Agjencia e lajmeve Reuters ka raportuar se kryeministri Rama ka shkarkuar zv.kryeministren dhe ministreshën e Infrastrukturës, Belinda Balluku, ndërsa ndryshimet bëhen në sfondin e një hetimi të SPAK-ut për korrupsion dhe tendera.

Artikulli thekson gjithashtu presionin e protestave opozitare dhe vështirësitë e Shqipërisë në procesin e anëtarësimit në BE ndërsa kërkohet intensifikimi i luftës kundër korrupsionit.

Shkrimi i Reuters

Kryeministri shqiptar Edi Rama, në orët e vona të mbrëmjes së të enjtes, shkarkoi zëvendësen e tij, Belinda Balluku, e cila përballet me akuza për manipulim të tenderëve publikë, të cilat kanë nxitur protesta nga opozita.

Struktura e Posaçme kundër Korrupsionit dhe Krimit të Organizuar, e njohur si SPAK, ngriti aktakuzë ndaj Ballukut në dhjetor, nën dyshimin se ka ndërhyrë në dhënien e dy kontratave ndërtimi në vitin 2021, me vlerë mbi 200 milionë euro.

Parlamenti pritet të vendosë më 5 mars nëse do t’i heqë imunitetin, çka do t’i hapte rrugë SPAK për arrestimin e saj.

Shqipëria, e cila synon të anëtarësohet në European Union deri në vitin 2030, përballet me presion nga blloku për të luftuar korrupsionin. Belinda Balluku, e cila mbante postet e zëvendëskryeministres dhe ministres së Infrastrukturës, i mohon akuzat për shkelje.

Edi Rama, i cili është në pushtet që prej vitit 2013, e mbrojti atë për muaj me radhë dhe nuk dha një arsye për shkarkimin e saj të enjten, në kuadër të një riorganizimi ku u ndryshuan shtatë poste në qeverinë e tij të Partia Socialiste e Shqipërisë, përfshirë ministrat e Mbrojtjes dhe të Jashtëm.

“Kryeministri e ka sqaruar që në fillim të këtij mandati se riorganizimet mund të jenë më të shpeshta, ndërsa gjatë afro katër muajve të fundit ai ka refuzuar tre herë dorëheqjen e zonjës Balluku,” tha zëdhënësja e qeverisë, Manjola Hasa, për Reuters në një deklaratë të dërguar me email. Belinda Balluku është parë si një figurë në ngjitje, e favorizuar nga Edi Rama si një pasardhëse e mundshme.

Që prej ngritjes së aktakuzës ndaj saj, partia më e madhe opozitare në vend, Partia Demokratike e Shqipërisë, ka zhvilluar protesta duke kërkuar dorëheqjen e Ramës, qeveria e të cilit është përfshirë nga disa skandale korrupsioni gjatë vitit të fundit.

Protestuesit kanë hedhur bomba molotov, ndërsa si policia ashtu edhe demonstruesit kanë mbetur të plagosur.

Zyrtarë të BE-së i kanë thënë Reuters se po e ndjekin nga afër mënyrën se si Rama po i trajton çështjet e korrupsionit dhe se lufta e vendit kundër krimit dhe korrupsionit është thelbësore për përpjekjen e vendit ballkanik për t’u anëtarësuar në bllok deri në vitin 2030.

Kryeministri Edi Rama ka ndryshuar pasditen e kësaj të enjte (26 shkurt 2026) kabinetin qeveritar, duke larguar nga postet tre prej ministrave të tij të besuar, Belinda Balluku, Elisa Spiropali dhe Pirro Vëngu.

Sipas ndryshimeve të bëra publike, Balluku do të zëvendësohet nga Albana Koçiu në postin e zv.kryeministres, ndërsa portofoli i ministrit të Infrastrukturës dhe Energjetikës do të kontrollohet nga Enea Karakaçi, një vartës i Ballukut dhe së fundmi drejtor i OSHEE.

Po ashtu, Elisa Spiropali është larguar nga Ministria për Evropën dhe Punët e Jashtme dhe në vend të saj është vendosur Ferit Hoxha, ish-ambasadori i Shqipërisë në OKB.

Gjithashtu dhe Piro Vengu është larguar nga detyra si Ministër i Mbrojtjes dhe postin e tij do e marrë Ermal Nufi, zv.sekretar i Përgjithshëm në Këshillin e Ministrave.

Ndryshimet e plota në qeveri

• Zv.kryeministre, Albana Koçiu– shkarkohet Belinda Balluku
• Ministër i Brendshëm, Besfort Lamallari– zëvendëson Albana Koçiun
• Ministër Drejtësie, Toni Gogu– zëvendëson Besfort Lamallarin
• Ministër Energjitke, Enea Karakaçi– shkarkohet Belinda Balluku
• Ministër i Mbrojtjes, Ermal Nufi– shkarkohet Pirro Vëngu
• Ministër për Marrëdhënien me Parlamentin, Erjona Ismaili– zëvendëson Toni Gogun
• Ministër i Jashtëm, Ferit Hoxha – Shkarkohet Elisa Spiropali

Ky riorganizim i qeverisë, vjen në një moment kur Rama po përballet me presion politik të shtuar, brenda vendit dhe nga partnerët ndërkombëtarë, për të adresuar çështje të sundimit të ligjit, veçanërisht pas pezullimit nga detyra të Ballukut nga GJKKO.

