryemadhi.

Bashkimi Evropian po bën një gabim serioz duke mos u angazhuar drejtpërdrejt me udhëheqjen ruse për t’i dhënë fund luftës në Ukrainë, tha kryeministri shqiptar Edi Rama për POLITICO.

“Mund të them se Evropa ka bërë një gabim të madh strategjik duke ndërprerë çdo kanal me Rusinë”, u shpreh ai në një intervistë në Forumin Ekonomik të Delfit në Greqi. “Evropa duhet të jetë gjithmonë, gjithmonë, gjithmonë në komunikim me të gjithë”, shtoi ai.

Këto deklarata bien ndesh me qasjen e zyrtarëve të lartë të BE-së, si presidentja e Komisionit Evropian Ursula von der Leyen dhe kryediplomatja e BE-së Kaja Kallas, të cilët kanë shmangur kontaktet direkte me udhëheqësit rusë, përfshirë presidentin Vladimir Putin, duke argumentuar se bisedime të tilla janë të pakuptimta nëse Moska është e vendosur të vazhdojë luftën.

Por për Ramën, vendi i të cilit synon të anëtarësohet në BE në vitet e ardhshme, Evropa po e vendos veten në periferi të çdo marrëveshjeje të ardhshme paqeje mes Ukrainës dhe Rusisë duke shmangur angazhimin e drejtpërdrejtë me Moskën.

“Sa më shumë ta shtyjmë (bisedën me Rusinë), aq më pak do të kemi fjalë në fund, sepse Rusia, sido që të përfundojë kjo luftë, nuk do të zhduket”, tha ai, duke shtuar se vendi i tij nuk ka asnjë lidhje me Rusinë.

“Ne nuk kemi asnjë lloj varësie nga Rusia, as investime, as gaz rus dhe asgjë ruse, kështu që mund ta them këtë.”

Komentet e Ramës, një ish-basketbollist profesionist që kombinon politikën me krijimtarinë artistike, vijnë në një kohë kur liderët e BE-së janë mbledhur në Nikozia të Qipros për të diskutuar mbështetjen e mëtejshme për Ukrainën, si dhe krizën energjetike që po përballet blloku për shkak të bllokadës iraniane të Ngushticës së Hormuzit.

Gjatë 13 viteve të tij në pushtet, Rama e ka pozicionuar Shqipërinë si fort pro-BE-së, duke ruajtur njëkohësisht marrëdhënie me Shtetet e Bashkuara dhe presidentin Donald Trump, objektivat e luftës së të cilit ndaj Iranit Rama i ka vlerësuar publikisht.

“Nuk është për ne (Shqipërinë) të vendosim si të trajtohet Irani në skenën globale, por është detyra jonë të mbështesim çdo përpjekje për ta dobësuar dhe ndoshta për ta rrëzuar atë regjim”, tha kryeministri shqiptar, duke shtuar se do të lejonte ushtrinë amerikane të zhvillonte operacione nga Shqipëria me kusht që Uashingtoni të siguronte “mbrojtje ajrore, të cilën ne nuk e kemi në vend.”

Marrëdhëniet e mira të Ramës me Uashingtonin përfshijnë negociata të vazhdueshme mes qeverisë së tij dhe një kompanie në pronësi të dhëndrit të Trump, Jared Kushner, për shitjen e mundshme të ishullit të Sazanit në brigjet shqiptare.

Kushner, përmes kompanisë së tij Affinity Partners, po negocion për të blerë ishullin e pabanuar prej 5 kilometrash katrorë në Adriatik për 1.4 miliardë dollarë, me qëllim ta shndërrojë në një resort luksoz ekologjik me vila elitare, marina dhe bunkerë për vizitorë të pasur.

Planet kanë shkaktuar reagime të forta nga grupet mjedisore, me 41 organizata që i shkruan Ramës dhe ministrit të mjedisit në janar për të kërkuar ndërprerjen e menjëhershme të negociatave, duke argumentuar se planet janë në “kundërshtim të drejtpërdrejtë” me detyrimet e Shqipërisë në procesin e anëtarësimit në BE.

I pyetur për këto plane, Rama shprehu frustrim: “Është e pabesueshme që edhe media të mëdha, me reputacion botëror, flasin për një ishull që është shitur te Jared Kushner. Nuk është e vërtetë. Nuk di si ta ndal këtë, sepse ne nuk kemi bërë marrëveshje me Jared Kushner. Ne jemi në negociata.”

