Ballina Blog Faqe 7

Protestat në Shqipëri, eurodeputeti gjerman: Kam dëshmuar lidhjet mes shtetit, pushtetit dhe krimit të organizuar

0

Eurodeputeti gjerman Michael Gahler ka reaguar për protestat e studentëve në Shqipëri, duke ngritur shqetësime për korrupsionin dhe lidhjet mes shtetit, partisë në pushtet dhe krimit të organizuar.

Gahler, zëdhënës për politikën e jashtme i Grupit të Partisë Popullore Evropiane në Parlamentin Evropian, kujtoi përvojën e tij si drejtues i delegacionit të vëzhguesve të zgjedhjeve të Parlamentit Evropian në Shqipëri.

“Duke drejtuar delegacionin e vëzhguesve të zgjedhjeve të Parlamentit Evropian (PE), kam dëshmuar lidhjet mes shtetit, partisë në pushtet dhe krimit të organizuar. Kam parë se prej sa kohësh qytetarët protestojnë kundër korrupsionit dhe qeverisë, duke ngritur shqetësime që prekin thelbin e perspektivës së integrimit evropian të Shqipërisë”, shkruan Gahler.

Reagimi i eurodeputetit vjen në një kohë kur protestat e studentëve dhe të rinjve në Shqipëri vijojnë, me kërkesa që lidhen me përgjegjësinë politike, korrupsionin dhe qeverisjen.

Kështjella në Francë dhe 2,1 milionë euro pasuri të sekuestruara/ Ermal Beqiri i kërkuar për dosjen “AKSHI”, tentativa për t’i shpëtuar ekstradimit në Shqipëri

0

Biznesmeni shqiptar Ermal Beqiri, i arrestuar në Francë dhe i kërkuar nga drejtësia shqiptare në kuadër të dosjes “AKSHI”, ka kërkuar sërish lirimin nga burgu. Ai shpreh dëshirën për të qëndruar në Francë, ndërsa vendimi për kërkesën e tij pritet të shpallet të premten.

Gazeta franceze Courrier Picard i ka kushtuar një artikull çështjes së Ermal Beqirit, i cili vijon të mbahet në burgun e Beauvais, në Francë.

Sipas medias franceze, Beqiri është paraqitur sërish përpara dhomës së hetimeve të Gjykatës së Apelit në Amiens, ku ka kërkuar lirimin e tij. Vendimi i gjykatës për këtë kërkesë pritet të merret të premten.

Çështja e biznesmenit shqiptar lidhet me kërkesën e autoriteteve shqiptare për ta ekstraduar në Shqipëri, ku kërkohet nga drejtësia në kuadër të një çështjeje që lidhet me korrupsionin.

Një tjetër aspekt i çështjes që ka tërhequr vëmendjen e mediave franceze është sekuestrimi i pasurive me vlerë rreth 2,1 milionë euro. Në fokus është edhe një kështjellë në departamentin Oise, në veri të Francës, e lidhur me pasuritë që po shqyrtohen nga autoritetet.

Ndërkohë, Beqiri vijon të qëndrojë në burg, ndërsa gjykata franceze pritet të shprehet për kërkesën e tij të re për lirim.

Vendimi i ardhshëm do të jetë një hap i rëndësishëm në procedurat gjyqësore që lidhen me qëndrimin e tij në Francë dhe kërkesën e autoriteteve shqiptare për ekstradim.

Kërcënimet e Ramës ndaj protestuesve, Berisha: Ndërtoi sarajet me paratë e tyre, 200 milionë euro te inceneratorët

0

Kreu i Partisë Demokratike, Sali Berisha në një takim me grupin parlamentar demokrat, sulmoi ashpër kryeministrin Edi Rama për sjelljen e tij ndaj protestuesve dhe sidomos studentëve.

Gjatë fjalës së tij Berisha tha se Rama në mëngjes i fton për dialog, ndërsa në mesditë del në takim me bankat, për t’i dalë kundër protestës.

Sipas Berishës, Rama po sillet si hipokrit, në një kohë kur ka ndërtuar me paratë e atyre që protestojnë, sarajet me themele më të gjata se sa diktatori i tij.

“Rama nga paniku i tmerrshëm që e ka ngërthyer, frika e madhe se dita e llogarisë po vjen, ka humbur logjikën, arsyen dhe është lëshuar në kërcënime bajate vulgare që faktojnë të gjithë tipin e tij psikologjik.

