Familjarët e gjyqtarit Astrit Kalasë, i cili u vra me armë zjarri në brendësi të Gjykatës së Apelit në Tiranë, kanë kërkuar që gjyqtari të shpallet “Dëshmor i Atdheut”.

Përmes një shkrese drejtuar Ministrisë së Drejtësisë, gruaja e Astrit Kalasë, Valbona, ka kërkuar hapjen e proceduara që gjyqtari me karrierë 32 vite, të shpallet “Dëshmor i Atdheut”.

“Gjyqtari u vra në sallën e gjyqit gjatë shpalljes së vendimit në emër të Republikës, nga një palë në proces e cila nxori armën dhe e qëlloi menjëherë pas shpalljes”, thuhet në kërkesë.

Sipas Top Channel, familja insiston se rendi dhe qetësia nuk sigurohen vetëm nga policia por edhe nga gjykatat që sakaq po bëhen gati ti drejtohen edhe komisionit qendror të  statusit të dëshmorit, një opsion që hap rrugën për padi në gjykatën administrativ.

Gjyqtari Astrit Kalaja, u qëllua për vdekje me armë zjarri në sallën e gjyqit, pasditen e 7 Tetorit 2025 sapo dha një vendim në emër të Republikës.

Palë në proces ishin Gjon Shkambi dhe Elvis Shkambi, të cilët kërkojnë lirimin e ambienteve të një prone që ata kanë në Shkodër, nga rreth 16 familje që e kanë zënë atë më shumë se 20 vite më parë dhe nuk pranojnë të dalin prej andej.

Menjëherë pas shpalljes së vendimit nga gjyqtari Astrit Kalaja, shtetasi Elvis Shkambi, i cili ndodhej në sallë, nxori nga brezi një armë zjarri pistoletë dhe ka qëlluar disa herë në drejtim të gjyqtarit i cili si pasojë e të shtënave është rrëzuar në tokë.

Pas këtij veprimi, 30-vjeçari i ka drejtuar pistoletën shtetasve Rakip Kurtaj dhe Ervis Kurtaj, të cilët tentuan të dalin nga salla dhe qëlloi me armë zjarri (pistoletë) në drejtim të tyre. Menjëherë më pas, autori i dyshuar i ka lënë në dorë pistoletën punonjësit të sigurisë së gjykatës dhe pasi ka dalë në oborr, është kapur në flagrancë nga shërbimet e Komisariatit  të Policisë Nr.1, Tiranë.

Gjyqtari u transportua me ambulancë në Spitalin e Traumës Tiranë, por gjatë rrugës ndërroi jetë, ndërsa dy të dëmtuarit e tjerë pas marrjes së ndihmës së specializuar mjekësore, ndodhen jashtë rrezikut për jetën.

Imami viral i rrjeteve sociale, Ahmed Kalaja, ka rrëfyer disa detaje nga jeta personale dhe profesionale në “Goca & Gra”.

Ai ka treguar se është babai i 10 fëmijëve, teksa tregoi edhe për vështirësitë familjare.

Duke iu referuar çifteve të reja që nuk bëjnë fëmijë nën pretekstin e mungesës së mundësive ekonomike, Kalaja ka treguar se deri në fëmijën e 8 ka jetuar në një shtëpi 90 metra katrorë, e më pas gjërat ndryshuan.

Ndër të tjera imami tregoi se fëmija më i madh është vajza 26-vjeçare që e ka bërë gjysh, teksa fëmija më i vogël është 4 vjeç.

Sa i përket rrjeteve sociale, ai u pyet nëse i shkruajnë gratë. Imami tregoi se një grua e ka denoncuar në polici për shkak të përndjekjes që i bënte.

“Aq keq u bë situata sa e denoncova në polici”, u shpreh Ahmed Kalaja.

Kryetari i Komisionit të Ligjeve, Ulsi Manja, prezantoi në mbledhjen e grupit të Partisë Socialiste raportin për kërkesën e SPAK për heqjen e imunitetit të Belinda Ballukut.

Në fjalën e tij, Manja u shpreh se raporti i rekomandon Kuvendit që të rrëzoi kërkesën e SPAK për marrjen e autorizimit për arrestimin e Belinda Ballukut. Manja tha se nuk ka asnjë rrezik për arratisjen e Ballukut jashtë vendi dhe as për përsëritje të veprës penale.

“Ne si anëtarë të mazhorancës në Këshillin për Imunitetet arrijmë në përfundimin se nuk ka vend për dhënien e autorizimit për zëvendësimin e masës së sigurimit personal, atë të ndalimit të daljes jashtë shtetit, me masën më të rëndë të arrestimit me burg apo në shtëpi.

