Dëmtimi dramatik i segmentit të rrugës kombëtare Librazhd – Prrenjas, në zonën e Arrave të Dragostunjës, po merr përmasa me pasoja të rënda infrastrukturore dhe socio-ekonomike, duke paralizuar pjesërisht jo vetëm qarkullimin, por edhe jetën e përditshme të një pjese të konsiderueshme të vendit.

Kjo arterie strategjike, që lidh kryeqytetin me juglindjen, tashmë është kthyer në një pikë kritike kombëtare. Prej disa ditësh, Autoriteti Rrugor Shqiptar dhe të gjitha strukturat shtetërore janë në alarm të plotë për të gjetur jo vetëm një zgjidhje emergjente për zhbllokimin e situatës së paprecedentë, por edhe një zgjidhje afatgjatë dhe të qëndrueshme.

Tryeza maratonë me inxhinierët më të mirë

Burime nga grupet teknike konfirmojnë se diskutimet kanë vijuar nga pasditja e djeshme deri në mesnatë, ndërsa edhe sot paradite pritet një tjetër tryezë intensive me inxhinierët më të mirë të projektimit rrugor në vend. Në fokus është rishikimi i plotë i qasjes teknike ndaj segmentit problematik.

Aktualisht, në tryezën e diskutimeve po qarkullon seriozisht ideja e devijimit të projektit ekzistues. Sipas burimeve të besueshme, shumë shpejt mund të merret një vendim për anulimin e përhershëm të punimeve në segmentin aktual, për shkak se zona ka shfaqur gjatë këtij muaji paqëndrueshmëri të theksuar gjeologjike, duke e bërë investimin me risk të lartë edhe në të ardhmen.

Vlerësim tektonik i plotë i zonës

Në ditët në vijim pritet të kryhet një vlerësim i thelluar tektonik dhe gjeodinamik i gjithë zonës ku po realizoheshin punimet nga kompania ANK shpk. Ekspertiza do të përcaktojë nëse territori përbën rrezik të përhershëm për infrastrukturë të rëndësisë kombëtare.

Të njëjtat burime bëjnë me dije se një nga opsionet më të mundshme është rikthimi te projekti alternativ, ku një segment i rrugës do të kalojë mbi rrjedhën e Lumi Shkumbin ose përgjatë saj, duke shmangur masivin problematik që ka shfaqur lëvizje të vazhdueshme të tokës.

Rikthimi i qarkullimit drejt Juglindjes , emergjencë kombëtare infrastrukturore

Situata tashmë konsiderohet një emergjencë kombëtare infrastrukturore. Bllokimi i këtij aksi ka krijuar zinxhir efektesh në transportin e mallrave, lëvizjen e qytetarëve, shërbimet publike dhe ekonominë rajonale.

Vendimmarrja që pritet në ditët në vijim do të jetë përcaktuese jo vetëm për fatin e këtij segmenti, por për modelin e ndërhyrjes në zona me risk të lartë gjeologjik në të gjithë vendin. Shqipëria përballet me një nga sfidat më serioze infrastrukturore të viteve të fundit dhe zgjidhja kërkon vendim të guximshëm, profesional dhe afatgjatë./BW

Belinda Balluku rrezikon deri në 35 vite burg.

Kjo ka qenë deklarata e bërë sot nga prokurorë të Prokurorisë së Posaçme të Antikorrupsionit në mbledhjen e Këshilli të Mandateve.

Burime brenda mbledhjes me dyer të mbyllura sot në Kryesinë e Kuvendit, tregojnë qëndrimin e prokurorit.

“Në masat e para të kërkuara znj. Balluku rrezikonte deri në 10 vite burg; sot që flasim situata e saj është rënduar, dhe me akuzat e prokurorisë në këtë moment znj. Balluku rrezikon deri në 35 vite burg”, kanë deklaruar Prokurorët e SPAK.

