I ftuar në DritareTV në emisionin Dekalog nga Roland Qafoku, Ish-deputeti i LSI Lefter Maliqi e mbrojti figurën e Metës, duke e cilësuar arrestimin e tij si “arrest politik”. Një shfaqje force nga ana e pushtetit për të goditur opozitën.

Ai theksoi se Meta, ndryshe nga të tjerët, nuk i është shmangur kurrë drejtësisë dhe gjithmonë u është përgjigjur thirrjeve të prokurorisë. 

Maliqi u ndal edhe te situata brenda Partisë së Lirisë, duke pranuar se mungesa e liderit historik ka krijuar një vakum, por kritikoi ashpër ata që, sipas tij, e braktisën atë për interesa personale. 

Ai solli në vëmendje “mosmirënjohjen” si një fenomen të përhapur në politikën shqiptare. Për të ardhmen, Maliqi shprehu një urim dhe një bindje: 

“Urimi dhe bindja ime është që kur të dalë nga burgu, do të bashkohen me Monikën. Kjo është dëshira dhe besoj që do të ndodhë,” tha ai. 

Ai argumentoi se familja ka qenë historikisht arma më e fortë e Metës dhe se ribashkimi i tyre do të ishte thelbësor për të ardhmen politike.

Ish-deputeti i Partisë Demokratike Ervin Salianji nuk e hedh poshtë mundësinë që një ditë të garojë për kryetar të forcës më të madhe opozitare, por me gjasë jo vitin tjetër.

I ftuar në Top News, Salianji tha se ka ambicie për të garuar, por sipas tij, nuk është tani momenti i duhur.

“Jam i bindur që Partia Demokratike do të jetë një parti që bën të mundshëm rotacionin në Shqipëri. Nuk ka zgjedhje tani në PD, ka një diskutim për farsën ose se si mund të forcohet PD dhe në këtë moment unë jam duke bërë atë, betejën opozitare, diskutimet me njerëzit. Me njerëz që e duan opozitën si një instrument për të ndryshuar shoqërinë, jo vetëm për ambicie personale. Kushdo që është në politikë ka ambicie, nuk mund të them, por që ky nuk është momenti”, u shpreh Salianji.

Ai tha se strategjia kryesore e opozitës duhet të jenë protestat masive në rrugë, si mënyrë për të paralizuar mekanizmat e qeverisë për të vjedhur zgjedhjet.

“Duhet të ketë protesta masive, në rrugë. Duhen protesta masive për të paralizuar veprimtarinë e qeverisë për të shkuar në zgjidhje konkrete. Në këtë moment kur ka dalë raporti i OSBE-ODIHR, duhen përtypur të gjith këto”, tha ai.

Më 12 tetor, me urdhër të ministrisë së Brendshme monopatinat u ndaluan përkohësisht dhe ende nuk lejohet të përdoren. 

Në ditën e parë të zbatimit të vendimit, çdo monopatinë dhe motor elektrik që u pa në rrugë u sekuestrua nga policia. Në nisje të aksionit u bllokuan mbi 120 mjete të tilla, pasi shumë drejtues i përdorën edhe nga mungesa e informimit mbi vendimin e njoftuar një ditë të diel në një videomesazh nga Ministrja e Brendshme Albana Koçiu dhe kryepolici Ilir Proda. 

11 ditë pas këtij urdhri, në një vëzhgim të Report Tv nëpër kryeqytet, në rrugë vijojnë të qarkullojnë monopatinat. 

Deputeti socialist Erion Braçe ka ironizuar Koçiun për agoninë në të cilën ka rënë aksioni, i cili është edhe ndër nismat e para që ajo ka ndërmarrë që nga ardhja në krye të ministrisë së Brendshme. 

“Pikë e zezë! Nis e lëre. Mungesa e kurajos për t’u përballur me problemin”,- shkruan Braçe. 

Ish deputeti demokrat Enkelejd Alibeaj u shpreh në Off the Record në A2 CNN se opozita duhet të bojkotonte zgjedhjet e pjesshme në Tiranë, pasi ato janë antikushtetuese dhe të mos vijojë me takimet dhe fushatën, pasi në këtë mënyrë kthehet në një shtojcë të Edi Ramës.

Sipas Alibeajt kjo është një kauzë e madhe që ka të bëjë me Kushtetutën e vendit, dhe në këtë mënyrë opozita duhet të tregojë se është shumë serioze në aksionin e saj politik.