Ne si anëtarë të shumicës i rekomandojmë seancës plenare rrëzimin e kërkesës së SPAK për dhënien e autorizimit për arrestimin e Ballukut, mosdhënien e këtij autorizimi pasi nga shqyrtimi i materiale dhe rrethanave, nuk rezulton të jenë evidentuar domosdoshmëria e vendosjes së një mase të tillë në raport e funksionimin e mandatit parlamentar. Ky rekomandim nuk e pengon SPAK që të vazhdojë hetimet ndaj Ballukut. Ka një masë, atë të pengimit të daljes jashtë shtetit dhe këtë e konsiderojmë si një çështje që i takon drejtësisë. Masat e sigurimit personal, nuk lidhen me ekzistencën e veprës penale, duhet të priten hetimet”, u shpreh Manja gjatë argumentimit të raportit të socialistëve.

“Masa e ndalimit të daljes jashtë shtetit është vendosur në nëntor 2025. Në 16 dhjetor 2025 Prokuroria i ka kërkuar Kuvendit autorizimin për arrestim.

Këshilli pasi dëgjoi prokurorët dhe mbrojtësit e deputetes, zhvilluam diskutimet tona dhe në përfundim kemi këtë qëndrim.

Prokuroria thotë se janë shtuar fakte dhe episode të reja penale çka e shton sanksionin e veprës dhe dëmin hipotetik që ka pësuar shteti.

Në vlerësimin tonë nëse do pranohet fakti se çdo zgjerim i hetimit konsiderohet rrethanë e re që të justifikojë arrestin, çdo procedim penal me shumë episode do përfundonte në paraburgim”, u shpreh Ulsi Mnaja, teksa lexoi raportin e PS.

Sipas tij “edhe me shtimin e fakteve të pretenduara, vepra penale mbetet e njëjtë. Nuk ka një vepër penale të re që ti jetë shtuar Belinda Ballukut”.

“Mbi rrezikun e prishjes së provave: prokuroria përmend mundësinë e ndikimit përmes personave me influencë si dhe tentative presioni ndaj dëshmitarëve. Lidhur me këtë pretendim në kërkesën e SPAK, prokuroria i referohej faktit kur ishte Ministre. Ky shkak tani ka rënë. Ndaj Ballukut nuk ka një akuzë për pengim të drejtësisë. Nuk ka asnjë provë, direkte apo indirekte kur deputetja të ketë përdorur ndikimin e saj për të prishur provat”, u shpreh Manja.

Manja u ndal edhe te rreziku për intimidimin e dëshmitarëve nga Balluku, duke thënë se kjo nuk qëndron.

“Na u paraqit një procesverbal ku dy shtetase bisedojnë me njëra-tjetrën lidhur me dëshminë që njëra ka dhënë gjatë hetimit në SPAK. Ajo pretendon se ajo është intimiduar. Nuk rezulton as nga procesverbali, as nga deklarimet e kësaj shtetase që ajo të jetë intimiduar, nga deputetja jo e jo, por edhe kur thuhet nga Kabineti, ai është nocion abstrakt. Hetimi penal nuk mund të zhvillohet mbi kabinetin.

Por edhe pretendimi se kjo dëshmitare është intimiduar nga persona të fortë, ajo ka thënë se “unë i qëndroj dëshmisë sime”. Në të gjitha rastet një provë e tillë do të duhet të plotësohet edhe me prova të tjera. Lidhur me dëshmitaren, ajo ka statusin e të pandehurës në këtë procedim dhe sipas Kodit, thëniet e një të pandehure merren me rezervë.

Rreziku i prishjes së provave nuk u provua me fakte reale, por janë konsiderata që në themel të tyre kanë ish-funksionin e ministres që mbante Balluku. Po të kishte prishje provash do kishte një akuzë të dytë për pengimin e drejtësisë”, tha Manja.

Gjatë argumentimit të socialistëve, Manja tha se as rreziku për arratisje, nuk qëndron në rastin e Ballukut, pasi kjo e fundit ka dorëzuar te autoritete edhe pasaportën edhe kartën e identitetit.

Ai theksoi se sa herë gjatë kësaj periudhe asaj i është dashur të udhëtojë jashtë vendit për çështje pune, është rikthyer.

“Sa i përket rrezikut të arratisjes, ai duhet të jetë real dhe jo I supozuar. Balluku edhe pse ka qenë në dijeni të hetimeve të saj, ka udhëtuar disa herë jashtë shtetit dhe është kthyer në Shqipëri.

Ka udhëtuar në Bukuresht, në Athinë, në Romë dhe në të gjitha rastet është kthyer duke reflektuar një sjellje të rregullt dhe jo shmangëse ndaj autoriteteve proceduese. Ka dorëzuar të gjitha dokumentet e identifikimit, madje edhe kartën e re të identitetit. Ju e dini shumë mirë që me kartë identiteti lëvizet në vendet e rajonit. Pretendimi se shtimi i sanksionit penal mund të çojë në një rrezik për tu arratisur bie poshtë”, ta Manja.

