Ish-deputeti i Partisë Demokratike, Ervin Salianji ka publikuar në rrjetet sociale disa fotografi të fletëve të votimit, ku disa anëtarë të PD-së kanë shënuar emrin e tij krahas emrit të Sali Berishës, i cili është i vetmi kandidat në garën për drejtimin e selisë blu.

Salianji shkruan se përmes votës apo shënimit të emrit të tij në fletën e votimit, po shprehin qëndrimin e tyre dhe po tregojnë se Partia Demokratike nuk është pronë personale.

Ish-deputeti i cili u përjashtua nga kandidimi për kreun e partisë, thekson se “kur gara vritet, kur alternativa përjashtohet dhe kur vula përdoret për të mbajtur peng opozitën, demokratët dinë të reagojnë me dinjitet”.

Reagimi i Salianjit:

Falenderim dhe mirënjohje për çdo demokrat që sot ka zgjedhur të shënojë qartësisht preferencën e tij.

Po më vijnë qindra mesazhe dhe foto nga demokratë që, përmes votës, shkrimit të emrit apo refuzimit të farsës, po tregojnë se Partia Demokratike nuk është pronë personale. Ju jam mirënjohës secilit nga Shkodra në Korçë, Vlore, Kukës, Fier, Dibër, Elbasan, Gjirokastër, Berat, Lezhe, Durres e Tiranë. Nga çdo degë po vërshojnë reagimet dhe fotot e fletes se votimit!

Falenderim edhe për mijëra demokratë të tjerë që e kanë braktisur dhe përbuzur farsën e uzurpimit të Partisë Demokratike për interesa personale.

Kur gara vritet, kur alternativa përjashtohet dhe kur vula përdoret për të mbajtur peng opozitën, demokratët dinë të reagojnë me dinjitet.

Këto mesazhe janë më shumë se mbështetje personale. Janë një refuzim i frikës, i imponimit dhe i shndërrimit të PD-së në një strehë për interesa personale!

Ne nuk dorëzohemi.

Do ta çmontojmë këtë farsë me kurajo, me demokratë të lirë dhe me besimin se Partia Demokratike do t’u kthehet anëtarëve dhe qytetarëve.

Ministri i Energjisë dhe Infrastrukturës, Enea Karakaçi, deklaroi se për të zgjidhur trafikun në aksin Tiranë-Durrës do të shembet mbikalimi i Rinasit për të krijuar një të ri me 4 korsi.

“Kemi hapur korsitë në drejtim të Rinasit dhe Tiranës, që ishin 6 km e para. Unë e di që hinka krijohet përsëri, por trafiku ka ndryshuar. Kishim problematikë te një mbikalim dhe u rregullua nga ARRSH-ja. Te mbikalimi i Rinasit krijohet hinka, por po vijojnë punimet pas mbikalimit të Rinasit. Pjesë e kontratës është shembja e mbikalimit të Rinasit, krijimi i një mbikalimi të ri me 4 korsi dhe vazhdimi me 2 km të tjerë i korsive shtesë që janë duke u punuar. Kjo do i japë një shfryrje më të madhe trafikut në rrugën Tiranë-Durrës”, tha ministri.

Kur u pyet nëse rruga Tiranë-Durrës do të vijojë të jetë pa pagesë, Karakaçi u përgjigj shkurt: “Për momentin, patjetër do të vazhdojë të jetë pa pagesë”.

Analisti Andi Bushati, i ftuar në emisionin “Të Paekspozuarit në MCN TV”, deklaroi se Sali Berisha, duke mos pranuar kandidat përballë vetes në zgjedhjet për kryetar në PD, i bëri gropën partisë, por ndihmoi edhe shoqërinë, pasi ekspozoi shumë persona që këto ditë flisnin për mungesën e demokracisë në PD, por jo për mungesën e demokracisë në Shqipëri. 

“Kjo qe ka bërë Berisha, i ka bërë të keqe PD-së, por i ka bërë një të mirë shoqërisë. Ky ka qenë një muaj e gjysmë, që ka nxjerrë përballë publikut të gjithë ata njerëz që në mënyrë paradoksale shqetësohen më shumë për demokracinë në PD , sesa për demokracinë në Shqipëri.

Kanë derdhur lot për demokracinë në PD, por nuk kanë bërë as 10% për zhdukjen e demokracisë në Shqipëri. Duke bërë këtë hara-kiri për partinë e vet, Berisha ka marrë në gropën e vet, ata që janë shfaqur në studio duke thënë çfarë fatkeqësie po e gjen PD. Kur vjen fjala çfarë fatkeqësie e ka gjetur Shqipërinë, nuk ulërasin me të njëjtën timbër zëri”, deklaroi Bushati.