Ka përfunduar mbledhja e zgjeruar e grupit parlamentar të Partisë Socialiste, e zhvilluar me pjesëmarrjen e ministrave të kabinetit qeveritar.

Gjatë diskutimeve, kryeministri Edi Rama ka kërkuar rritjen e angazhimit në terren, me fokus te komunikimi i drejtpërdrejtë me qytetarët lidhur me procesin e integrimit në Bashkimin Evropian.

Ai theksoi nevojën për intensifikimin e takimeve, por edhe për përforcimin e mesazheve në rrjetet sociale.

Sipas Ramës, vëmendja duhet të përqendrohet veçanërisht te çështjet që lidhen drejtpërdrejt me sfidat e integrimit, duke veçuar sigurinë ushqimore si një nga prioritetet kryesore.

Në fjalën e tij, kryeministri u ndal gjithashtu te nevoja për rienergjizimin e anëtarësisë së Partisë Socialiste, duke kërkuar një rol më aktiv të strukturave në funksion të objektivave politike dhe integruese të vendit.

Nga Andi Bushati

Pas një përiudhe të gjatë lavdie të mveshur me frazat standarte se po i jep fund pandëshkueshmërisë, se po pastron klasën e vjetër politike, se po hap një periudhë të re në historinë e vendit, SPAK do të përballet këto ditë përpara gjykatës me dosjet më të mëdha të akuzave që ka ngritur, ato kundër Metës, Veliajt dhe Berishës.

Ngritja e siparit për gjyqet e tyre të themelit ku do të marrë fund retorika dhe do diskutohet kryesisht për provat, po shoqërohet me një debat të ri: kërkesën konstante të të akuzuarve se proceset duhet të zhvillohen me praninë e kamerave dhe gjithçka të transmetohet live.

Në pamje të parë një kërkesë e tillë mund të duket e diskutueshme. Shumë vende demokratike nuk e lejojnë një praktikë të tillë. Sidomos kur është fjala për figura me impakt të lartë publik dhe me ndikim në opinion, ekziston frika e shkatërrimit të solemnitetit gjyqësor dhe shndërrimi i bankës të të akuzuarit, në një tribunë spektakli politik.

Por, pavarësisht këtyre risqeve nuk ka dyshim se plotësimi i kërkesës së këtyre të akuzuarve VIP duhet të plotësohet pasi ai është në të mirë të intersit publik. Së pari, ligji shqiptar nuk e ndalon transmetimin live të proceseve. Një shembull i mirë, nga të rrallët që mund ti përmendet Gjykatës Kushtetuese, ishte rasti i diskutimit te mandatit si kryebashkiak të Erion Veliajt, ku gjykimi u transmetua drejtpërdrejtë duke i dhënë prioritet parimit të transparencës. Së dyti, kjo transparencë është gati e detyrueshme në kuadër të polemikave që kanë shoqëruar “drejtësinë e re”, që kur ka filluar të merret me politikanët e lartë. Ajo është akuzuar për metoda represive, për intimidim dëshmitarësh, për përzgjedhje selektive të fakteve. Nëse vërtet mëtohet që në këto procese të ruhet, ajo sa ka mbetur nga besueshmëria e reformës, atëherë dyert duhet të jenë të hapura për tu dëgjuar argumentet e të gjitha palëve. Nëse publiku do të bindej nga ballafaqimi mes argumentave të SAPK dhe të akuzuarve të tij, nëse ai do e pranonte si të drejtë dhe të paanshëm verdiktin e GJKKO-së, atëhere një pjesë e kritikave kundrejt prokurorëve dhe gjykjatësve special do të fashiteshin.

