Ministri i Shtetit për Pushtetin Vendor, Ervin Demo, foli në konferencë për mediet, nga Kryeministria.

Sipas tij, brenda kësaj jave do të prezantohen një sërë nismash, me në fokus qytetarin.

“Për të qenë të qartë, se ne do të jemi në ndihmë të bashkive që të rrisin cilësinë e shërbimeve. Kuptohet që kjo kërkon financim, qeveria është e gatshme dhe besoj që Rilindja 2.0 do të jetë një program i financuar plotësisht”, tha ai.

“Jo më larg se dje, kemi pasur rastet e para në disa bashki për zjarret në territor. Po punojmë për sezonin, Ministria e Pushtetit Vendor do të jetë në një rol koordinues. Ne jemi të bindur se 2026-a ka një përgatitje më të mirë logjistike në tërësi, qoftë për kapacitetet lokale dhe ato qendrore. Duhet të ketë sensibilizim, duhet të bëjmë shumë kujdes me mënyrën si sillemi në territor”, deklaroi ministri sa i takon situatës me zjarret në vend.

“Do të kemi një paketë mbështetëse për të gjithë ata që janë në vijën e parë për të përballuar këto episode. Në fillim të sezonit, do të merren hapat e duhur për të garantuar motivimin e duhur të burimeve njerëzore”, bëri me dije Demo.

Këshilltari i PD-së në Bashkinë e Tiranës, Ilir Alimehmeti, tha në A2CNN se zgjedhjet e parakohshme janë e vetmja zgjidhje pas 36 ditëve protestë para Kryeministrisë.

“Vazhdoj mendoj që nëse duan ta provojnë se ku jemi me këtë lloj mesazhi, çfarë prodhoi, kjo s’bëhet dot ndryshe përveçse me një palë zgjedhje. Nuk analizojmë dot sloganet, slogane ka pasur edhe PD në protestat e veta, apo çdo parti tjetër”, tha Alimehmeti.

Ai theksoi se kërkesa që i bashkon të gjitha forcat dhe rrymat në protestë është dorëheqja e kryeministrit Rama.

“Kërkesa që i bashkon të gjithë rrymat në protestë është dorëheqja e Edi Ramës. Kam parë një pankartë që ishte më domethënësja: “Bashkë deri sa dorëheqja të na ndajë”. Edi Rama duhet të largohet, në këtë emërues të përbashkët janë të gjitha forcat aty, dhe është rezistencë e madhe. Janë më afër objektivit se sa nga dita që e nisën”, u shpreh Alimehmeti.

Kryeministri Edi Rama ka reaguar ndaj protestave qytetare që prej 18 ditësh po zhvillohen në Tiranë dhe qytete të tjera të vendit, por edhe në Diasporë, ku kërkohet largimi i tij nga pushteti.

Rama kritikoi ata protestues, që sipas tij, po e shndërrojnë protestën në një demonstrim politik.

Sipas tij një pjesë të protestuesve dhe mbështetësve të tyre po përhapin teori konspirative, gjuhë bullizuese dhe refuzim të fakteve, duke i cilësuar si “sorra dhe korba” që ushqehen me zhurmën dhe konfliktin.

Postimi i Ramës:

RRUGA PËR NË FERR ËSHTË E SHTRUAR ME QËLLIME TË MIRA, thotë një fjalë shumë e moçme, dhe ka një arsye pse kjo shprehje ka mbijetuar për shekuj.

Ajo nuk i zhvlerëson qëllimet e mira. Përkundrazi. Qëllimet e mira janë A-ja e domosdoshme për krejt alfabetin e etikës së angazhimit publik. Por rruga e njerëzimit na mëson se qëllimet e mira assesi nuk mjaftojnë. Përkundrazi.

Historia është plot me zhvillime të nisura me sloganet më fisnike dhe emocionet më të sinqerta, por të përfunduara në intolerancë, fanatizëm apo shkatërrim, si rezultat i këputjes së lidhjes së perceptimit me realitetin, imagjinatës me faktet dhe shqetësimit me arsyen.

