Pas mbledhjes së Këshillit të Ministrave, u komunikuan vendimet e marra këtë të mëkurë, 29 prill.

Ministrja e Arsimit, Mirela Kumbaro, vuri sërish theksin te procesi i integrimit të vendit në Bashkimin Europian. Në këtë kuadër, ajo deklaroi se qeveria ka trefishuar buxhetin për kërkimin shkencor.

“Dua të ndaj me ju sot një lajm që sidomos është i mirë për botën e kërkimit shkencor, për universitetet, publike dhe jo publike por edhe për çdo institucion tjetër apo kompani private që është e interesuar në produkte të kërkimit shkencor sepse mbyllëm sot me vendim të Këshillit të Ministrave aktin e 12-të nënligjor, në zbatim të ligjit për Shkencën të vitit 2024 që është një paketë shumë e rëndësishme për organizimin e institucioneve dhe të kërkimit shkencor në përgjithësi në përputhje me direktivat dhe rregulloret e Komisionit Europian dhe të Bashkimit Europian, me mbylljen e këtij akti në bëjmë edhe veprimin e fundit ligjor në detyrimet që kemi për Kapitullin 25, është kapitulli për kërkimin shkencor, për të cilin po punohet prej disa vitesh, një ndër dy kapitujt e parë që do të mbyll negociatat brenda këtij viti”, u shpreh Kumbaro.

U ndal edhe te projektet pas shkolle dhe gjithë programet e tjera për nxënësit.

“Janë projekte kanë 10 vjet që zhvillohen në formate të ndryshme. Në shkolla ku janë bërë investime të rëndësishme, të jenë të hapura edhe aktivitetet pas mbarimit të mësimit. Gjithë paketa e aktiviteteve që shoqërojnë jetën edukative të nxënësve. Do të shtojmë edhe Olimpiadën e Gjuhëve të Huaja”, tha Kumbaro.

“Shkollat do të pajisen me hapësira për të konsumuar ushqim”, shtoi ministrja.

Ministrja qetësoi të gjithë prindërit sa i takon shqetësimeve që kanë lindur ditët e fundit për disa gra të mbuluara apo një furgon pranë shkollave në zona periferike të Tiranës.

Pyetja e gazetarit: Një automjet që po qarkullon pranë shkollave, i përket iranianëve që janë strehuar në Manzë? A ka një plan për të sqaruar prindërit?

“Dua t’ju siguroj që masat e sigurisë janë të garantuara 100%”, u përgjigj Kumbaro, duke vënë theksin te bashkëpunimi me Policinë e Shtetit.

“Patrullat janë aty çdo ditë, për të garantuar të gjithë perimetrin e shkollës. Po rrisim numrin e oficerëve të sigurisë, janë persona kontakti në komunikim të rregullt me Policinë për çdo sinjalizim”, përfundoi ajo.

Socialisti Erion Braçe, i ftuar në “Shqipëria Live” ka folur edhe për përplasjet brenda PS-së me Elisa Spiropalin.

Braçe u shpreh se brenda Partisë Socialiste ka persona që kanë marrë pozicione që nuk i meritojnë.

Sidorela Gjoni: Dje ka pasur diskutime brenda PS-së. Përplasja në distancë apo edhe ballë për ballë e asaj ajo që ndodh në PS. Keni ju një mendim për zërat e ndryshëm në PS-së, një koment që u diskutua dje ishte ai që mund të ketë bërë Rama drejtuar Elisa Spiropalit: “PS-ja dhe unë jemi investuar tek ti, ti nuk do të flasësh më”.

Erion Braçe: PS ja ka investuar tek ne jo ne tek PS-ja.

Sidorela Gjoni: Te Spiropali në këtë rast

Erion Braçe: Unë flas për veten, nuk preferoj të flas për emra. Unë mendova që gjëja nuk po i thuhej vetëm zonjës Spiropali, por edhe mua ose të tjerëve në sallë. Unë vazhdoj të jem deficitar në PS. Në PS ka shumë njerëz që nuk e kanë pasur mundësinë që unë kam pasur. Janë socialistë të thjeshtë, në etapa të ndryshme, por edhe ata kanë pritur nga PS dhe nuk kanë marrë atë që meritonin.

Sidorela Gjoni: Ka të tjerë që kanë marrë më shumë se çfarë kanë merituar?

Erion Braçe: Patjetër që ka plot.

Sidorela Gjoni: A është Spiropali rast i tillë?