“Ka kauzë më të madhe sesa e gjithë opozita të thoshte nuk ka rëndësi për zgjedhjet në 9 nëntor kur gjithçka është jokushtetutese. Zgjedhjet në Tiranë janë antikushtetuese. E gjitha nisi si lodër e Ramës. E shkarkoi Veliajn kur donte, në shtëpinë e vetë me metoda të PPSH. E rëndë të kthehen Pleniumet e Partisë dhe çfarë bën opozita shkon në zgjedhje. Janë pa vlerë zgjedhjet në 9 nëntor në Tiranë. Po të shkosh në këto zgjedhje bëhesh aneks i lojës brutale që bën Rama. Jam për bojkot. Nuk ka më shumë se të ruash kushtetutën”, tha Alibeaj. 

Ilir Alimehmeti, drejtuesi i fushatës së PD-së për Bashkinë e Tiranës, në një intervistë në Top News për gazetaren Dafina Hysa, ka zbuluar pse PD nuk doli me një kandidat të PD-së, por zgjodhi të mbështesë kandidatin e pavarur Florian Binaj.

“Ne nuk jemi absolutisht në kushte normale dhe në këto kushte PD për herë të parë mbështet një kandidat jashtë radhëve të saj sepse i tillë është bërë mendimi që ai ka absolutisht shanset më të mëdha për të fituar Bashkinë Tiranë”, theksoi Alimehmeti.

Në fakt nuk kanë munguar edhe në dalje televizive eksponentë të rëndësishëm të PD që janë të mendimit se do duhet të kishit dalë me një kandidat politik për bashkinë më të rëndësishme të vendit, Tiranën. A besoni vërtet se të gjitha strukturat e PD do ta mbështesin Binajn në këtë garë, pavarësisht lidershipit?

Alimehmeti: Është e vërtetë, çdo forcë politike absolutisht ka mendimet e veta, dhe i diskuton ato. Ndryshe ndoshta nga PS ne mendimet tona nuk e kemi problem t’i diskutojmë dhe haptas, edhe këtu në media, në ambiente publike e me radhë. Po në fund fare ka një diskutim përfundimtar dhe një vendimmarrje dhe kjo vendimmarrje pastaj ndiqet dhe shkon deri në fund dhe jemi në një lloj kohe ku gjendemi përballë një situate që s’ka ndodhur më parë që kryetari i bashkisë Tiranë është në burg. 

Dhe në këtë lloj situate dhe kujtoj që jemi pak muaj pas zgjedhjeve të 11 Majit që OSBE-ODIHR i ka quajtur të pabarabarta, që Këshilli i Europës i ka quajtur që duhet të ndahet shteti nga partia që do të thotë që kemi parti-shtet. Pra kemi shumë arbitra ndërkombëtarë që flasin shumë qartë se si ndodhën zgjedhjet te ne. Pra, ne nuk jemi absolutisht në kushte normale dhe në këto kushte PD për herë të parë mbështet një kandidat jashtë radhëve të saj sepse i tillë është bërë mendimi që ai ka absolutisht shanset më të mëdha për të fituar Bashkinë Tiranë.

Strukturat e çdo partie do të dëshironin që kandidatët të dalin prej tyre, është jopartiak Binaj, por nuk mund të themi dot jopolitik, por nuk është pjesë e asnjë partie.

Kryetari i PD-së, Sali Berisha tha se ish-deputetja e PD-së, Zheni Gjergji shkelmoi besimin dhe mbështetjen e njerëzve që e votuan si përfaqësuese në parlament kur pranoi emërimin si drejtoreshë e spitalit të Elbasanit.

“Nuk është kjo një raport i këtyre individëve me Sali Berishën, por me ata që i kanë votuar e mbështetur. Një gjë mund të them se për Berishën të gjithë ata që shkelmojnë mbi atë besim dhe mbështetje janë automatikisht jashtë kësaj force politike sepse 99.9% të atyre që i kanë mbështetur ndërkohë janë të papunë në kushtë të vështira por nuk ikën. U kanë shërbyer këtyre shumë pak, 3-4 veta gjithsej kështu që bëjnë një vendim, kalojnë në partinë e krimit, të saj që i përkasin dhe vetëm kaq. Ky është komenti jo vetëm për atë por për të gjithë ata, 3-4 janë gjithsej në Shqipëri mund të ketë edhe më shumë”, tha Berisha.

Më parë Gjergji tha se kishte pranuar postin e drejtoreshës së spitalit për shkak të thirrjes profesionale si mjeke. Në një status në rrjetet sociale, ajo thotë se “është mjeke” dhe se shëndetësia kishte nevojë për njerëz që e njihnin sistemin.