Bisedimet për shitjen kanë nisur që para mandatit të dytë të Trump, shtoi Rama, në një kohë kur “nuk ishte e qartë nëse ai do të ishte në Shtëpinë e Bardhë apo në burg.” Megjithatë, kjo marrëveshje nuk duhet të pengojë aspiratat e Shqipërisë për anëtarësim në BE, ku, së bashku me Malin e Zi, “jemi në krye”, tha Rama.

Përkundrazi, “shpresoj që marrëveshja të realizohet, sepse nëse investimi i tyre do të konkretizohet, do të jetë një dhuratë e bukur, për Evropën”, tha ai, duke shtuar se bëhet fjalë për “bukuri dhe zhvillim të qëndrueshëm.”

Një zyrtar i BE-së, që foli në kushte anonimiteti, tha se Komisioni Evropian është në dijeni të planit dhe nuk kishte koment të menjëhershëm për ndikimin e tij në procesin e anëtarësimit të Shqipërisë.

Rama, i cili e përshkroi veten si një “artist serioz” dhe, me gjatësi 1.98 metra, ka qenë basketbollist profesionist para se të hynte në politikë, njihet për stilin e tij të veçantë.

Pasi shprehu admirim për mjetin e transkriptimit me inteligjencë artificiale të POLITICO-s (“Pse nuk e kam edhe unë këtë?”), Rama kaloi 10 minutat e para të intervistës duke treguar imazhe të skulpturave që kishte krijuar pjesërisht me dorë dhe pjesërisht me AI, të cilat do t’i ekspozojë në një ekspozitë të ardhshme në Berlin.

Shqipëria tërhoqi vëmendje duke prezantuar “ministren e parë me AI” në botë, të quajtur Diella, megjithëse aktorja mbi fytyrën e së cilës është bazuar Diella ka njoftuar se do ta çojë qeverinë në gjyq për përdorimin e imazhit të saj.

Rama nuk u step: “Po e përgatisim që të dalë në intervista live” si dhe në “mbledhje qeverie”, tha ai.

Ministrja me AI është pjesë e një nisme modernizimi në Shqipëri, e cila synon të përfundojë negociatat për anëtarësim në BE deri në fund të vitit 2027 dhe të bëhet anëtare e plotë deri në vitin 2030. Rama e përshkruan zgjerimin e BE-së si një proces “bashkimi” të Evropës, dhe jo si zgjerim të një unioni burokratik.

Pas një takimi në Delfi me kryeministrin grek Kyriakos Mitsotakis, mbështetja e të cilit është e nevojshme për anëtarësimin e Shqipërisë, Rama tha: “Nuk i kam parë kurrë (liderët e BE-së) kaq të bindur për nevojën e bashkimit të Evropës.”

Megjithatë, Rama këmbëngul se Shqipëria duhet të ketë lirinë të bëjë zgjedhjet e veta në politikën e jashtme, përfshirë një qëndrim “simpatizues” ndaj administratës Trump. Kjo nuk e ka penguar atë të jetë “100 për qind në një linjë me Evropën” për objektivat strategjikë.

I pyetur nëse Shqipëria do të duhet të zgjedhë anë nëse bëhet anëtare e BE-së, Rama përfundoi: “Është si njeriu dhe inteligjenca artificiale. Në art, duhet t’i pranosh të dyja, për të arritur rezultatin më të mirë.”

Demokratët propozuan ndryshimin e sistemit zgjedhor në proporcional kombëtar me listë të hapur, kërkesë e cila u pranua në parim nga socialistët me kushtin që të preket Kushtetuta edhe me uljen e numrit të deputetëve.

Një ditë pas përgjigjes së ardhur nga Damian Gjiknuri, kryetari i PD-së, Sali Berisha tha se opozita nuk bashkon votat me Ramën, pasi qëllimi i tij është lufta kundër SPAK.

Gazetarja: Z. Berisha, PS është e gatshme të pranojë ndryshimin e sistemit zgjedhor ashtu sikurse e ka kërkuar PD, në rast se ju pranoni të diskutohet edhe ulja e numrit të deputetëve. A është e gatshme PD të ulet në një komision të posaçëm për reformimin e Kushtetutës, që të diskutohen të gjitha çështjet?