Pasi i përmbysën karriget e dialogut del në takim me bankierët dhe mendon se fuqia ekonomike e bankave do t’i kthejë fuqinë. Bankat janë biznese nuk funksionojnë sipas parimeve të një narko-diktatori por sipas ligjeve.

Sot kërcëno protestuesit për lista të zeza, linçime, heqje pasaportash udhëtimi, bllokim të transportit publik, i nxjerr të gjitha nga arkiva e etërve të tij. Kërcënon se do u vërë në ngarkim çdëmtimin, shihni çfarë hipokrizie. Ç’pretendon ky që flet për dëme kur ka ndërtuar me paratë e baballarëve të protestuesve sarajet me themele më të gjata se vilat e Enverit.

Ka rrethuar sarajet me park që nuk e ka as pallati mbretëror.

Flet për dëme e taksa, por ka zhdukur 130 mln euro në djegësin e Tiranës, 200 mln euro me 3 djegësa dhe asnjëri nuk punon”, tha ai.

Rama kërcënon protestuesit: Do u ndalojmë aksesin në BE dhe në trena!

0

Kryeministri Edi Rama ka ashpërsuar retorikën ndaj protestuesve, duke paralajmëruar masa të forta ndaj personave që përfshihen në akte dhune gjatë tubimeve kundër qeverisë në Tiranë.

Kreu i qeverisë deklaroi se ata do të ndiqen “këmbë këmbës”, ndërsa paralajmëroi pasoja edhe për familjet e të miturve që shkaktojnë dëme gjatë protestave.

Gjatë një takimi me drejtuesit e sistemit bankar në Shqipëri, Rama deklaroi se familjet e të miturve që dëmtojnë pronën e të tjerëve nuk do të marrin shërbime nga shteti, pa sqaruar se mbi çfarë baze ligjore do të mbështetej një masë e tillë.

“Do t’i ndjekim këmbë këmbës. Ky nuk është një qëndrim për të folur, por është një informacion për të gjithë ata që janë ende me dhunën në mendje, që të largohen nga ajo rrugë një orë e më parë.

Kushdo që ka një fëmijë të mitur duhet të kujdeset për të. Do t’ju vijë fatura në familje. Nuk do të marrë asnjë shërbim nga shteti familja e fëmijës që djeg pronën e tjetrit”, deklaroi Rama.

Por paralajmërimet e kryeministrit nuk u ndalën këtu. Ai foli edhe për kufizimin e aksesit të personave të përfshirë në akte dhune në aeroporte, trena, hotele dhe mjete të tjera transporti.

Sipas Ramës, qeveria ka nisur bashkëpunimin me vendet europiane për të penguar hyrjen në këto shtete të personave që identifikohen si të dhunshëm.

“Do t’u mbyllen akseset në trena, aeroporte, hotele, mjete transporti. Do të bashkëpunojmë dhe kemi nisur bashkëpunimin me vendet europiane për ndalimin e aksesit në ato vende si njerëz të dhunshëm”, u shpreh kryeministri.

Kreu i Sindikatës së Pedagogëve: Bojkoti nis sot deri në plotësimin e kërkesave të studentëve

0

Kreu i Sindikatës së Pedagogëve, Skënder Kovaçi, lexoi para mediave vendimin për shpalljen e bojkotit në të gjitha universitetet e vendit.

Sipas tij, bojkoti nis nga sot deri në një njoftim të dytë.

“Kryesia, në mbledhjen e 20 tetorit, në sheshin e protestës vendosi njëzëri bojkotin në të gjithë universitetet e Shqipërisë. Bojkoti nis sot dhe vijon deri në një njoftim të dytë. Studentët protestojnë për arsim, shëndetësi, llogaridhënie.

Përgjigja e marrë ka qenë heshtja dhe dhuna ekstreme. Nuk mund të vijojmë mësimin kur studentët tanë dhunohen“, tha Kovaçi.

“Të ndalohet dhuna ndaj studentëve dhe protestuesve. Hetim për përdorimin e forcës policore dhe vënien para përgjegjësisë të atyre që ushtruan dhe udhëhoqën dhunën. Trajtim i ligjshëm dhe dinjitoz i çdo të riu të ndaluar. Thirrje rektorëve të respektojnë vendimin dhe të mos ketë masa ndaj atyre që marrin pjesë në protestë”, shtoi Kovaçi.