Erion Braçe: Nuk jam unë të bëj gjykatësin e kontributeve në PS. Mendoj që është partia që përmes proceseve demokratike t’i japi atë që meritojnë.

Sidorela Gjoni: A ka përplasje brenda PS mes Spiropalit dhe Ramës?

Erion Braçe: Për çfarë? Nuk preferoj të flas për gjërat e shtëpisë. E ka parim timin që gjërat e shtëpisë mbeten në shtëpi, nuk dalin jashtë.  Zonja Spiropali ka ngritur disa shqetësime që edhe qëndrojnë, edhe për mua qëndrojnë edhe për të tjerë aty, edhe për kryeministrin qëndrojnë. Në momentin që themi që duhet të rienergjizojmë PS, që duhet ta hapim PS, duhet ta bëjmë më demokratike, praktikisht kemi pranuar një seri problemesh që duhen kuruar.

Ish ministrja e Jashtme, njëherësh deputete e Partisë Socialiste, Elisa Spiropali i është përgjigjur kryeministrit Edi Rama pas përplasjes në mbledhjen e Grupit Parlamentar dhe debatit të shkaktuar nga qëndrimet e saj publike, si edhe mungesa në seancën për imunitetin e Belinda Ballukut.

Në një reagim të gjatë, ajo thekson se kritikat e brendshme nuk duhet të kthehen në ndëshkim publik dhe se paralajmërimet politike nuk duhet të shërbejnë si presion ndaj mendimit ndryshe.

Ajo adreson paralajmërimin e kryeministrit Edi Rama se do të përjashtohet nga Grupi Parlamentar, ndërsa thotë se nëse qëndrimet e saj për mënyrën se si funksionin partia dhe qeveria konsiderohet arsye për përjashtim, atëherë le ta bëjë dhe ta largojë nga grupi socialist.

REAGIMI I PLOTE:

Më përjashto

Debatet e brendshme, sado të forta, nuk duhet të shndrrohen në spektakël ndëshkimor publik.

Nëse kjo ndodh, problemi nuk është më mospajtimi, është frika nga mospajtimi.

Ky fakt kokëfort, ky konstatim i dukshëm, më tepër se vetë paralajmërimi, më detyron të flas.

Kur paralajmërimi publik bëhet instrument kërcënimi, heshtja nuk është më maturi, është dorëzim.

Nëse qëndrimi im për mënyrën si po funksionon partia, qeveria, shteti, konsiderohet arsye për përjashtim, atëherë po e them qetë dhe qartë: Më përjashto.

Jo si sfidë personale. Jo si dramë politike. Jo si show mediatik. Por si provë se problemi nuk është te fjala që ngre shqetësim, por te sistemi që shqetësimin nuk e duron.

Nuk kam sulmuar Partisë Socialiste. Kam kritikuar modelin që në disa aspekte po dëmton edhe Partinë Socialiste.

Kam folur për ndarjen e partisë nga shteti. Për rrezikun që politika të zëvendësohet nga administrimi. Për një logjikë kontrolli. Ku struktura burokratike dhe pushteti administrativ rrezikojnë të marrin vendin e përfaqësimit politik.

Nëse këto konsiderohen arsye për përjashtim, atëherë pyetja nuk është pse flas unë. Pyetja është pse këto gjëra nuk lejohen të thuhen.

Pushteti nuk dobësohet nga kritika. Pushteti dobësohet kur humb aftësinë për vetëkorrigjim.

Nëse në një forcë politike që ka lindur si projekt emancipimi kombëtar, kritika trajtohet si devijim, atëherë problemi është më i thellë se çdo debat. Është krizë kulture politike.

Nëse të kërkosh që institucionet të mos kontrollohen, personalizohen, instrumentalizohen, është faj, atëherë më përjashto.

Nëse të kërkosh garë e meritë, brenda e jashtë partisë është faj, më përjashto.

Nëse të kërkosh që socialistët të mos zëvendësohen nga një model “drejtorokracie”, ku kontributi politik zbehet përballë kontrollit administrativ, qenka mungesë disipline, më përjashto.

Nëse të mendosh se pushteti duhet të njohë vetkufizim, dhe nuk duhet të njësohet me strukturat që e rrethojnë, qenka herezi e papranueshme, më përjashto.

Nuk po mbroj një pozicion. Aq më pak një kolltuk. Kryetarllëkun dhe ministërllëkun nuk ma ka lënë gjyshi apo gjyshja. Po mbroj një parim.

Në politikë mospajtimi nuk është thyerje e besnikërisë.

