Kreu i Partisë Demokratike, Sali Berisha, zhvilloi një bashkëbisedim online me qytetarët ku u pyet për ish-deputetin Ervin Salianji dhe përplasjet e brendshme në parti.

Berisha u shpreh se Salianji do të ketë të njëjtin fat si Lulzim Basha.

Berisha u ndal edhe te marrëdhëniet e Salianjit, duke përmendur takimet e tij me persona të dënuar dhe eksponentë të njohur, si dhe organizimin e mbledhjeve me figura që sipas tij kishin tradhtuar PD-në.

“Nëse unë vendosa të lë mënjanë dorëheqjen time pa revokim, e bëra në mënyrë absolute vetëm për një gjë, dhe asnjë motiv tjetër, kjo ishte sepse pashë dhe kuptova se ish kreu I kësaj partie kontrollohej totalisht ng Edi Rama.

Me 2 mënyra: Me dosje, 2 të tilla. Ndaj vendosa të rikthehem. Misionarët e krimit dhe Ramës nuk do e marrin kurrë këtë parti.

Salianji, nuk po ndalem në drekat dhe darkat në burg me Olsion Bistrin dhe Pëllumb Gjokën, sepse në burg ishin dhe për mua ai ishte i burgosur politik.

E kuotuam në Kryesinë e partisë vetëm për ta nderuar, por në të gjithë mbledhjet nuk ka shtruar asnjë problem. Pasi u publikua raporti mblodha Kryesinë dhe u thash se duhet të kalojmë në aksion, gjë që u mbështet prej tij.

Një ditë më pas e thirra dhe i kërkova mendimin që kishte, më tha jam dakord, pas kësaj pa thënë asnjë fjalë doli veçmas. Mashtroi një grup njerëzish që i shkuan në kafe për akt miqësor por qëllimi ishte tjetër.

Drekat e darkat me Ergys Agasin gjithashtu. Shkoi në Durrës dhe mblodhi eksponentë të PD që tradhtuan PD dhe nuk punuan asnjë ditë në fushatë.

Në Elbasan sallën ia mbushi Suel Çela. Në mënyrë të çuditshme edhe ky përsëri fatin e Lul Bravës do të ketë”, tha ai.

Gjykata e Lartë i ka dhënë fund çështjes së shkarkimit të Gledis Nanos nga posti i drejtorit të përgjithshëm të Policisë së Shtetit me firmën e Edi Ramës.

Pasi fitores në dy shkallët e para nga Nano, qeveria e çoi dosjen në Gjykatën e Lartë, por kjo e fundit ka lënë në fuqi vendimet e mëparshme.

Kjo do të thotë se Gledis Nano përfundimisht do të dëmshpërblehet nga shteti me 100 milionë Lekë për shkak se shkarkimi i tij nga detyra është cilësuar i paligjshëm.

Kujtojmë se Gledis Nano u shkarkua nga detyra më 31 gusht 2022, me propozim të ish-ministrit të Brendshëm Bledi Çuçi, ndërsa kryeministri Edi Rama kishte deklaruar publikisht se i kishte kërkuar dorëheqjen.

Arsyeja zyrtare për largimin e tij ishte “mosrealizimi i objektivave”. Një vendim që Gledis Nano e konsideroi të paligjshëm dhe ndërmori të gjithë hapat ligjorë për dëmshpërblim, duke i marrë shtetit 100 milionë lekë të vjetra, ose 60 pagash mujore, sa mandati 5 vjeçar që duhet të qëndronte në detyrë.

Në të njëjtën kohë kur qeveria e Malit të Zi hodhi në Bruksel një hap historik drejt anëtarësimit në Bashkimin Europian, Shqipëria mbetet ende në pritje të dritës jeshile për këtë objektiv të largët. Një nyje e krijuar në negociata, që quhet IBAR, ka lënë pezull krejt procesin.