“Rroftë rinia e lirë, sot vendosim ne!”, studentët shpalosin banderolën te Politekniku

0

“Rroftë rinia e lirë, fundi i Katovicës. Sot vendosim ne!” është mesazhi i banderolës së shpalosur sot nga studentët në fasadën e Universitetit Politeknik të Tiranës, ku ka nisur protesta e tyre, e mbështetur edhe nga pedagogët.

Tubimi zhvillohet ndërsa Sindikata e Pedagogëve ka shpallur bojkotin e mësimdhënies në universitetet publike të vendit, në solidaritet me studentët dhe kërkesat e tyre.

Studentët kundërshtojnë dialogun e propozuar nga kryeministri Edi Rama dhe kërkojnë dorëheqjen e tij dhe të qeverisë.

Pedagogët i janë bashkuar protestës në mbështetje të të rinjve, ndërsa bojkoti i shpallur nga sindikata vijon deri në një njoftim të dytë.

Dyshohet se fshehu 2 vila të Ballukut në emrin e tij, Igli Tare merret i pandehur nga SPAK

0

Prokuroria e Posaçme i ka komunikuar akuzën ish-futbollistit të Kombëtares, Igli Tares. Tare u paraqit sot herët në mëngjes në SPAK, ku akuzohet për pastrim parash, pasi dyshohet se fshehu në emrin e tij, 2 vila të ish-zëvendëskryeministres Belinda Balluku. Komunikimi i akuzave ndaj Igli Tares vjen një ditë pas vendimit të SPAK për t’i komunikuar akuzat edhe Belinda Ballukut. Kjo e fundit është marrë e pandehur për pesë vepra penale, të dyshuara të kryera në 15 raste.

Ish- zv.kryeministrja Belinda Balluku është marrë e pandehur për tenderin më vlerë 190 milionë euro për ndërtimin e tunelit të Llogarasë, akuzë që i është komunikuar zyrtarisht dhe dyshohet edhe për tenderin 20 milionë euro të lotit 4 të Unazës së Madhe të Tiranës. Për të dy tenderët, me vlerë 210 milionë euro, sipas SPAK, Balluku ka paracaktuar fituesin përmes mbikëqyrjes dhe ndërhyrjes gjatë gjithë procesit të zhvillimit të garës.

Gurë drejt Ministrisë së Arsimit, ujë dhe gaz lotsjellës në drejtim të protestuesve

0

Protestuesit, pas disa minutash qetësie përballë policëve, nisën të godisnin me gurë godinën e blinduar të Ministrisë së Arsimit.

Menjëherë, policia u përgjigj me ujë dhe gaz lotsjellës, duke i zmbrapsur paksa protestuesit, të cilët nuk u larguan gjithsesi nga Rruga e Durrësit.

Ata po qëndrojnë pranë efektivëve të policisë, duke kërkuar rikthimin para Ministrisë së Arsimit.

Protestat e studentëve, PD kërkon seancë plenare urgjente për dhunën ndaj të rinjve

0

Grupi Parlamentar i Partisë Demokratike i është drejtuar Kuvendit të Shqipërisë me një kërkesë për zhvillimin e një seance plenare urgjente, në të cilën të diskutohet situata e krijuar pas tetë ditësh protestash të studentëve dhe të rinjve.

Në njoftim, deputetët e PD-së deklarojnë se protestuesit vijojnë të kërkojnë largimin e kryeministrit Edi Rama, duke ngritur shqetësime për qeverisjen, korrupsionin dhe atë që e cilësojnë si braktisje të të rinjve nga qeveria.

Një nga çështjet kryesore të kërkesës është trajtimi i protestuesve nga Policia e Shtetit. Opozita thotë se gjate protestave janë konstatuar raste të përdorimit të tepruar të forcës ndaj studentëve, të miturve, grave dhe vajzave.

Po ashtu PD thotë se janë raportuar dëmtime fizike, përfshirë fraktura, dëmtime në kokë dhe lëndime të tjera, si dhe dëmtime që, sipas saj, lidhen me përdorimin e plumbave të gomës dhe lëndëve kimike.

Njoftimi i grupit te PD

Prej tetë ditësh, studentët dhe të rinjtë shqiptarë vijojnë protestën e tyre kundër arrogancës, keqqeverisjes, korrupsionit qeveritar dhe braktisjes nga ana e Qeverisë, duke artikuluar si kërkesë të vetme largimin e Kryeministrit Edi Rama.