Por, ka edhe një arsye tjetër, ndoshta më kryesorja, se përse këto seanca gjyqësore duhet të transmetohen live. Në të vetmin proces politik të deritanishëm, në të parin ku është arritur të merret një vendim i formës së prerë, ai kundër Fredi Belerit, drejtësia jonë ka prodhuar një skandal. Në këtë farsë të nxitur nga Edi Rama, për ti marrë opozitës edhe një nga shtatë bashkitë që pati fituar, drejtësia jonë e re prodhoi një kopje të proceseve të kohëve më të errëta të diktaturës. Duke servirur dhe pranuar dëshmitarë të rremë, të paguar si spiunë policie; duke servirur dhe pranuar procesverbale të falcifikuara përgjimesh; duke servirur dhe pranuar prova të marra ilegalisht; duke servirur dhe pranuar para blerjesh votash që s’mbanin gjurmët e gishtave të të akuzuarve, madje duke mos lejuar as një gje bazike në një proces, si ballafaqimi i dëshmitarëve për të nxjerrë në pah të vërtetën, SPAK dhe GJKKO u bënë pjesë të një farse kriminale, ku drejtësia përdoret si armë politike. Dhe e gjitha kjo u zhvillua pas dyerve të mbyllura që i mundësuan maskarenjve me flamuj nacionalist të fshihnin debatin real për faktet dhe provat.

Pas këtij dështimi kolosal, organet e reja të drejtësisë nuk e kanë më luksin të kërkojnë një besim të dytë, duke u fshehur pas parimit të solemnitetit gjyqësor. Ata duhet të hapin për të gjithë dyert e proceseve ku do gjykohen Ilir Meta, Erion Veliaj dhe Sali Berisha.

Që farsa ndaj “grekut të poshtër” mos përsëritet edhe mbi shqiptarët, që pandehma e predikuar nga ish kreu i SPAK, se gjykata i bindet verbërisht ekipit të tij, të mos bëhet rrugë, që e vërteta të mos jetë monopol i papagallëve të prokurorëve specialë, e mira publike kërkon transparencë. Dhjetra mijra votues që i kanë dhënë besim atyre që do paraqiten në bankën e të akuzuarve, kanë të drejtë të dinë nëse të përzgjedhurit e tyre politikë po ndëshkohen ose jo në bazë të provave dhe jo në emër të një “rrevolucioni” me kostum euroatlantik, që mëton të përdorë drejtësinë për të ndryshuar klasën politike. Prandaj SPAK dhe GJKKO duhet ti pranojnë kërkesat e të paraburgosurve prej tyre. Ky është shansi i fundit për të bindur publikun se këta gjykatës dhe prokurorë e kanë aftësinë dhe ndershmërinë e nevojshme për të qenë në nivelin e sfidës që kanë marrë mbi vete./Lapsi.al 

Debate në GJKKO në seancën për dosjen Veliaj. Në procesin ndaj Erion Veliajt në GJKKO, avokati Plarent Ndreca i kërkon gjykatës transmetim Live të seancës, nderkohe qe Altin Dumani ka refuzuar prere!

Pjese nga diskutimet:

“Ne si organ akuze nuk kemi problem, por transmetimi live mund të shqetësojë procesin. Në çështjet penale ku ka dëshmitarë, veçanërisht bashkëpunëtorë të drejtësisë, nuk lejohet transmetimi live. Kjo nuk ndodh as në rajon, as në Evropë dhe as në gjykatat federale në SHBA. Mund të lejohen kamera për disa pamje filmike, por dëshmitarët dhe bashkëpunëtorët nuk mund të ekspozohen”, tha Dumani.

Prokurori Ols Dado replikoi me avokatin Plarent Ndreca:

Dado: “Pse vetëm ti do të flasësh? Prit, se ka kërkuar fjalën prokurori.”

Ndërsa kreu i SPAK, Altin Dumani, u shpreh:

“Kemi dy muaj që kemi kaluar në themel dhe vijojmë me seancat paraprake. Avokatët e Veliajt, në mënyrë të përsëritur, paraqesin kërkesa artificiale, sipas vlerësimit tonë, me qëllim zgjatjen e shqyrtimit gjyqësor.”