Mospajtimi është forma më e lartë e besnikërisë.

Kur refuzimi për t’u bërë pjesë e një automatizmi votash në Parlament interpretohet si largim nga grupi, atëherë problemi nuk është disiplina, por ideja se bindja kërkohet e verbër, pa arsyetim, pa marrë parasysh pasojat.

Kur refuzohet bindja si ritual, nuk po mbrohet uniteti, por po kërkohet nënshtrim.

Kur ndërgjegjja trajtohet si shkelje disipline vetëm sepse nuk dakordësohet me automatizmin e veprimeve, atëherë problemi nuk është mospajtimi, por modeli që e ngatërron bindjen me nënshtrimin, duke tentuar të normalizojë deri edhe abuzimin. Nëse edhe këtë e kam gabim, më përjashto.

Por të paktën të bëhet e qartë se përjashtimi nuk po ndodh sepse dikush ka tradhtuar partinë. Po ndodh sepse dikush ka refuzuar të heshtë për mënyrën si po vepron pushteti në emër tësaj.

Dhe kjo nuk është çështje personale. Është çështje se si kuptohet politika. Çfarë ndodh me një parti kur qoftë edhe një akt politik mosvotimi shihet si armiqësi? Çfarë ndodh me një shtet kur kundërshtimi trajtohet si kërcënim? Çfarë ndodh me një shoqëri kur bindja kërkohet si nënshtrim?

Këto nuk janë pyetje për fatin tim, të cilin e bëj vetë pa ndihmën e askujt. Janë pyetje për mënyrën si qeveriset.

Kërcënimi për përjashtim nga grupi më shqetëson më pak se ideja se mund të normalizohet mendimi që një grupim politik duhet të funksionojë përmes frikës.

Një formacion politik ku askush nuk kundërshton, nuk është i fortë. Është i heshtur dhe duhet ruajtur nga zgripi.

Heshtja politike ka qenë gjithmonë paralajmërim i së keqes.

Jo rrallë, nuk tremb forca reale e kundërshtarit.

Tremb jehona që i bëhet frikës.

Shumë struktura kontrolli mbahen jo aq nga forca e tyre, sa nga përfytyrimi i rrejshëm që të tjerët kanë për forcën e tyre, për mekanizma që mbijetojnë nga frika që prodhojnë. Nëse nuk dakordësohemi as për kaq, më përjashto.

Nëse nuk respektohet e drejta të flas, madje dhe të bërtas, kur familja ime politike fillon të ketë frikë nga fjala, nuk ka dilemë, zgjidhja është 1, më përjashto.

Avokati Plarent Ndreca ka komentuar vendimin e Gjykatës së Posaçme kundër Korrupsionit dhe Krimit të Organizuar (GJKKO), e cila rrëzoi kërkesën që kryebashkiaku i Tiranës, Erion Veliaj, të mos qëndrojë në kafaz gjatë seancave gjyqësore.

Teksa foli në News24 për mungesën e tij në seancë, Ndreca theksoi se ai nuk ishte i pranishëm për shkak se nuk i lejohet të jetë krah avokatit dhe se kjo nuk ka lidhje me ndërhyrjen mjekësore që Veliaj ka kryer pak ditë më parë.

I pyetur mbi ndërhyrjen kirurgjikale të Erion Veliajt, Ndreca sqaroi se bëhet fjalë për një ndërhyrje dermatologjike.

Ndreca: Mungesa e tij nuk ka lidhje me ndërhyrjen, por prezenca e tij duhet të jetë krah avokatit të tij për të realizuar një mbrojtje efektive, dinamike, siç parashikohet nga Konventa Evropiane e të Drejtave të Njeriut. Nuk mund të trajtohet me një kufizim që i kufizon të bëjë një mbrojtje efektive.

Është bërë e qartë edhe nga vendimmarrje të tjera se kafazi prej xhami nuk është rregull, është përjashtim, kur masat e sigurisë e imponojnë prezencën brenda kafazit prej xhami, por mesa duket, kafazi prej xhami përdoret për të diskriminuar pozicionin e barabartë referuar Kushtetutës që duhet të ketë personi nën akuzë që është i pafajshëm dhe prezumohet si i tillë.

Pyetje: Pse u operua Veliaj?

Ndreca: Ishte një ndërhyrje që lidhet me lëkurën e tij, pra një ndërhyrje që ka të bëjë me lëkurën, puçrra siç i themi ne, se nuk e di në terma mjekësorë. Nuk është e rrezikshme.