Gjatë këtyre ditëve të protestës, ne, deputetët e Kuvendit të Shqipërisë, kemi konstatuar akte të rënda dhune ndaj studentëve dhe të rinjve. Këto akte, të cilat dëshmojnë një përdorim shqetësues dhe të papranueshëm të forcës nga Policia e Shtetit, nuk kanë kursyer as të miturit, gratë dhe vajzat. Si pasojë, janë raportuar dëmtime të rënda fizike, përfshirë fraktura të gjymtyrëve, dëmtime në kokë, lëndime të tjera trupore, si dhe dëmtime të shkaktuara nga përdorimi i plumbave të gomës dhe i lëndëve kimike.

Përballë kësaj situate të paprecedentë, është veçanërisht shqetësues që Kuvendi i Shqipërisë jo vetëm nuk ka ndërmarrë hapa për të kërkuar llogaridhënie institucionale lidhur me veprimet e punonjësve të Policisë së Shtetit, një pjesë e konsiderueshme e të cilëve, sipas konstatimeve të bëra gjatë protestave, nuk mbanin mjete identifikimi, por ka anuluar edhe seancën plenare të parashikuar, pa njoftim paraprak dhe pa dhënë një shpjegim të arsyetuar për këtë vendim.

Në këto kushte, duke vlerësuar seriozitetin e situatës dhe nevojën për ushtrimin e përgjegjësive kushtetuese dhe institucionale të Kuvendit, në mbështetje të nenit 31 të Rregullores së Kuvendit, kërkojmë thirrjen e një seance plenare brenda ditës së sotme ose, në alternativë, ditën e mërkurë, me rend dite të kufizuar në pikën e mëposhtme:

– “Diskutimi mbi protestën e studentëve dhe të rinjve, kërkesën e tyre për largimin e Kryeministrit Edi Rama, si dhe aktet e dhunës së ushtruar nga Policia e Shtetit ndaj të miturve, studentëve dhe të rinjve”.

Vlerësojmë se Kuvendi i Shqipërisë ka detyrimin institucional të garantojë transparencën, llogaridhënien dhe shqyrtimin parlamentar të kësaj situate, duke bërë të mundur diskutimin e saj në një seancë plenare dhe duke kërkuar përgjegjësi për çdo shkelje të ligjit të konstatuar.

Duke ju kërkuar të merrni masat e nevojshme për shqyrtimin e kësaj kërkese me urgjencë, në përputhje me Rregulloren e Kuvendi

SPAK i komunikon Belinda Ballukut akuzat përfundimtare: 9 raste për shkelje të barazisë në tendera, korrupsion dhe pastrim parash

0

Ish-zv.kryeministrja Belinda Balluku është paraqitur ditën e sotme në Prokurorinë e Posaçme, ku i janë komunikuar zyrtarisht akuzat.

Balluku është marrë e pandehur për ‘korrupsion’, ‘pastrim parash’, ‘shkeje të barazisë në tendera’ në 9 raste dhe fshehje pasurie.

 Njoftimi i SPAK:

Prokuroria e Posaçme kundër Korrupsionit dhe Krimit të Organizuar i ka komunikuar sot, më 20.10.2026, të pandehurës Belinda Balluku akuzat përfundimtare për veprat penale të mëposhtme:

•          “Shkelje e barazisë së pjesëmarrësve në tendera apo ankande publike”, në bashkëpunim (nëntë herë), parashikuar nga neni 258/2 e 25 i Kodit Penal.

•          “Korrupsion pasiv i personave që ushtrojnë funksione publike”, e parashikuar nga neni 259 i Kodit Penal.

•          “Korrupsion pasiv i funksionarëve të lartë shtetërorë ose i të zgjedhurve vendorë”, i parashikuar nga neni 260 i Kodit Penal.

•          “Refuzim për deklarimin, mosdeklarimin, fshehjen ose deklarimin e rremë të pasurive, interesave  privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, (dy herë), parashikuar nga neni 257/a, paragrafi i 2-të i Kodit Penal.

•          “Pastrim i produkteve të veprës penale ose i veprimtarisë kriminale”, parashikuar neni 287, gërma “b” i Kodit Penal, e kryer në rrethana cilësuese “në bashkëpunim dhe më shumë se një herë”, sipas nenit 287/2 të Kodit Penal (për dy pasuri të paluajtshme).

Prokuroria e Posaçme po vijon veprime konkrete procedurale për t’i komunikuar akuzat edhe personave të përfshirë në të njëjtën çështje penale.  Detaje të tjera do të bëhen të ditura në një moment të mëvonshëm.

1...678...9 067Faqja 7 nga 9 067