Komisionerja për Zgjerimin, Marta Kos e cilësoi përparimin e Malit të Zi si “një hap të madh në rrugën drejt anëtarësimit” dhe “një njohje të qartë të progresit” për qeverinë e vendit fqinj. Vendimi i shteteve anëtare të Bashkimit Evropian për hartimin e traktatit të anëtarësimit për Malin e Zi shënon hyrjen në një fazë të pakthyeshme të procesit të zgjerimit. “Sot, shtetet anëtare vendosën të fillojnë hartimin e Traktatit të Anëtarësimit të Malit të Zi në BE,” deklaroi  Presidenti i Këshillit Evropian, Antonio Costa, i cili e përforcoi këtë mesazh politik, duke theksuar se “për herë të parë që nga viti 2013, Bashkimi Europian nis matjen e kohës për zgjerimin e radhës”.

Pesha e këtij vendimi bëhet më e qartë nëse shihet në kontekstin historik. Mali i Zi aplikoi për anëtarësim në vitin 2008, mori statusin kandidat në 2010 dhe hapi negociatat në 2012. Sot, ai ka mbyllur 14 nga 35 kapitujt negociues dhe, siç u shpreh ministrja për Çështjet Evropiane, Maida Gorçeviç, “ky është një tjetër konfirmim se jemi në rrugën e duhur për t’u bërë anëtari i 28-të i BE-së deri në vitin 2028”.

Hartimi i traktatit për antarësimin e Malit të Zi në Bashkimin Europian shihet si një akt besimi politik, që vjen vetëm kur një vend konsiderohet i parashikueshëm në kursin e tij reformues.

Po Shqipëria?

Në të kundërt, për qeverinë e Shqipërisë ende diskutohet nëse e meriton apo jo këtë besim. Procesi i negociatave është pezull në raportin e ndërmjetëm për “Themeloret”, IBAR, një instrument kyç që kushtëzon çdo hap të mëtejshëm. Pa një vlerësim pozitiv, që përfshin shtetin e së drejtës, drejtësinë dhe institucionet demokratike, negociatat nuk mund të avancojnë.

Diskutimet e fundit në Grupin e Punës për Zgjerimin, COELA, të zhvilluara më 17 prill në Bruksel, tregojnë se drafti i Pozicionit të Përbashkët për Shqipërinë mbetet ende i hapur. Edhe pse disa vende, si Gjermania, Franca apo Holanda, kanë konstatuar se teksti “ka lëvizur në drejtimin e duhur”, të tjera e konsiderojnë atë “tepër kërkues dhe të detajuar”, sidomos në krahasim me rastin e Malit të Zi. Presidenca e BE-së u kërkoi shteteve anëtare të dorëzojnë komente të reja deri më 22 prill, ndërsa drafti pritet të rikthehet për diskutim më 28 prill, një datë që mund të përcaktojë nëse Shqipëria do të marrë një sinjal pozitiv apo do të mbetet në vendnumëro.

Në këtë pikë, ngërçi është politik. Vendimi i kryeministrit Rama për të mos lejuar arrestimin e ish-zv.kryeministres Belinda Balluku me votat e 82 deputetëve të Partisë Socialiste është lexuar në Bruksel si një test i dështuar për vullnetin politik në luftën kundër korrupsionit në nivelet e larta. Reagimet diplomatike që pasuan, përfshirë mesazhe të forta nga ambasadat e vendeve të BE-së, e bënë të qartë se çështja lidhej drejtpërdrejt me procesin e integrimit.

Por në pamundësi për t’u fokusuar në adresimin e këtyre shqetësimeve, politika e jashtme e Tiranës ka marrë një drejtim më të paqartë dhe në disa raste kontradiktore me linjën e Bashkimit Evropian.

Devijimet e Ramës nga linja e BE

Prej dekadash, Shqipëria ka punuar që të linjëzojë sa më shumë politikën e saj të jashtme me atë të Bashkimit Europian. Vetëm në një rast, Edi Rama ka pohuar të kundërtën, për sulmet në Banjskë, ku mbeti i vrarë polici Afrim Bunjaku. Atëherë, kryeministri Rama doli kundër deklaratës së Brukselit duke thënë se: “Moslinjëzimi me politikën e jashtme të Bashkimit Europian, nuk është fjalë goje për një vend kandidat që synon anëtarësimin në BE”.

Por sapo SPAK goditi disa nga njerëzit e tij më të afërt, Belinda Ballukun dhe Ergys Agasin, kryeministri Rama ka devijuar në mënyrë të ndërgjegjshme nga linja e politikës së jashtme të Bashkimit Europian me disa shembuj të hapur.