Ish-presidenti Ilir Meta ka reaguar pas seancës në Gjykatën e Posaçme (GJKKO), duke e cilësuar procesin si të dirigjuar dhe të kontrolluar nga faktorë të jashtëm.

Ai tha se “nuk ka asnjë çudi nga drejtësia me regji e soroiste”, duke akuzuar se gjykimet zhvillohen sipas një skenari të paracaktuar.

Sipas tij, sot drejtësia nuk respekton as Kushtetutën, as Konventën Europiane për të Drejtat e Njeriut, dhe as thirrjet e Komitetit Shqiptar të Helsinkit.

Ai akuzoi se procesi gjyqësor është i zvarritur me qëllim, duke thënë se “prokurorët dihet se kush i komandon”.

Reagimi i Metës:

Asnjë çudi nga Drejtësia me Regji. 

Edhe kur Shqipëria nuk ishte anëtare e Këshillit të Europës, funksionarët publikë gjykoheshin pranë avokatëve të tyre dhe çdo seancë gjykimi transmetohej live. 

Por në drejtësinë e George Sorosit, të realizuar me angazhimin e ditur të Charles McGonigal dhe plot të tjerëve si ai, në vend që të respektohet Kushtetuta, Konventa Europiane për të Drejtat e Njeriut dhe thirrja e Komitetit Shqiptar të Helsinkit, shndërrohet në normë standardi i gjykimit të një terroristi në Francë dhe jo standardi i gjykimit të Presidentit të Francës, Sarkozi. 

Madje drejtësia sorosiste nuk respekton as standardin e gjykimit të ish-Kryeministrit Nano dhe ish-funksionarëve të regjimit komunist, kur e theksoj, Shqipëria nuk ishte anëtare e Këshillit të Europës. 

Loja e zvarritjeve të seancave, me sebepe nga më të ndryshmet, vazhdon nën dirigjimin e prokurorëve, të cilët dihet se kush i komandon.

Sidoqoftë, ka një “koherencë” të plotë, nga standardet e rrëmbimit tim më 21 tetor 2024 e deri te standardet e sotme të gjykimit, sepse për këtë regjim kukullash, të jesh patriot ne fakt do të thotë të jesh terrorist. 

Jam krenar për patriotizmin tim dhe kjo më bën të pamposhtur dhe superior përballë burracakëve, që i shërbejnë bandës ndërkombëtare të George Sorosit dhe Kuislingut të tij në Tiranë, që ka nxjerrë në shitje çdo interes kombëtar. 

Aktori i humorit, Florjan Binaj i cili së fundmi shpalli kandidaturën e tij të pavarur për të marrë në dorë frenat e Bashkisë Tiranë, ka zbuluar gjendjen aktuale të Liqenit të Tiranës, uji i të cilit është ndotur nga ujërat e zeza dhe mbetjet e betonit nga ndërtimet e shumta që janë bërë gjatë viteve të fundit.  

Përmes një postimi të bërë në faqen e tij zyrtare në Instagram, Binaj publikoi pamjet e liqenit artificial të Tiranës nga lart për të cilin shkruan se është kthyer në një vendngrumbullim të ujërave të zeza nga mbindërtimet e viteve të fundit.

“Kjo pamje nga lart e liqenit Artificial të Tiranës, tregon më së miri shkatërrimin e një baseni ujor kaq të madh dhe kthimin e tij në një vëndgrumbullim të ujrave të zeza nga mbindërtimi i viteve të fundit ku të gjitha pallatet shkarkojnë në liqen” shkroi Binaj në postimin e tij.

Më tej personazhi i njohur për shqiptarët, shkroi se për këtë situatë nuk është e nevojshme që të jesh i specializuar në fushën e mjekësisë që të kuptosh pasojat e rënda që gjendja e liqenit të Tiranës shkakton te njerëzit duke nënvizuar se mund të përhapen lehtësisht infeksionet dhe sëmundjet.