Sali Berisha: PD ka rënë dakord me kërkesën e aleatëve të vet dhe të tjerëve në përpjekjen më serioze për të gjetur mirëkuptimin më të gjerë si opozitë, më të drejtë dhe më të ndershëm, secili pjesën e vet, kjo është ai ligj dhe ne e bëjmë. Kushte, të cilat kërkojnë të pengojnë këtë, ne nuk pranojmë. Ne nuk kemi pse pranojmë sepse ne nuk gjykojmë se pa zgjidhur problemin elektoral, nuk mund të ketë një reformë kushtetuese.

Edhe njëherë ne nuk bashkojmë votat me Edi Ramën dhe ai po përgatit, se tani problemi i tyre është lufta kundër Skapit, se këtu duan të dalin ata, po të harrojnë se do marrin kurrë një votë të PD, pasi ata e kanë betejë politike, nuk e kanë betejë në interes të qytetarëve.

Kjo është historia e çuditshme e një cope letre të harruar mbi në një arkë, e cila shpërbën fillin e një peripecie që shkon deri në tryezën e pijes kryeministrore. Atë letër faturë, oficerët e BKH-së e gjetën mes kartonëve të bodrumit të vilës që kishte Ergys Agasi në zonën e rezidencave qeveritare në plazhin e Durrësit.

Me urdhër të SPAK hetuesit gjendeshin aty në zbatim të masës “arrest me burg” për atë që ish zv/kryeministri Arben Ahmetaj e kishte etiketuar si “kordinatori i Edi Ramës me bandat kriminale”.

Në këtë kuadër ata kontrolluan shtëpinë dhe bodrumet, ku njësoj si në kompleksin Equos Resort gjendeshin vera dhe shampanjë e shtrenjtë. Por në njërën mes arkave të stivuara, e harruar aty, u gjend edhe një faturë si ato të ëester Union e kompanisë Fast&Freesh Ajola. Hetimi u thellua në këtë pikë dhe kompania rezultoi të ishte në pronësi të biznesmenit, Andis Pepa, emri i të cilit aktualisht është regjistruar në dosjen e grupit të strukturuar kriminal.

Në aktivitetin e saj rezultonte edhe importimi në periudhën tetor 2024- nëntor 2025 i pijeve me çmime marramendëse. I gjithë aktiviteti i blerjeve të këtyre verërave, sipas një dokumenti të SPAk që Lapsi.al ka lexuar shkonte diku tek 1.1 milionë euro. Por historia nuk mbaron këtu. Këto vera pastaj i faturoheshin kompanive të Ermal Beqirit, njërit prej përfituesve të mëdhenj të tenderave të AKSH-it ndaj të cilit është dhënë masa e arrestit me burg si pjestar i grupit të strukturuar kriminal që përvetësonte paratë publike. Në këtë pistë hetimi i SPAK është thelluar edhe më shumë. Ata kanë marrë në pyetje biznesmenin Andis Pepa që importonte verërat. Ai ka treguar se është paguar, herë kesh dhe herë jo, nga një punonjëse e Ermal Beqirit, Arjola Koromani. Ajo përveçse derdhte paratë bënte dhe përzgjedhjen e llojit të etiketës që ishte e destinuar të konsumohej në nivele shumë të larta. 

Në dosjen e gjykatës që ka vendosur sekuestrimin e pasurive të Drejtoreshës së AKSH, Mirlinda Karçanaj, Ergys Agasit dhe Ermal Beqirit, Thuhet: “Dyshimet se këto produkte janë paguar dhe porositur për llogari të të hetuarit Ergys Agasi, janë konfirmuar dhe nga shpjegimet e të hetuarit Andis Papa”. Ai ka shpjeguar para hetuesve se: “… Jemi marrë dhe me import verash të shtrenjta, të cilat kryesisht kanë qenë porosi të shtetases Arjola Kormani…”
Ndërsa lidhur me blerjet e pijeve të shtrenjta alkoolike, ai shpjegoi se: “Dua të sqaroj se rreth vitit 2023 më është kërkuar nga shtetasja Arjola Koromani, si përfaqësuese e shoqërisë Soft & Solution, që të importonim disa vera meqënëse kompania Fast & Fresh mund ta kryente si procedurë. Porositë i ka bërë gjithnjë në mënyrë të drejtpërdrejtë shtetasja Arjola Koromani, madje dhe fatura që më vinte në dispozicion, ka emrin Arjola për sipër, pasi porositë i bënte direkt ajo por, në emrin e shoqërisë Fast & Fresh. Pagesat për këto produkte, bëheshin në këtë formë, pra ajo bënte porosinë, mua më vinte fatura nga shitësi dhe unë bëja pagesën me bankë nëpërmjet Union Bank. Më pas, Arjola i paguante verërat në varësi të likuiditetit, kishte dhe raste që lekët vinin nga shoqëria Soft & Solution, paraprakisht, me bankë dhe më pas kaloja në pagesa kesh. Kur nuk kishte mundësi, ajo sillte dhe lekët kesh, në formën e paradhënies. Dua gjithashtu të sqaroj se shoqërisë Soft & Solution nuk i kemi shitur verëra me fitim, por gjithnjë me vlerën që i bleja, ky fakt edhe për shkak të bashkëpunimit dhe njohjes me Ermal Beqirin…”

