Mbledhja e zhvilluar në selinë e Partisë Demokratike në Shkodër mbrëmjen e së hënës për konfirmimin e kandidatëve për kryetar të degës është shoqëruar me tensione dhe përplasje mes anëtarëve.

Konfirmimi i vetëm dy kandidatëve nga selia qendrore, ndonëse lista e propozuar nga baza kishte qenë më e gjatë, ka shkaktuar debate të forta gjatë diskutimeve.

Disa prej anëtarëve kanë kundërshtuar vendimin, duke ngritur pikëpyetje për kriteret e përzgjedhjes. Debatet verbale më pas kanë degjeneruar në përplasje fizike e fyerje mes disa pjesëmarrësve në mbledhje.

Të pranishmit kanë ndërhyrë për të qetësuar situatën dhe për të shmangur përshkallëzimin e konfliktit. Zgjedhjet për kreun e degës së PD Shkodër pritet të mbahen më 15 mars./gazeta-shqip.com

Kryedemokrati, Sali Berisha ka zbuluar orën e protestës së 12 marsit.

Gjatë fjalës së tij në foltoren para Kryeministrisë, Berisha njoftoi se protesta do të nisë në orën 10:00, para Parlamentit.

Sipas Berishës, më 12 mars Rama do të marrë përgjigjen e merituar.

“12 marsi është një ditë e madhe, është dita e përmbysjes së narko-regjimit. Në orën 10 e gjithë Shqipëria para Parlamentit, t’i japim Ramës përgjigjen e merituar”, u shpreh Berisha.

Partia Socialiste refuzoi kërkesën e SPAK ndaj Kuvendit për autorizimin për Belinda Ballukun, e cila tashmë për Edi Ramëm ka avokatët e saj.

Megjithatë për kreun e qeverisë ajo do të vijojë të jetë drejtuese politike e qarkut Fier. Ndërkohë kreu i Grupit Parlamentar të PS, Taulant Balla, ka treguar se çfarë ndodhi në mbledhjen me dyer të mbyllura të Partisë Socialiste.

I pyetur në “Top Story”, se si kishte votuar Elisa Spiropali, Balla u shpreh se asnjë deputet nuk votoi kundër apo abstenim.

Pjesë nga diskutimi?

Duma: A ka pasur dy vota abstenim?

Balla: Unë jam kryetar i Grupit dhe në fund të mbledhjes, ne bëjmë votimet, siç bëhen në seancë plenare. Unë kam drejtuar votimet për disa çështje sot. Në procesverbalin të mbledhjes time sot nuk më rezulton asnjë votë kundër dhe asnjë abstenim për vendimin e mosdhënies së autorizimit të kërkesës në fjalë.

Duma: E ngriti dorën Spiropali? Po apo jo?

Balla: Nuk kishte asnjë votë kundër dhe asnjë abstenim.

Sulo: Ju e dini qëndrimin e BE-së në këtë çështje. Ju keni votuar që mos t’i jepni lejen SPAK-ut për masën e arrestit. Pse ka votuar PS në interes të saj duke dëmtuar interesin e shqiptarëve për integrim.

Balla: Unë nuk marr përsipër të flas në emër të BE-së siç lehtësisht e merrni ju. Qëndrimi i BE-së është që Shqipëria ka bërë hapa…

Sulo: Jo për çështjen Balluku të lutem. Ka folur McAllister dhe Gonzato.

Balla: Çështjet individuale nuk janë kapituj ose grupkatiuj për negociatat. Jemi vendi që kemi hapat më të konsiderueshëm aty duke krahasuar dhe me vendet që i kanë nisur negociatat 10 vite para nesh. Respektimi i të drejtave të njeriut është një pikë themelore në këto kapituj. Nuk ka asnjë pushtet mbi një pushtet tjetër, por ka një ‘check and balance’ mes pushteteve. Ndërkohë që respektimi i pavarësisë së Prokurorisë dhe Gjykatës, është thënë qartë dhe në qëndrimin sot, që hetimi ndaj znj.Balluku vazhdon i paprekur dhe i pavarur. Nuk e rrezikon kjo. Jam i sigurt për këtë.

Duma: Nuk do të kemi asnjë surprizë ditën e enjte? Do të ketë një votë unanime të Grupit…

Balla: Dua të sqaroj diçka. Po të mbani mend, në datën 23 shkurt, kur ka përfunduar mbledhja e Këshillit të Mandateve, unë e kisha mbajtur një qëndrim, kundër dhënies së autorizimit. Megjithatë kam deklaruar se do të shkoj në Grupin Parlamentar, do të parashtrojmë vendimet tona… Në rastin tonë, kemi bërë një diskutim sot dhe kemi marrë një vendim, ku të gjithë deputetët sot në mbledhje, kanë votuar kundër dhënies së autorizimit.

Lufta në Lindjen e Mesme është kthyer në vëmendjen e mediave botërore, ku edhe në vendin tonë janë rritur shqetësimet në lidhje me sulme që mund të marrë Irani, pasi në Shqipëri është strehuar opozita iraniane MEK.

Në lidhje me këtë temë, Ambasada e Shteteve të Bashkuara në Tiranë ka reaguar lidhur me rreziqet e mundshme të sigurisë për Shqipërinë.

Ambasada Amerikane thekson në reagimin e saj se SHBA dhe Shqipëria po koordinohen vazhdimisht për çështjet e sigurisë.

“Si aleatë në NATO, Shtetet e Bashkuara dhe Shqipëria diskutojnë dhe koordinohen rregullisht për shqetësimet e përbashkëta të sigurisë. Ne mbetemi vigjilentë për të garantuar sigurinë e qytetarëve amerikanë dhe shqiptarë njëkohësisht”, thuhet në përgjigjen e ambasadës amerikane për Euronews Albania.