“Nuk ka nevojë të jesh as biolog dhe as mjek për të kuptuar që nuk ka asgjë të shëndetshme tek ngjyra që ka marrë liqeni, i cili me rritjen e temperaturave, do jetë ushqyesi më i madh i përhapjes së infeksioneve dhe sëmundjeve…madje edhe lumi Lana që të gjithë e dimë si është, ka disa vënde që nuk janë kaq të ndotura” shtoi më tej aktori.

Në përmbyllje të reagimit të tij Binaj nënvizoi se duhet reaguar menjëherë për këtë situatë e cila prek shëndetin e të gjithë qytetarëve, që nga fëmijët e deri te të moshuarit.

“Kjo filozofia e verbër “s’na gjen gjë nga shkatërrimi i natyrës” duhet të marrë fund sa më shpejt sepse po e paguajmë padrejtësisht me shëndetin dhe jetën tonë dhe të fëmijëve tanë, e nëse nuk ju dhimbsen as fëmijët, mos prisni t’ju quajnë njerëz” përmbylli reagimin e tij Florjan Binaj. 

Ish-deputeti i PD-së, Ervin Salianji i është përgjigjur akuzave të kreut të opozitës, Sali Berisha. Ky i fundit e akuzoi demokratin se po i shërben Partisë Socialiste dhe se ai do të ketë fatin e ish drejtuesit demokrat Lulzim Basha.

Në një reagim në rrjete sociale, Salianji, ironizon Berishën duke iu referuar si “Sali kolltuku”.

Përgjigje Sali kolltukut; 36 vite në pushtet në kurriz të demokratëve i kanë krijuar mendësinë që kushdo ka detyrim të jetë skllav i tij.

Nuk ka asgjë më të vjetër në politikë sesa kur dikush që ka humbur lidhjen me realitetin përpiqet të shpikë armiq për të fshehur frikën nga gara.

Të më krahasosh me këdo tjetër është mënyra më e lehtë për të shmangur thelbin: sot problemi nuk janë demokratët që duan fitore, por fakti që një pjesë e lidershipit ka humbur besimin e njerëzve dhe po i trembet çdo zëri ndryshe. Unë nuk kam përfunduar në “krahët” e askujt. Isha dhe jam i lirë, siç edhe sot po them atë që të gjithë mendojnë: e përbuzin Sali kolltukun për uzurpimin që i ka bërë Partisë Demokratike, por e shajnë me rrënjë e degë vetëm në tavolina. Nuk kam qenë dhe nuk do të jem kurrë pjesë e pazareve. Kam qenë përballë pushtetit, jo në shërbim të tij. Dhe për këtë kam paguar çmim personal.

Ata që sot flasin për “fate” të të tjerëve duhet të shohin fatin e tyre politik: një lidership që nuk frymëzon më, që nuk fiton më dhe që i shmanget çdo përballjeje reale. Kur nuk ke përgjigje për dështimin, shpik histori. Kur nuk ke mbështetje, sulmon këdo që ngrihet. Të kuptoj që unë jam problemi yt, sepse me Ramën je ulur këmbëkryq për reforma, je ulur për leje, licenca, koncesione, përfitime. Dil e fol për Ermal Beqirin, për lejet e familjarëve të tu në Lalëz, në gjysmën e Tiranës, në jug e kudo në Shqipëri.

Sa për gysrat, pyet fare afër teje si i kanë ndarë pazaret, përfshirë edhe ndërhyrjen te gjykata për dënimin tim. Për Olti Gjoken që përmend, t’i themi disa gjëra: kur erdhe në burg, nuk erdhe të më takoje mua, por kërkove të takoje këta. Nuk është faji im që edhe këta i kishe gënjyer dhe nuk të dolën në takim.

Lulzim Bashën e solle e mbajte dhe ta fali partinë. Me mua i ke bërë hesapet gabim: do të çmontoj ty dhe autokratin e qeverisë. Regjimi Rama-Berisha është i përbuzur nga shqiptarët! Dhe meqë ke mbështetje, dil në garë, mos u fshih si frikacak.