Editoriali i përbashkët i Edi Ramës dhe Aleksandër Vuçiç në “Frankfurter Allgemeine Zeitung”, me titull “Një rrugë realiste drejt BE-së”, ishte një propozim për integrimin e Shqipërisë dhe të Serbisë në Tregun Unik dhe zonën Schengen pa anëtarësim të plotë. Në tekstin që botuan, dy politikanët propozuan një integrim të pjesshëm të vendeve të tyre, që në praktikë zhvendos fokusin nga përmbushja e kritereve te kërkimi i rrugëve alternative.

Vetë njehsimi i qëndrimit të Shqipërisë me atë të Serbisë, e cila ka ruajtur me fanatizëm marrëdhëniet me Rusinë dhe Kinën, dukej si një hap fals i Ramës në një moment tepër delikat, kur në Bashkimin Europian kishte pakënaqësi për “djemtë e këqinj” të unionit që flirtonin me Rusinë. Ky devijim nga Bashkimi Europian vazhdoi edhe më qartë në pozicionimet e tjera ndërkombëtare.

Vizita e Edi Ramës në Izrael, fjalimi i tij në Kneset dhe shtrëngimi i duarve me Netanjahun, ishte një tjetër lëvizje që ndodhte nën vështrimin e pakënaqur të europianëve. Kryeministri i Izraelit, Benjamin Netanjahu është nën akuzë nga Gjykata Ndërkombëtare e Hagës për genocid në masakrat në Palestinë, madje disa vende europiane kishin vendosur ta njohin këtë shtet, kur Edi Rama udhëtoi drejt Jeruzalemit për t’i shprehur gjithë mbështetjen e tij kryeministrit Benjamin Netanjahu. Duke shkuar akoma më tej, Edi Rama u bë pjesë e një konference të organizuar në Izrael ku ishin të pranishëm të gjithë faktorët e së djathtës ekstreme europiane.

Në të njëjtin kontekst regjistrohen edhe flirti ekonomik me vendet e Lindjes së Mesme, hapja e dyerve për investimet e kompanive arabe në Shqipëri, përjashtimi nga gara të kompanive europiane në projekte strategjike si ai i portit të Durrësit, apo edhe pjesëmarrja e Shqipërisë në iniciativa si “Bordi i Paqes”, në një moment kur tensionet mes Shteteve të Bashkuara dhe Bashkimit Evropian ishin theksuar dhe shumica e vendeve të BE-së kishin zgjedhur të mos përfshihen.

Brenda pak muajsh, Shqipëria jo vetëm që nuk e harmonizoi politikën e saj të jashtme me atë të Unionit, por e përforcoi perceptimin për ndjekjen e një kursi tjetër, që bie ndesh me objektivin për integrimin në Bashkimin Europian.

Por më shumë se një aventurë drejt të panjohurës, flirtet e Ramës herë me Beogradin e herë me Jeruzalemin ngjajnë me një lëvizje bllofi gjatë lojës, për të kompensuar mungesën e progresit në reforma. Problemi është se në strategjinë e bllofit nuk ka një të mesme. Rezultatet janë thuajse përherë ekstreme; ose humbje me kosto të rënda, ose fitore e pandalshme. Vetëm se për këtë duhet të bindësh kundërshtarin se je gati të shkosh deri në fund, pa pasur asgjë në dorë./Lapsi.al

“Sali Berisha nuk është më kryetar i PD-së prej datës 04.09.2025. Bazuar në statutin e PD-së, që konsiderohet si “kushtetuta” e Partisë Demokratike, Berisha nuk mund të vazhdojë të ushtrojë këtë detyrë, pasi mandati i tij pengohet nga vetë rregullat statutore. “Kryetari që humbet zgjedhjet, humbet edhe mandatin për të drejtuar partinë”, deklaron kandidatja për kryetare të PD-së, Alesia Balliu.