Analisti Kim Mehmeti, gjatë fjalës së tij në “Këndi i Kimit” në TËVË1, tha se Edi Rama nuk është i shqetësuar për dështimet e Shqiptarisë, por për dështimet e Serbisë.

Ai theksoi se ndikimi serb në Shqipëri nuk ka qënë më i fortë se sot asnjëherë tjetër.

“Asgjë s’është rastësore por punë shërbimesh sekrete që përçahen shqiptarët në këtë menyrë“- tha Mehmeti.

Më tej, Mehmeti tha se “qarqet serbe ruse dhe kineze financojnë, ndërkohë ne jemi mall që shitet lirë”.

Kim Mehmeti theksoi po ashtu se Edi Rama i shërben më shumë Beogradit.

Jola Hysaj ka njoftuar dorëheqjen nga të gjitha pozicionet që ka mbajtur si edhe nga anëtarësia në Partinë Demokratike.

Nëpërmjet një statusi të gjatë në Facebook, Hysaj ka renditur edhe disa nga shqetësimet që ka evidentuar në këtë parti duke u nisur që nga mungesa e hapjes reale brenda PD.

DEKLARATË PUBLIKE

Pas më shumë se 20 vitesh angazhimi të pandërprerë në jetën politike dhe në shërbim të qytetarëve, kam marrë vendimin të jap dorëheqjen nga të gjitha pozicionet që kam mbajtur dhe që më janë besuar me votë, si edhe nga anëtarësia ime në Partinë Demokratike të Shqipërisë.

Ky është një vendim i vështirë, por i domosdoshëm. Ai vjen si pasojë e një sërë zhvillimesh dhe vendimmarrjesh të njëpasnjëshme që, në gjykimin tim, janë larguar nga parimet mbi të cilat duhet të ndërtohet dhe të funksionojë një Parti Demokratike.

Së pari, mënyra se si u trajtua funksioni im si Sekretare për Marrëdhëniet me Publikun. Ndërkohë që imazhi dhe përgjegjësia publike e këtij funksioni vazhduan të përdoren, kompetencat reale që i përkasin këtij roli. Një funksion i zgjedhur me votë nga anëtarët e Këshillit Kombëtar që u kufizuan dhe në praktikë u zhveshën nga përmbajtja e tyre. Kjo nuk cenon vetëm një individ, por vetë parimin e përfaqësimit që buron nga vota.

Së dyti, përjashtimi sistematik nga përfaqësimi në këshillat bashkiakë i njerëzve me kompetencë dhe integritet, të cilët kanë një kontribut të provuar në terren. Në vend të një përfaqësimi të hapur dhe meritokratik, vendimmarrja është përqendruar në një rreth gjithnjë e më të ngushtë njerëzish, duke e kthyer përfaqësimin politik në një proces të kontrolluar dhe jo në një proces të vërtetë demokratik.

Së treti, mënyra e hartimit të listave të mbyllura për Qarkun e Durrësit, ku u lanë jashtë figura që kanë investuar vite të tëra pune dhe përkushtimi në terren. Kjo nuk është vetëm një çështje personale, është tregues i një kulture vendimmarrjeje që nuk respekton meritën dhe kontributin.

Së katërti, mënyra se si kjo forcë politike menaxhoi procesin për institucionin e Avokatit të Popullit. Në gjykimin tim, ky ishte një gabim politik dhe institucional që dëmton seriozitetin dhe besueshmërinë e opozitës.

Por mbi të gjitha, problemi themelor mbetet mungesa e hapjes reale brenda Partisë Demokratike. Një parti politike duhet të jetë hapësirë debati, ideje dhe përfaqësimi. Sot, fatkeqësisht, ajo funksionon brenda një rrethi të ngushtë njerëzish, ku shpesh mungon respekti minimal jo vetëm ndaj bazës, por edhe ndaj vetë strukturave dhe hierarkisë së saj.

Forma dhe mënyra e organizimit të funksionimit të kësaj force politike ka arritur në një pikë ku edhe anëtarët e Kryesisë mësojnë vendime të rëndësishme nga mediat dhe jo nga strukturat e partisë. Kjo nuk është mënyra se si duhet të funksionojë një parti demokratike dhe as mënyra se si respektohen institucionet e saj.

Për të gjitha këto arsye, kam vendosur të largohem, duke ruajtur mbi të gjitha integritetin tim personal dhe politik.

Dua të falënderoj të gjithë qytetarët, bashkëpunëtorët dhe mbështetësit që më kanë qëndruar pranë gjatë këtij rrugëtimi 20-vjeçar. Besimi i tyre ka qenë motivimi im më i madh për të punuar çdo ditë me përgjegjësi dhe përkushtim.

Angazhimi im për të kontribuar për qytetarët dhe për jetën publike nuk përfundon këtu. Ai do të vazhdojë me të njëjtin besim se Shqipëria ka nevojë për një politikë më të hapur, më meritokratike dhe më të ndershme ndaj qytetarëve.
Jola Hysaj