Prej vitesh, vendi ynë strehon rreth tre mijë anëtarët të opozitës iraniane, MEK, të cilët janë vendosur në zonën e Manzës në Durrës.

Ndërsa ish-lideri Suprem i Iranit Ali Ajotollahu, i cili humbi jetën pas sulmeve të SHBA-së dhe Iranit, e quajti Shqipërinë si “vend djallëzor.

Nga Boldnews.al

Kryeministri Edi Rama, nëpërmjet Ulsi Manjës dhe Taulant Ballës, vendosi të refuzojë kërkesën e Prokurorisë së Posaçme për autorizimin për arrestimin e Belinda Ballukun, një vendim politik që nuk ishte aspak surprizë.

Rama ka shumë arsye për të mbrojtur zëvendësen e tij, të akuzuar për “shkelje të barazisë në tendera” për procedurën e Tunelit të Llogarasë dhe nën hetim për të njëjtën vepër penale për ndërtimin e disa loteve për ndërtimin e Unazës së Madhe.

Në aspektin politik, Rama nuk e lëshoi Ballukun, për shkak të peshës së saj elektorale. Në aspektin personal, Rama ka mbi dy dekada bashkëpunim me Belindën. Në aspektin “financiar”, Balluku ka zbatuar rregullisht porositë e Ramës për “ndarjen e tenderave”, siç e akuzon me të madhe opozita, por jo vetëm.

Në këtë kuptim, fraza e përmendur nga Ulsi Manja, në cilësinë e anëtarit socialist të Këshillit Parlamentar të Mandave dhe Imuniteteve se, “ne nuk rekomandojmë dhënien e autorizimit për Belinda Ballukun”, ishte më se e pritshmja nga maxhoranca.

Manja, për të kamufluar vendimin politik personal të Ramës, përmendi në raportin e tij rekomandues disa aspekte proceduriale, mbi të cilat u vendos refuzimi për arrestimin e Ballukut.

Janë disa elementë, të cilët tashmë e hodhën dorashkën e sfidës në tavolinën e Prokurorisë së Posaçme.

Kurioziteti publik në këtë moment është se cilat hapa do të hedhin më tej prokurorët e posaçëm.

Varianti i parë dhe më i thjeshtë është vijimi i hetimeve ndaj Ballukut nën masat e sigurimit që janë tashmë në fuqi-“ndalim për dalje jashtë shtetit” dhe “pezullim nga detyra” (kjo e dyta, tashmë e pakuptimtë, për sa kohë Belinda u shkarkua nga detyra e zv.kryeministres).

Varianti i dytë është thellimi i hetimeve për vepra të tjera penale, fjala vjen “korrupsion pasiv” dhe/ose “pastrim të produkteve të veprës penale” (pastrim parash), të sigurojë prova të reja dhe t’i drejtohet sërish Parlamentit me kërkesën për autorizimin për arrestimin e deputetes Belinda Balluku.

Teorikisht, SPAK-u nuk ka asnjë arsye për t’u vendosur në kurs përplasjeve me qeverinë, një tagër që i takon vetëm opozitës. Prokuroria e Posaçme ka detyrimin kushtetues të bëjë hetime, të kërkojë masa sigurimi kur e vlerëson të nevojshme, të mbyllë hetimet, të përfaqësojë akuzën në gjykatë.

E parë në këtë këndështrim formal, varianti i parë, pra ai i vijimit të hetimeve ndaj Ballukun pa asnjë lloj ndikimi nga refuzimi i Ramës për të dorëzuar zëvendësen e tij, është më komodi për prokurorët. Ata nuk krijojnë kokëçarje me pushtetin e Edi Ramës dhe raportojnë tek “partnerët ndërkombëtarë” statistika për procedime ndaj zyrtarëve të lartë.

Por, a është kjo që kërkohet dhe pritet nga Prokuroria e Posaçme?

Këtë të Hënë (9 mars 2026), SPAK-u mori një goditje të fortë publike. Kryeministri Edi Rama angazhoi të gjithë makinerinë e tij politike dhe propagandistike, për t’u thënë militantëve dhe ndërkombëtarëve se Prokuroria e Posaçme kërkoi arrestimin e Ballukut, pa prova dhe me “thashetheme”.

Prozhektorët publikë tashmë drejtohen mbi Drejtuesin e SPAK-ut, Klodian Braho. Ai nuk ishte në detyrë kur prokurori i çështjes, Dritan Prençi, i mbështetur nga drejtuesi i tij në 16 dhjetor 2025, Altin Dumani, dorëzuan në Parlament kërkesën për autorizimin e arrestimit/heqjes së lirisë për Belinda Ballukun.

Megjithatë, Klodian Braho drejtoi grupin e prokurorëve në mbledhjen e Këshillit të Mandateve dhe Imuniteteve. Rasti “Balluku” ishte sfida e parë e tij madhore në krye të SPAK-ut dhe, për shkak të qëndrimit politik të Ramës, rezultoi e dështuar.

Braho ka në dorë të tregojë nëse do të pranojë këtë “humbje” apo do të vijojë të dëshmojë “strategjinë luftarake” të paraardhësit të tij.

Në “100-ditëshin e parë” në krye të SPAK-ut, Klodian Braho ende nuk ia ka bërë “bam”. Me rastin e Belinda Ballukut ai ka mundësinë të tregojë nëse Prokuroria e Posaçme do të mbaj profilin e goditjes në nivele të larta apo do ta shndërrojë SPAK-un në një zgjatim të rëndomtë të prokurorive të juridiksionit të përgjithshëm.