Niskur nga kryqëzimi i fakteve dhe të dhënat e hetimit SPAK dyshon se kjo sasi pijesh të shtrenjta që arrin shumën  94 423 883 lekë të reja, ishin pjesë e paketës së ryshfeteve që Ermal Beqiri jepte për tenderat që merrte në AKSH

“Ato përbëjnë përfitim të parregullt e korruptiv të të hetuarit Ergys Agasi, i cili në bashkëpunim me të hetuarën Mirlinda
Karçanaj kanë mundësuar shpalljen fitues të operatorëve ekonomikë Soft & Solution shpk; Fastech shpk; First shpk si dhe shoqërive të tjera të lidhura me to”, thuhet në dosjen e SPAK.

Pikërisht verat e importuara nga kompania e Andis Papës ishin pjesë e asaj xhalos mediatike që ndodhi në Equos Resort, ku pas sekuestrimit ato u zhduken. Mes tyre gjendeshin edhe shishet e famshme burgonjase, Romanee e Conti, të cilat kushtonin mbi 30 mijë euro një copë.

Ato shishe të rralla që grupi kriminal që pasi vidhte para publike, rrëmbente njerëz për ti frikësuar që mos merrnin pjesë në tendera, i konsumonte në darkën në tryezën e Edi Ramës. Kur Arben Ahmetaj, në intervistën për Cim Pekën e tha këtë fakt, pra se Rama dhe Gys Agasi pinin verëra nga 30 mijë euro shishja kjo u duk në një ekzagjerim. Por kur në qilarin e Agasit u gjetën shishet Romanee e Conti dhe sidomos kur ato u rrëmbyen pë lënë gjurmë edhe pas sekuestrimit gjithçka u bë më e qartë.

Por, sot përpos kësaj ne dimë edhe rrugën se si vinin ato deri në darkat kryeministrore. Falë parave publike që fitoheshin nga tenderat e AKSH-it, prej kompanive të Ermal Beqirit i cili më pas paguante kompaninë Fast&Freesh, për ti sjellë ato në Shqipëri. Dhe të mendosh se e gjitha kjo u zbardh nga një faturë e harruar rastësisht në një nga arkat e bodrumit të vilës në bllok të Ergys Agasit./Lapsi.al 

Kreu i LZHK-së, Dashamir Shehi, ka komentuar reformën zgjedhore dhe bisedimet me Sali Berishën, duke theksuar nevojën për ndryshimin e rregullave të procesit zgjedhor përpara çdo diskutimi tjetër politik.

Duke folur në emisionin “Off the Record” nga Andrea Danglli në A2CNN Shehi u shpreh se thelbësore është krijimi i një gare të barabartë që në nisje, pasi sipas tij, nëse rregullat janë të padrejta, rezultati i zgjedhjeve ndikohet që në fillim.

“Të ndryshojmë njëherë rregullat e lojës, pastaj se çfarë lojtarësh do zbresin në fushë dhe çfarë uniforme do të kenë është tjetër punë, por nëse nuk hyjmë të barabartë në një fushëbetejë, që në fillim fare zgjedhjet marrin një rrugë siç e kanë marrë në këto vite. Nuk kam ndonjë paragjykim për numrin e deputetëve, më intereson mënyra se si zgjidhen deputetët, se nga një proces elektoral, del një derivate politik. Nëse që në fillim ke vendosur rregulla të shtrëmbta, ku ky lloj produkti del, është paragjykuar që në fillim. A duan 140, apo 100 deputetë, s’jam kundër kësaj. Edhe po të bëhen 100 deputetë nuk shoh gjë të keqe, por mënyra si do zgjidhen deputetët kjo më intereson më tepër”, tha Shehi.

“Kjo që kanë bërë është rrugë e mire, uroj që të shkojë përpara. Ky është proces. Koha tregoi që kjo formulë zgjedhore që kemi përdorur ishte e gabuar”, shtoi kreu i LZHK.