Deputeti dhe kryetari i partisë “Mundësia”, Agron Shehaj, i ftuar në emisionin “Të paekspozuarit” në MCN TV, u shpreh se edhe pas 54 ditëve, protesta tregoi se nuk ka ndryshuar asgjë duke mbetur masive, e pakapur dhe qytetare.

“Ditët e para e kuptuam se kishim të bënim një gjë të jashëzakonshme. Rama mendoi se ishte një protestë spontane jopartiake. Filloi t’i injoronte se s’ka pjesëmarrja, duke i injoruar, kërcënuar. 

Por çfarë ndodhi? Pas 54 ditëve protesta tregoi se nuk ka ndryshuar asgjë, protesta ka mbetur masive, e pakapur dhe qytetare.

Edi Rama është i dëshpëruar për këtë gjë. Nuk di të lexojë këtë. Nuk e priste. Mendoi se e kishte kapur Shqipërinë. Mori 84 mandate dhe as nuk i kalonte nëpër mendje që do të ndodhte kjo.

Një protestë e vazhdueshme, e konsumon Edi Ramën. Nëse në fillim kishte humbur mbështetjen se e dimë si e ka fituar pushtetin, falë edhe gabimeve të opozitës, dhe humbet çdo ditë. Kështu bien qeveritë në Perëndim, humb legjitimitetin e pushtetit. Dhe vjen një ditë që largohen”, tha Shehaj.  

Elisa Spiropali ka mbrojtur në kuvend kërkesën e saj për ndryshimin e Partisë Socialiste në jetën e brendshme politike dhe në qeverisje, por duke iu drejtuar Berishës dhe deputetëve demokratë me një sfide duke i thënë nëse është gati që të ‘çlirojë opozitën’ dhe të hapë rrugë.

“Edhe para protestës, edhe gjatë protestës unë kam folur për reformimin e pushtetit, nevojën për korrigjim, për vetëpastrim, për vetërregullim, për administratën, për nevojën për të kuptuar që ky është moment historik, kam folur për më shumë përfaqësim brenda partive, për ndryshimin e sistemi zgjedhor që ka prodhuar një banalitet sot.

Njerëzit janë të papërfaqësuar dhe janë në rrugë dhe nuk ka as dehje ideologjike dhe as asgjë, veçse nevojën e njerëzve për të shpalosur veten.

Kam folur për institucione shtetërore që instrumenalizohen kundër njërit dhe tjetrit, me besimin e madh që kemi mundësinë për ta ndryshuar këtë.

Dhe unë po ju bëj pyetje, por ju e keni fuqinë? Po ti Sali e ke fuqinë ta hapësh rrugën dhe ta çlirosh opozitën tënde? Të bëhesh pjesë e një ndryshimi që nuk i takon një partie por të gjithëve. Asnjë nga sulmet e asnjë bedeli politik nuk më ndal dot te kjo, se nuk kam asgjë për të fshehur, asnjë njeri që përdor pushtetin se mendon se mund të dëmtojë politikisht, njerëzisht, familjarisht dikë, nuk do ia dalë sepse do hiqet si apendicit”, tha Spiropali.

“Eliza, pëllumbesha në botën e çudirave nuk meriton asnjë përgjigje, kjo është replika që kam”, ishte përgjigjja e Berishës.

Berisha iu drejtua Spiropalit me termin “Pëllumbeshë”, dhe se e “hengri Lubia” duke iu referuar ish zëvendës kryeministres dhe ish ministres Belinda Balluku.

“Ju nuk përfaqësoni qytetarët, përfaqësoni vjedhjet e tij për të plaçkitur pasuritë publike në mënyrën më të pamëshirë. Përfaqësoni 140 milionë euro të vjedhura tek djegësi i Tiranës.

Përfaqësoni 600 milionë euro të përvetësuara nga familja e tij dhe ai, me Ergysin Agasin, në AKSHI-n e tij, me Lindat e tij. Përfaqësoni dosjen Balluku. Edhe ty, Pëllumbeshë, ty nuk të hëngri parimësia, por ty të hëngri Lubia, se ishte më e fortë se ti.

Pëllumbeshë, ji e sinqertë me veten tënde, se unë të dhashë një paralajmërim kur na erdhe e veshur si nuse këtu, kujtove se ishte në ditën e fundit. Harrove se ajo do bëhej dita e fundit e jotja.“, tha Berisha.

Tensione janë regjistruar pak para nisjes së seancës plenare pasi kreu i Partisë Mundësia, Agron Shehaj nuk u lejua të futej në ambientet e Kuvendit. Ai u ndalua nga punonjës e Gardës pasi është i përjashtuar nga punimet e Kuvendit.

Ndalimi ka sjellë tensione teksa, Shehaj u shpreh se përjashtimi është shlyer pasi ka përfunduar më 22 korrik.

 “Si i ndaloni deputetët të hyjnë. Hiqi duart do të mbani përgjegjësi. Më tregoni mua urdhrin, vendimin. Mos më shty” tha ai.

Gjatë momentit të debatit janë bashkuar edhe disa deputetë demokratë të cilët tentuan të largojnë punonjësit e Gardës që Shehaj të marrë pjesë në seancë.

Kryedemokrati Sali Berisha dhe deputetët e PD-së janë futur në Parlament për seancën plenare. Megjithëse iu bashkua seancës, thirrjet e kryetarit të PD ishin për shkrirjen e parlamentit si akt i vetëm i përgjegjshëm.

“I vetmi akt i përgjegjshëm i tij është të deklarojë fundin e tij, shkrirjen e tij dhe hapjen rrugë për zgjidhjen që kërkojnë mbarë rinia dhe qytetarët shqiptarë. Ço akt tjetër është fund e krye i pavlerë ndaj dhe ne kërkojmë sot vetëshpalljen, shkrirjen e këtij parlamenti. Ky është i vetmi vendim i drejtë që parlamenti mund të marrë sot”, tha Berisha.