Pas prezantuan provat e reja për Ballukun dhe pasi janë dëgjuar nga anëtarët e Këshillit, tre prokurorët e SPAK, Klodian Braho, Dritan Brençi dhe Doriana Bejko janë larguar.

Ndërsa diskutimet vijojnë mes anëtarëve të Këshillit të Mandateve, të cilët do të hartojnë edhe një raport, që do ta çojnë në Kuvend në datën 5 mars.

Kryetari i Partisë Demokratike, Sali Berisha, ka folur për protestën e radhës që do të zhvillohet këtë të shtunë, më 28 shkurt, duke paralajmëruar se kjo do të jetë ndryshe krahasuar me ato të mëparshmet.

“E shtuna është dita e kryengritjes paqësore. Qytetarët mezi e presin për të shprehur zemërimin, revoltën dhe urrejtjen e tyre ndaj hajdutëve. Tani kryengritja kalon në fazën e diversifikimit të aksioneve dhe veprimtarive të saj. E shtuna është dita e triumfit të opozitës dhe e shqiptarëve mbi hajdutët. Do të jetë një kryengritje më e fuqishme se çdo protestë që ka njohur vendi deri tani. Për të gjitha do të informoheni në përputhje me vendimet që do merren”, tha Berisha, duke theksuar se aksioni po kalon në fazën e intensifikimit dhe diversifikimit të veprimeve.

Ai shtoi se për çdo veprim të ri qytetarët do të informohen në përputhje me vendimet që do të merren, dhe se idetë e tij për organizimin e aksioneve do të vendosen së bashku me bashkëpunëtorët para se t’i bëjë publike.

Vijon ende mbledhja në Këshillin e Mandateve ku po diskutohet në lidhje me imunitetin e zv.kryeministres Belinda Balluku, të cilën SPAK kërkon ta arrestojë.

Mësohet se në vijim të pyetjeve të bëra nga Kryetari i grupit parlamentar të PD Gazment Bardhi, Prokuroria e Posaçme konfirmon se janë konstatuar fakte të tjera penale për Ballukun.

Sipas SPAK, Balluku ka rrezik të prishë prova dhe të kryejë krime të tjera gjithashtu, konfirmoi se në datë 20 Nëntor 2025 ka intimiduar dy dëshmitarë, duke i kërkuar të ndryshojnë dëshminë.

Po ashtu, prokuroria informon se ka prova se disa persona “të fortë” (duke nënkuptuar elementë të krimit të organizuar) kanë kërcënuar dëshmitarët në emër të Ballukut. Për këtë kanë paraqitur edhe provat në mbledhjen e Këshillit – transkripte të bisedave.

Bëhet e ditur se, Belinda Balluku apo avokatët e saj nuk kanë ngritur asnjë pretendim për ndikim politik/përndjekje politike nga prokuroria.

Kryedemokrati Sali Berisha, në një konferencë për gazetarët, ka paralajmëruar zv.kryeministren Belinda Balluku të mos arratiset nga Shqipëria, ndërkohë që në Kuvend është mbledhur Këshilli i Mandateve për të shqyrtuar kërkesën e SPAK për heqjen e imunitetit të saj.

Ai e paralajmëron se edhe prapa diellit të shkoë, do ta gjejë dhe do ta rikthejmë në Shqipëri. Ai deklaron se, sipas fqinjës së Ballukut, kjo e fundit ka katër ditë që nuk ka shkuar në shtëpi.

“Sot në Kuvend po mbahet seanca e shtyre tre muaj, me të cilës Lubisë iu dhe mundësia të shkatërroj mijëra e mijëra dokumente, të intimidoje, kërcënojë dhjetëra dëshmitarë.

Ajo aty nuk është, komshia thotë “prej 4 ditësh nuk e kam parë të hyje në shtëpinë e saj. Një gjë i them “edhe prapa diellit të shkosh, do të të gjejmë dhe do të të rikthejmë në Shqipëri, ndaj mos tento të largohesh. Asaj dhe çdo njeriu tjetër“, tha Berisha.