Autoritetet evropiane theksuan sërish ditën e sotme rëndësinë e luftës ndaj korrupsionit si një nga kushtet kryesore në rrugën drejt anëtarësimit në Bashkimin Evropian.

Eurodeputeti Andrey Kovatchev, ishte ai i cili përmendi sot “çështjen Balluku” duke thënë se hetimet nga SPAK duhet të vazhdojnë të pacenuara dhe se kërkesa për heqjen e imunitetit duhet të marrë një përgjigje pa vonesë nga Kuvendi.

“Lufta kundër korrupsionit duhet të japë rezultate edhe më konkrete. Institucione si SPAK duhet të veprojnë të pavarur dhe në mënyrë efeciente, të lira nga presioni politik.  Hetimet që janë në vijim, përfshirë atë të Zv. Kryeministres duhet të vazhdojnë pa asnjë ndërhyrje. Zbatimi i ligjit nuk mund të jetë selektiv. Shqyrtimi i kërkesës për heqjen e imuniteti pa asnjë vonesë është përgjegjësi e parlamentit. Jam i shqetësuar për amandamentet në Kodin e Procedurës Penale për të mbrojtur zyrtarët nga pezullimi kur janë nën hetim”,- tha Kovatchev.

Edhe raportuesi për Shqipërinë, Andreas Schieder, tha se në Shqipëri korrupsioni mbetet një shqetësim i madh që kërkon adresim, vecanërisht ai i nivelit të lartë.

Në Komisionin e Jashtëm të Parlamentit Evropian,  eurodeputeti Fredi Beleri tha se Shqipëria ka një krizë domethënëse institucionale midis ekzekutivit dhe gjyqësorit për shkak të korrupsionit, ndërsa shtoi se  2/3 e vendit nuk furnizohet me ujë 24 orë. Ai shtoi se autoritetet shqiptare kanë treguar parregullsi me fondet e BE, si rasti OLAF.

“Në Shqipëri ka një krizë domethënëse institucionale midis ekzekutivit dhe gjyqësorit për shkak të korrupsionit. 2/3 e vendit nuk furnizohet me ujë 24 orë. Kemi parë parregullsi me fondet e BE. Rasti OLAF një ndër to. Dua të shoh progres dhe Shqipërinë në BE.

Nëse ky raport përpiqet thjesht ta prekë, përkundër paraqitjes së realitetit siç është, nuk do të kontribuojë në reformat e nevojshme. Do mbështes amendamentet që do të paraqesin kolegët”, tha Beleri gjatë prezantimit të draft-raportit për progresin e Shqipërisë në rrugën e integrimit.

Nga Eduard Zaloshnja

Në 13 vjetët e fundit kam zhvilluar 126 sondazhe elektronikë, ku e shpërndaj linkun e pyetësorit me SMS krejt të rastësishme anekënd vendit. Dhe marrësit e pyetësorit e plotësojnë atë në mënyrë krejtësisht anonime.

Kuptohet që nuk ua dërgoj linket e pyetësorëve njëherazi të gjithë pjesëmarrësve të sondazheve të mia elektronike – përdor një sistem rrotacioni nga sondazhi në sondazh, për ta shpërndarë koston e dërgesave periodike të SMS-ve.

Sidoqoftë, për herë të parë dje, u dërgova një link me SMS njëherazi të gjithëve (pothuaj 20 mijë banorëve të rastësishëm të rritur të vendit, me karakteristika të ndryshme demografike, gjeografike, arsimore, e politike; dhe si rrjedhojë, realizova një sondazh me marzh gabimi statistikor vetëm +/-1%).

Pyetja kryesore në pyetësor ishte: “Për kë keni aktualisht opinionin Më pozitiv, Ramën, Berishën, apo asnjërin nga të dy?”

40% u përgjigjën se opinionin Më pozitiv ndër dy politikanët kryesorë e kanë për Ramën, dhe vetëm 19.2% për Berishën. Ndërsa plot 40.8% deklaruan se nuk kanë opinion pozitiv për asnjë nga të dy (shihni grafikun 1).

Duke i përkthyer statistikisht përqindjet e mësipërme në numra të popullsisë së rritur, simpatizantët e Ramës më rezultuan 760 mijë, të Berishës 365 mijë, dhe të asnjërit prej të dyve 775 mijë (shihni grafikun 2).

SHËNIM: Sipas sondazhit tim të parafundit, për PS-në ishin gati të votonin rreth 700 mijë, për PD-ASHM rreth 380 mijë, për të tjerat rreth 75 mijë, dhe rreth 745 mijë për asnjë parti. Më 11 maj 2025, rreth 760 mijë zgjedhës brenda vendit votuan për PS-në, rreth 500 mijë për PD-ASHM, rreth 200 mijë për partitë e tjera, dhe rreth 440 mijë nuk votuan fare.