Prandaj nëse qëllimet e mira nuk i nënshtrohen provës së fakteve, nëse pasioni për ndryshim nuk drejtohet nga arsyeja dhe nëse bindjet e forta nuk shoqërohen me dëshirën për të dëgjuar, distanca mes mbrojtjes së një parimi, një qëllimi apo një kauze dhe shndërrimit të tyre në dogmë përjashtuese bëhet shumë e shkurtër. Dhe mu kështu, rruga për në ferr nuk shtrohet me qëllime të këqija, por me qëllime të mira që nuk pranojnë të maten me realitetin.

Unë kam simpati të sinqertë për këdo që në këtë protestë hyri nga alarmi i natyrës në rrezik. Madje kjo formë estetike e demonstrimit, me siluetat e flamingove rozë, më gëzon me hijeshinë që përndryshe do t’i mungonte një proteste qytetare për natyrën të kthyer ngutshëm në një demonstrim politik të skamur në ide, të varfër në argumenta, të degraduar në fjalor dhe të shëmtuar në bullizmin e tij rrugor apo digjital ndaj kujtdo që mendon ndryshe.

Por pikërisht kjo fotografi e bukur, më rikthen tek fjala e urtë e fillimit dhe “rruga e ferrit”.

Sepse problemi nuk janë flamingot. Qëllimi i tyre është i mirë. Problemi është se flamingot nuk pranojnë të dëgjojnë faktet, të diskutojnë zgjidhjet dhe të bashkërendojnë forcat me institucionet dhe me burimet serioze të ekspertizës, për të mbrojtur gjithçka duhet duke realizuar projektin e duhur. Kësisoj ata bëhen vegla e sorrave dhe korbave që i kanë rrethuar.

Unë i kam dëgjuar flamingot dhe i kuptoj ata. E respektoj pa paragjykim shqetësimin e tyre, pikërisht sepse ka qenë gjithnjë edhe i imi. Ajo që nuk arrij të kuptoj është pse flamingot nuk duan të ndahen nga sorrat që ushqehen me zhurmën, me shpifjen, me teoritë konspirative dhe korbat që me bullizmin e me refuzimin kategorik të çdo fakti, kërkojnë të marrin peng Shqipërinë?!

Flamingot nuk e humbasin  bukurinë e tyre nëse angazhohen në diskutimin e dobishëm për të ardhmen e zonës dhe rrugën e zhvillimit të Shqipërisë. Ndërsa sorrat dhe korbat mbeten thjesht e vetëm ata që janë, qysh prej 28 nëntorit të 1912-ës kur morën rolin e hijes që përndjek Shqipërinë, por pa shans që të shtrojnë një rrugë ferri me qëllimet e mira të flamingove…

Taulant Balla ka komentuar largimin e deputetes Marjana Koçeku nga grupi parlamentar i Partisë Socialiste, duke u ndalur te mënyra e komunikimit institucional dhe detyrimet e deputetëve.

Gjatë deklaratës së tij, Balla u shpreh se mungesa e njoftimeve zyrtare dhe komunikimi informal nuk mund të zëvendësojnë procedurat parlamentare, ndërsa theksoi edhe përgjegjësinë që kanë përfaqësuesit e zgjedhur ndaj mandateve të tyre dhe votuesve.

“Unë jam bariu dhe më thoni që unë nuk kam një njoftim që një koleg të sjellë një shkresë; deri të premten kam pasur komunikim. Të mos harrojmë që ne kemi mandate përfaqësuese. Të gjithë ne, deputetët e PS-së, jemi këtu se na kanë votuar socialistët. Të shkojnë e ta provojnë njëherë pa grushtin dhe trëndafilin, si dalin.

S’bëj analizë për një deputete të re. Një deputete e re që u ftua të jetë pjesë e PS-së, një ditë të bukur pasi mori medalje, tha s’dua të vij më në punë.

Njerëzit duhet të njoftojnë zyrtarisht. Ku ta di unë që s’i kanë mbyllur Facebook-un. Unë e kam marrë në telefon, s’ma ka hapur”, tha ai.