Balliu ka nisur procedurën ligjore për të ndaluar mandatin e Sali Berishës në krye të partisë. Ajo ka paraqitur një kërkesë-padi në strukturat e PD-së, përmes së cilës u kërkon organeve drejtuese dhe institucioneve përgjegjëse për respektimin e statutit që ta largojnë Berishën nga posti i kryetarit, duke argumentuar se qëndrimi i tij është në kundërshtim me statutin.

Pas këtij hapi, Balliu pritet ta çojë çështjen në gjykatë, me kërkesën për të ndalur mandatin e Berishës. Në një intervistë për Tema, ajo shprehet se e ka ndërmarrë këtë hap e bindur se organet e drejtësisë do ta trajtojnë padinë jo thjesht si një përplasje mes kandidatëve në PD, por si një çështje ligjore që lidhet me respektimin e statutit të njërës prej partive kryesore në vend, e cila ka efekte në nivelin e demokracisë në Shqipëri. Balliu thotë se padia është gati dhe do të depozitohet në gjykatë brenda afateve ligjore.

Megjithatë, Balliu shpreh dyshime për ndikim në drejtësi, jo vetëm nga Berisha, por edhe nga kryeministri Edi Rama, për të cilin ajo thotë se është po aq i interesuar sa Berisha që ky i fundit të mbetet në krye të PD-së. Sipas saj, qëndrimi i Berishës në kundërshtim me statutin i shërben zgjatjes së pushtetit të Ramës, pavarësisht skandaleve të shumta të korrupsionit që, sipas saj, janë bërë publike.

Balliu rikthen gjithashtu akuzat për korrupsion ndaj Berishës dhe familjes së tij. Ajo pretendon se PD është kthyer në një “dyqan tregu” në funksion të familjes Berisha, ndërsa demokratët janë lënë pas dore, njësoj si qytetarët e thjeshtë të vendit. Sipas saj, pasuria e Shkëlzen Berishës rritet vazhdimisht përmes favoreve që i bëhen nga qeveria përmes oligarkëve, ndërkohë që qytetarët e zakonshëm nuk arrijnë të ndërtojnë as një shtëpi.

Ajo flet edhe për përjashtimin e saj dhe vetëpërjashtimin e Ervin Salianjit, duke theksuar se Berisha nuk e pranon garën edhe kur nuk rrezikohet realisht. Balliu nënvizon se çdo vendim i marrë prej tij për përjashtime është nul, pasi, sipas saj, ai nuk është më kryetar i PD-së që prej 4 shtatorit 2025./alfapress.al

Kryeministri Edi Rama pritet të thirret si dëshmitar në seancat e radhës që do të mbahet për dosjen “Partizani”, pasi është kërkuar si dëshmitar për kohën kur ka qenë ish-kreu i Bashkisë së Tiranës. Kërkesa e Sali Berishës është pranuar nga Gjykata e Posaçme.

Mbetet për t’u parë nëse do të ketë një ballafaqim Rama-Berisha, të cilët siç e ka cilësuar kryedemokrati do të jetë “përballja e shekullit”. Megjithatë në studion e emisionit “Opinion” në Tv Klan u diskutua se kur mund të jetë data më e përafërt e këtij ballafaqimi, nëse do të ndodhë…

Blendi Fevziu: A ka një datë të përafërt se kur duhet të zhvillohet kjo seancë?

Eugen Beci: Duke iu referuar faktit që është provë e mbrojtjes, e kërkuar nga mbrojtja. Duke iu referuar faktit që ka shumë dëshmitarë të tjerë, që do mblidhen dhe do thirren për shqyrtim nga prokuroria, do të kemi një kohë të gjatë për të diskutuar nëse do të shkojë, apo jo kryeministri.

Klodiana Lala: Ndoshta nga fundi i dhjetorit, ose fillimi i janarit të vitit të ardhshëm.

Eni Ferhati: Ndoshta e “karikuam” në publik që do të kemi një përballje nesër. Mbas verës mendohet, sepse vetëm lista e SPAK, që ka kërkuar si dëshmitarë, duke nisur nga 30 prilli, që janë 7 dëshmitarët e parë në mos gaboj, por ndërkohë që janë më shumë se 30 dëshmitarë që do të pyeten, duhen disa seanca. Muaji gusht është pushim, mendoj që ndoshta nga tetori do të jemi në këto ujëra.